Read South Giziga ISA 63 Bible Online

ISA 63 - South Giziga bible

ISA 63

¹Mbur maso tir walahay Bosra, angi hirwuy Edom, zana ɗuw ɗuw gagaza na, i waka? Zana mimezlehey ɓaˀ ɓaˀ avu vu, a so hirnga kaˀ a muŋ, a si na vu naŋ le, naŋ gidaŋ. Bumbulvuŋ a ɓi: «I ya mbur maɓi ɓi mijeŋŋe, misi ti gidaŋ ngi laha mizli ɗuwoy.

²Na zana ɗik muɗuw ɗuw gagaza na, vur mike? Zana ɗik vuna kaɓa ngi mbur manjurusl gudubun ar li ngi ɗuc naŋ na, vur mike?»

³Haˀaw, yi njirsla gudubuno le ar li ɗuc naŋ, i ya pal ɗu, a wuzla mizli, ko mbur pal muso avu ya anta. Mevel mijiy na, i kurupa taŋ le, ya muzuɓ himaˀ na, i slirta taŋ le. Pumbus taŋ a mulo le avu zana ɗu, yo i nduva zana ɗu le gar.

⁴Asi mike na, a mevel ɗu, i hin ngi pula cuwal zleˀe, vi ngi mbiɗa hirnga ngi mizli ɗuwoy a ndilo le zleˀe.

⁵I pur, i pur na, ko mijini ɗu anta, ya ɗoɗok pal ɗu, ko mbur mavuliy gidaŋ anta. Dar i laha vu ɗu ti haŋ ɗu vuna, mevel mufõh fõh tuwa, a vuliy gi zil le.

⁶Ya miji mevel na, i njirsla mizli le, ya muzuɓ himaˀ na, i wa taŋ le duwlak duwlak. Joˀ i pa pumbus taŋ a ruwuy.»

⁷Gi mezle Bumbulvuŋ miga gar, yo ɓi mahunumakaŋ vurˀe na, i wuɗ i mahiri ngi ɓa ɓi nah ava, i ɓi ngi gwatay, Bumbulvuŋ miga taŋ gar vur ndra, haˀaw, i gi mezle naŋ mihaɗa da sukwi Israyel, ati gwat mezlehey naŋ miga taŋ, vur naŋ mawuɗ taŋ haɗa na.

⁸Asi a ɓi le vur Israyeleye zleˀe: «Taŋ i mizli ɗuwoy migisiŋ gisiŋ, i ziri ɗu mizilehey, t'anta tikinikiy ta.» Dar naŋ a ndir i Milih taŋ.

⁹Ti taŋ misi ar bonoy taŋ gar na, ko a slin mbur ti slin nga jina taŋ ta, amma i naŋ vuna ti hirnga naŋ mira laha taŋ. I naŋ ti haŋ naŋ mumbuɗo hirnga taŋ, vur hin gar, diga zlezle na, a jina taŋ le, yo a zuɓa taŋ le gumbuˀ gumbuˀ a haŋ, vur ara wuɗ taŋ, yo ara pura taŋ ircece.

¹⁰Amma taŋ a slikiɗam ɓi, a giraka ˀUf naŋ mipala. Dar naŋ a mbiɗi hirik ng'ar taŋ, a gi taŋ mesene, naŋ vuna tehhe, a gi vurum ti taŋ.

¹¹Mizli naŋhay tuwa, ɓi mucuh ti hin ngi Moyis zleˀe na, a wulkaka keŋ, dar a ɓam: «Mbur mubo ti mijigina mizli naŋhay zleˀe tir mubuliy tuwa, naŋ amaka? Mbur mica ˀUf naŋ mipal a hur taŋ tuwa, naŋ amaka?

¹²Mbur muvula gidaŋ da Moyis ti haŋ migidaŋ tuwa naŋ amaka? Mbur muwucaha yam ngi mubuliy wucah a mbuŋ mizli naŋhay, ɓa slimiɗ naŋ a zil ngi caˀa tuwa, naŋ amaka?

¹³Mbur mutuwuɗ taŋ ti wuzla yam mijileŋ tuwa, naŋ amaka? Ko sar a ba taŋ ta wãˀ, kaɓa pilis ar li papala.

¹⁴ˀUf ngi Bumbulvuŋ aru ti taŋ ng'ar li musuko vu, kaɓa ginewey maram ng'asi yam.» Buymisemuŋ, ka mikisa mizli ɗikey na, kahana, ɓa slimiɗ ɗik a zil haɗa.

¹⁵Aw Buymisemuŋ, puro hiri zle a muŋ ɗi, zle tir hay ɗik mipal, yo mukuy teˀ na. Wuɗ ɗik ka mawuɗ ndra suloŋ suloŋ ati wirwir ɗik ngi gi vurum tuwa, naŋ amaka? Ka mawuɗ ndra paˀ paˀ, yo ka mapura ndra ircece haɗa tuwa gar na, anta gi avu ndra mata vur mike?

¹⁶Asi cine ndra i ka ngbaŋ. Asi mike na, dideˀ ndra Abrahama, a si na ndra ta, yo Zakopo, a si na ndra ta ma. Amma ka Bumbulvuŋ, ki cine ndra, diga zlezle si na, slimiɗ ɗike: ‹Mimbiɗi hirnga ndra›.

¹⁷Bumbulvuŋ, ki pula ndra i laˀam lambaˀ kileŋ avu jiviɗ ɗike vur mike? Yo ki tiri ti hirnga ndra gidaŋ, hã i zluwunam ti ka mata vur mike? Mbuɗo hiri ng'avi ndra gawla ɗikey a muŋ, ndra mizli ngi ɗikeye.

¹⁸Ndra mizli ɗikey muvuku vu taŋ, ndra mitiɓaka hirwuyo da ndra na, a zik haɗa ta. Mesene ndrahay a musukuɗoko hay ɗik mipala le tur.

¹⁹A ziko le haɗa, ndr'i mizli, ka mazum buy ar ndra na mata, mizli mazilam ndra ti slimiɗ ɗik na mata. Da a gi zleˀe na, i wuɗam anja ki ngiro muŋ ŋcaht, ki po sar. Ɓa hã muwãhay a wusam hiɓik hiɓik a mbuŋ ɗike.