Read South Giziga ISA 65 Bible Online

ISA 65 - South Giziga bible

ISA 65

¹Buymisemuŋ a ɓi: «Yi pula vu ɗu le mbak, ɓa mizli macufuɗikiy zleˀe ta na, a lumikiy, yi pula vu ɗu le mbak, ɓa mizli masipikiy zleˀe ta na, a lumikiy. Sukwi ngi mizli mazilaka slimiɗ ɗu zleˀe ta na, yi ɓa taŋ: «Y'anihĩ, y'anihĩ».

²Mizli mislikiɗa ɓihey, mizli masipam jiviɗ malambaˀ, magam sey i gwat taŋ mawuɗam na, yi tila taŋ haŋ hiipas wãˀ ɓa i tuɓo taŋ.

³Taŋ, i mizli maslikiɗikiy mevel, anta ɗum le ta, yo ko mbak le ta ma. A gam mikuli ar jarnehey, a wuram urdi da kulihey ar li taŋ miɗiyaka ti brikey.

⁴A ndiram joˀ ar zivihey, a hinam ar butumoy, A zumam useˀ ngi fedem, yo misi ar sikiɗ taŋ, i gwat misi i ngi zum ta.

⁵A ɓaka mburo: «Cici deŋ akẽh, ki wusiy ta, ki wusiy manja mendere a lumuw na, a gi ta.» Ya mapura gwat ngi gi taŋ tayna gar na, a jiy mevel, a tiɓi ka vu, cunju sẽwwe, mbak le anta.

⁶Amma na, yi toho ɓi nah le toh toh, i ra puraŋ, ko y'anta cifi di teˀ ta wãˀ, sey da ya miga taŋ kiita le, yo i sa wurka taŋ malambaˀ taŋ wãˀ ma kini.

⁷Ya Bumbulvuŋ i ɓa njah: i sa wuruk di i moˀore kum ati ngi cine kumoyo jom gar. Taŋ mizli muwuram urdi da kulihey a muwãhay zleˀe, yo taŋ mijiginam mi avu ya ar li miɗingir ɗingirey zleˀe na, gwat ngi gi taŋ misi zlezle na, i sa wurka taŋ di ti agwada cer cer.

⁸Ya Bumbulvuŋ i ɓi na: Da mizli a lumam yi ngi gudubun minaha le ar guva na, a ɓam: ‹Mbak i ngilaka ta, asi a sa gi mbaazla mundum›. I sa gi ti gawla ɗuwoyo kanah ya, ɓa i ngizla taŋ cek ta.

⁹I sa vula dideˀ da sukwi ngi Zakopo, yo i sa vul da sukwi ngi Zuda, i mbur masa zuma hirwuy muwã ɗuwoyo, mizli ya muwuna taŋ na, i mizli masa zumaka ruwuy muwã tayna, gawla ɗuwoy a sa ndiram angi taŋ.

¹⁰Ɓa ngi pula gir da mizli misipi ɗuwoy na, filkiy ngi Saroŋ a sa tiri li zum ngi ˀaw ati tumuŋhoy, yo sozo ngi Akoro, a sa tiri li zum ngi slahay.

¹¹Amma kum mupulikiy, ya Buymisemuŋ fuk, kum mupuykoko hirnga ngi muwã ɗu mipal, kum muvulaka gwat ngi zum da kuli Gat, yo kum muvulaka mbaazla, sikiɗ cer cer da kuli Meni na,

¹²mbak kwaɗay so, i sa vulukum ɓa a kuɗukum vagay vagay ti maslalam. Ki sa huruk hurukam cek ti popurok, ɓa a slukum ˀay. Asi mike na, i zulukum na, ki zilikiy mi ta, i ɓukum na, ki cinikiy di ta. Ki gam di i gwat ya mapura kuyta, yo ki wunam ngi gi ngi kum i gwat maciriy hiri ta.

¹³Vurˀe, ya Bumbulvuŋ Buymisemuŋ, i ɓi na: «Gawla ɗuwoy a sa zumam, amma kumo, may a sa kiɗukum. Gawla ɗuwoy a sa sam yama, amma kumo, madalyam a sa kiɗukum. Gawla ɗuwoy a sa zluzluɓam, amma kumo, kisa pam mesem.

¹⁴Gawla ɗuwoy a sa zluzluɓam, a jam salalay, asi taŋ muzuy zuy a mevel taŋ, amma kumo, kisa wudam asi vu majukum, haˀaw, kisa wudam ˀay ngar ngar, asi gidaŋ kum anta mata.

¹⁵A dirba kumo, mizli ya muwuna taŋ na, a sa gam slra ti slimiɗ kumo ngi nisa vu si, a sa ɓam: «Anja Bumbulvuŋ Buymisemuŋ a kuɗuw vagay, kaɓa mbur hana malla mbur ngi digana!» Amma a sa zilaka mizli ɗuwoyo, ti slimiɗ muwal mekelem pal.

¹⁶Mbur gar muwuɗ ɗuwula mi le da vu naŋ a ruwuyo na, a sa ɗuwula ani: «Buymisemuŋ miteŋteŋ». Mbur gar muwuɗ hudum le a ruwuyo na, a sa hudum ti zila slimiɗ ngi Buymisemuŋ miteŋteŋ. Buymisemuŋ a ɓi: naŋ kine, bonoy misi zleˀe na, a sa puyukoko hirnga naŋ, kanah gisiŋ, bonoy nah gar na, a sa susuyum a mihiri ɗu.

¹⁷Asi mike na, i wuɗ i gi muŋ nawaya ati hirwuy nawaya. Kanah, gwat misi zleˀe na, t'anta sa wulkaka keŋ mata gisiŋ, ɓi nah anta sa mawa ar mijileŋ ngi mevel taŋ neˀ mata.

¹⁸Gwat ya masa ga na, i mumul ati zluzluɓ mindrehhe ngi sete, Asi i sa gi di Zeruzalem a vul mumul, ɓa ki mumulom di, yo mizli ngi raˀahay a sa zluzluɓam.

¹⁹Naŋ kanah, i sa mumul vur Zeruzaleme, yo i sa zluzluɓ vur mizli ɗuwoyo. Zle dana, anta sa cinam tuwuy malla widi a diga mata.

²⁰Muc ngi ziri gazahay anta sa gi a diga mata, midigilahay, manja a ndilaka hin taŋ, a micam na, anta mata. Gawla metetek wãˀ a sa muc ti vi skata, yo mbur masa muc, manja a ndila vi skata na, mizli a sa puraka kaɓa i mbur minisa le.

²¹Mizli ɗuwoy a sa ndiram hayay, i taŋ masa cifam ar taŋ cummo, yo a sa hirvam gudubunoy, i taŋ masa zumaka yi taŋhaya cummo.

²²Tˀanta sa ndiram hayay, ɓa i mbur mekelem masa cifi ara mata, t'anta sa hurvam gudubun, ɓa i mbur mekelem masa zuma yi naŋ mata. Asi mizli ɗuwoy a sa zikam kaɓa widisey mazikam haɗa na ya, mizli ya muwuna taŋ na, hiri a sa cira taŋ ti gwat taŋ migaka ti haŋ taŋ.

²³Tˀanta sa giram ngatara mata, t'anta sa yam ziri da muc mata. Asi taŋ a sa ndiram i dideˀ ngi mizli, ya Bumbulvuŋ muɗuwula taŋ mi le da hay taŋ, yo ziri taŋhay a sa ndiram ati taŋ.

²⁴Ɓa a sa zilikiy tikeˀe na, naɓa i zila taŋ mi le si, ɓa a sa ɓam tikeˀe kwana, i cine taŋ di le si.

²⁵Kiriɓuh ati zuŋ tumuŋ a sa zumam arleˀe, mobor a sa zum giziŋ kaɓa sla, Ngi kawa, murɓuk a sa gi i ɗaf naŋ. Ɓi malambaˀ ati hiryi gwatay, anta sa gam a muwã ɗu mipal na ta. Maɓi hana i ya Bumbulvuŋ.