Read South Giziga ISA 64 Bible Online

ISA 64 - South Giziga bible

ISA 64

¹Ki sa tiri kaɓa vu mazluma widis memeɗe mupo le ti pi ar dibgirgbizli naŋhay, malla kaɓa vu mavurɗo yam. Naŋ kine, kisa ga ɓa mesene ɗikey a sunukuw. Yo sukwi gar a sa jijikam a mbuŋ ɗike.

²Zleˀe na, ki gi gwat ngi zuma hirngahay le, i gwat ndra muwulkaka zleˀe ta. Ki po sar le, muwãhay a wusam hiɓik hiɓik a mbuŋ ɗike.

³Mbak ka le na, kuli a gi gwat misi kanah ɗaˀ da mizli ɓa a njaham hiri aseˀe na, ko i cinam ɗaˀ ta, ɓi nah a diɗ ɗaˀ a slimiɗ ndra ta, yo hiri ndra a pur ɗaˀ ta.

⁴Mizli mamulom ti gi gwat mijeŋŋe, yo mizli mawulkam sipa jiviɗ ɗik na, ki ra ru nga ji taŋ hirnga. Ani ki ji mevel le, asi i ngizlam le baˀ avu jiviɗ ɗike, dambalaka ndra masa laham na, ar jiviɗ ndra mibaˀam ava vuna.

⁵Ndra gar, ndra ti dili, yo gwat ngi gi ndra mijeŋŋe gar na, naŋ kaɓa zana mazĩˀĩ kuyta wãˀ, ndra gar i guvoˀom le kaɓa kalafa. Yo malambaˀ ndra migaka gar na, ara kil ti ndra le, kaɓa himiɗi.

⁶Ko mbur loŋ mazila slimiɗ ɗik anta, ko mbur mapuɗuk ɓa a gumbuˀ kap ti ka anta. Asi ki ɗumo mihiri ɗike le avu ndra, joˀ ki pula ndra mbak da malambaˀ ndra migaka vuna, ɓa i susuymom wãˀ le.

⁷Ani, cine ndra i ka Bumbulvuŋ ngbaŋ, ndr'i hohoy ngatara, mindira ndra i ka, ndra gar na, ndr'i slra ngi haŋ ɗiki.

⁸Bumbulvuŋ, anja ki ji mevel, hã fineˀ gidaŋ le ta, gwat malambaˀ ndra migaka gar na, anja ki wulka taŋ ta ndiɗaˀa. Ambuh, pura ndra takwa: ndra gar, ndr'i mizli ɗikey.

⁹Walahay mipal ɗikeye, a tiram diŋhey le. Zeruzalem a tiri le daŋ daŋ, mindir a Siyoŋ, i ɗugur col pal naŋ.

¹⁰Hay ndra mipal, mimezle, cine ndrahay mazlukuw dimis ngi hunum ɗik ara tuwa, vu a wura le. Yo li ndra mawuɗam haɗa tuwa, a tiri diŋ le.

¹¹Ani so na, Bumbulvuŋ ndra, gwat hana gar, keɗ keɗ na, ki cifi di teˀ gu sukwa? Ki gi gwat neˀ le vurˀe ta, yo ki tika ndra ˀay fineˀ gidaŋ wãˀ sukwa?