Read South Giziga ISA 62 Bible Online

ISA 62 - South Giziga bible

ISA 62

¹Zeruzalem, ya mawuɗ ka na, y'anta sa cifi lek leke ta. Siyoŋ, ya mawuɗ ka na, y'anta sa ndir joˀ ngatara ta, hã gi jeŋŋe ɗik a bo ngbay ar li babara, hã ɓi ngi lih ɗik a bo kaɓa vu matiɓi njilim njilim.

²Sukwi ngi mizli gar a sa puraka gi jeŋŋe ɗike, yo buy madiɗahay a sa puraka dudok ɗike. A sa zulukuw ti slimiɗ nawaya, Bumbulvuŋ masa bo di ti balam naŋ.

³Ki sa tiri loppol hirnga a haŋ Bumbulvuŋ ɗike, loppol ngi buyoy a hur haŋ ngi Buymisemuŋ ɗike.

⁴Anta sa zulukuw ‹Walahay mupula le fuk› mata, anta sa ɓaka hirwuy ɗike: ‹Diŋ› mata. Amma a sa zulukuw ‹Micira hiri da ya Buymisemuŋ›, yo a sa zilaka hirwuy ɗike, ‹Ngwas ngi hay zil›. Asi hiri a sa cira Bumbulvuŋ ti ka, yo a sa zuɓaka hirwuy ɗike ngi ngwasa.

⁵Naŋ kine, ziri ɗikey a sa zuɓukuw ngi ngwas, kaɓa mangal gawla mazuɓa meketeŋ naŋ. Yo Buymisemuŋ ɗik a sa mumul vur ka, kaɓa mangal gawla mamumul vur meketeŋ naŋ.

⁶Zeruzalem, yi cifi mijigina lihey le a hirnga mohol ɗikeye. Ti duvuɗ, ti papas gar na, t'anta sa ndiram joˀjoˀ lambaˀ ta. «Kum mijigina lihey, kum magaka ɓa Bumbulvuŋ a wuluk keŋ ar Zeruzalem na, anja ki musukam vu ko neˀ le ta.

⁷Yo anja ki pulikiy i musuk vu ta, hã i ɗiya Zeruzaleme, hiri naŋ a muŋ, yo hã i ga, ɓa hirwuy keɗeɗe a hunuma Zeruzaleme.»

⁸Bumbulvuŋ a hudum ani: «Kaɓa ya hana misi gidaŋ haɗa na, y'anta sa vula alkamari ɗike, ɓa mesene ɗikey a zumaka mata ndiɗaˀ wãˀ, mbaazla ɗik, ka migir vurˀe na, ziri ngi mulakay anta sa saka mata ndiɗaˀ wãˀ.

⁹Amma mizli masa njikom alkamari na, masa zumaka i taŋ, a sa hunumikiy ya Bumbulvuŋ. Yo mizli masa gaka sifi ngi yi ngi gudubuno, masa saka mbaazla naŋ i taŋ, a wazlaray ngi hay ɗu mipala.»

¹⁰Zeruzalemey, bam tir walahaya ng'avra, ngwaˀaka jiviɗ da mizli. Dikaka mukutik ngi jiviɗeye, guɗumaka ɗuguroy avra, yo ngam drapo kaˀ ngi biga bugawla da mizli.

¹¹Bumbulvuŋ ara ɓa mingiɓi naŋ ani ɗaˀ le, da mizli, zle a mi vay ngi ruwuy, hã ar kiɗa mi naŋ vay mekelem. Ɓaka walahay Siyoŋ na: «Milih ɗik ani ara sawa, ara sawa jom ti gwat muwurkakaŋ di, kaw a haŋ, waɗ migir naŋ, naŋ muluma na, ɓaˀ a mbuŋ.»

¹²A sa zilika taŋ ‹mizli muvuku vu taŋ›, ‹Mizli Bumbulvuŋ mumbuɗo hirnga taŋ le›, yo a sa zulukuw ka Zeruzaleme ‹walahay muwuna le›, anta i‹walahay mupula le fuk› mata.