Read South Giziga ISA 66 Bible Online

ISA 66 - South Giziga bible

ISA 66

¹Ya Bumbulvuŋ i ɓi na: «Muŋ i li cifi ɗu ngi buy, yo hirwuy i li ɗuva sar ɗu. Ki sa ndirikiy hay mi da ya ka? I li wana mindila ter ngi muska vu ɗu ka?

²Yo ma na, gwat misi titirihey, kum mapuraka taŋ gar na, i ya miga taŋ ti haŋ ɗu, yo i ngayahay gar. Ya maɗuv hiri taˀ na, ng'ar mbur muvuso, mbur misi ar bonoy, ng'ar mbur mazluwun ti mingiɓi ɗu. I ya Bumbulvuŋ maɓi.

³Ɓa ngi giy mikuli na, mizli a kiɗam sla, na a kiɗam mbur ngi giy di ti naŋ ma. A slam ˀay ngi tumuŋ, na a kiɗam kiri ma. A gigikiy mikuli ti gwat ngi migam, amma a gikiy di ti pumbus ngi fedeme ma. A wurikiy urdi ɓa i ɗuwula taŋ mi, amma a ɗuvaka hirnga da kuli maso taŋ ti mendere na ma. Mizli tayna a sipam di i jiviɗ taŋ mawuɗam, yo hiri ara cira taŋ ti gwat malambaˀ taŋ mukuyta wãˀhay na.

⁴Ya kwana, i wuɗ i pula taŋ mbak da may gwat taŋ manja wuluk na, yo i sa ga ɓa gwat mamuɗa taŋ didak a diɗ nga hirnga taŋ. Asi mike na, i zila taŋ le ngbaŋ, amma mbur miziliy mi ko pal anta, i ɓa taŋ le ngbaŋ, amma mbur miciniy di ko pal anta, dar a gam gwat ya mapura kuyta, gwat maciriy hiri ta na, a wunam nga taŋ i nah jaka.

⁵Kum mizli majijikam ti mingiɓi nga ya Bumbulvuŋ na, cinaka mingiɓi, ya maɓukum di ani: Sukum kumoy mahirsukum, yo maɓulukum avra vur ya na, a ɓam ani: «Anja ya Bumbulvuŋ i biga dudok ɗu, yo anja ɓa a puraka zluzluɓ kumo kini.» Na masa pam mesem i taŋ vuna jaka.

⁶Zuwen kumo, cinam ˀay macino baɗ tir walahay, ˀay mabo zle tir hay nga ya Bumbulvuŋ na. I ˀay nga ya Bumbulvuŋ: gi gwat ngi mesene ɗuwoy na, i wurka taŋ di.

⁷Zeruzaleme, ɓa kwacay a sa jaŋ tikeˀe na, a yi le si, ɓa bonoy ngi yi a sa lumaŋ tikeˀe na, a yi mangal mizile le.

⁸Micin ɓi ngi gwat kanah ɗaˀ i waka? Mupur gwat misi kahana ɗaˀ i waka? Hirwuy a ɗuf gu ar hin purla si kwa? Sukwi a ɗuf taˀ kutum kine sar purla si kwa? Na Siyoŋ, ɓa a si bonoy tikeˀe na, a yi le si mbrike?

⁹Ya Bumbulvuŋ i ɓi na, da i wuna jiviɗ le, ɓa a ya ka mburo ma na, anta sa ya ka mata kwa? Maɗiya jiviɗ ngi yi mbur i ya ma na, i tika ɓa a ya ka mata mbri mbri maka? Maɓi i ya Buymisemuŋ ɗiki.

¹⁰Kum mizli gar mawuɗam hirwuy Zeruzalem na, mumulom a seˀeŋ, zluzluɓam vurˀeŋ. Kum gar mutuwaka vagay naŋ na, wurenna, mumulom haɗa haɗa jom bummo.

¹¹Ɓa ki saka ɗuwa naŋ mavul gidaŋ na, kaɓa ziri gazahay masam ɗuwa a didak mumuŋ taŋhay, yo ɓa ki mbam, hiri a curukum ti ɗuwa naŋ mujõh jõh na.

¹²Asi ya Bumbulvuŋ i ɓi na: «Ani i wuɗ i ga ɓa zuy a gi a Zeruzaleme, kaɓa mizaw misi yam naŋ masli sleˀ le ta, yo i sa ga ɓa dudok ngi sukwi ngi mizli a ndir ar naŋ, kaɓa mekepel mazuɓu. Naŋ a sa vulukum ɗuwa, a sa lupukum a duba, waɗ a sa cufukum kutuk kutuk ar sar.

¹³Haˀaw, zuŋ mumuŋ matikinaŋ ɓa a taˀa tuwuyo na, ya kwana, i sa tikinukum kanah ya, li tikin kum ngi taˀa tuwuyo, naŋ a Zeruzalem.

¹⁴Ti hin nah na, kisa mumulom a mevel kumo, yo tesl ngi dumvu kum a sa gi selek, kaɓa giziŋ ti hin ngi vuŋ migi le. Ya Bumbulvuŋ i sa biga gidaŋ ɗu da gawla ɗuwoyo, amma mevel a sa jiy ar mesene ɗuwoyo.

¹⁵Asi mike na, ya Bumbulvuŋ, i ra sawa ani: i ra sawa ti himaˀ fõh fõh ka vu, mota ngi vurum ɗuwoyo, kaɓa burkataŋ. I sawa ɓa ngi ɗiya ɓi ngi mevel majiy na ti himaˀ, yo ɓa ngi guco mi da mizli ti irne vu njilim njilim.

¹⁶Naŋ kanah, ya Bumbulvuŋ i sa ga kiita da mizli gara, ti vu waɗ ti maslalam kaw a haŋ. Ya Bumbulvuŋ i sa kiɗ mizli haɗi vagay vagay.

¹⁷Mizli mawuɗam, anja taŋ pal, yo a bunaka dili taŋhaya hĩˀĩ, ngi ci ng'ar jarnehey, yo a cicam a dirba mbur mudumbuŋ misi a wuzla, waɗ mizli mazumam useˀ ngi fedem, ngi gwat misãmi mukuyta wãˀhay, waɗ mahumbuɗam kotokomoy na, taŋ jom gar taŋ a sa micam. I ya Bumbulvuŋ maɓi.

¹⁸Gwat ngi gi taŋ ati wuluk taŋ gar na, ya Bumbulvuŋ i si na le. I so na ngi kuso sukwi ngi mizli gar, maɓam ti mi wal wal gar, a sa soko, a puraka dudok ɗu.

¹⁹Naŋ kanah, i sa cici gwat mabigi gwat a wuzla taŋ, waɗ ma na, mizli mindiram le ti siifa asi ruwuy taŋ na, i sa slina taŋ ng'avu sukwi ngi mizli ngi Tarsisey, ngi Putoy, waɗ ngi Lutoy, misinaka hila lek le. Yo i sa slina taŋ ng'avu sukwi Tubal, sukwi Yavaŋ waɗ ng'avi mizli ngir matura mikileŋhey. I mizli micinam ɓi ɗu ɗaˀ ta, mupuraka dudok ɗu ɗaˀ ta ma. Taŋ a sa tilam mi ti ɓi ngi dudok ɗu a wuzla sukwi ngi mizli.

²⁰Ya Bumbulvuŋ i ɓi na: «Sukum kumoy gar misi a wuzla sukwi ngi mizli zleˀe na, mizli a sa moko taŋ nga gi mikuli da ya Bumbulvuŋ. A soko taŋ joˀ ar pilisey, ar mota ngi vurumoy, ar cacalahay, a duba zungu pilisey waɗ a duba zlogomohoy, hã sesẽŋ a muwã ɗu mipal a Zeruzalem. Taŋ masa soko taŋ gar na, kaɓa Israyeley masa soko ti mikuli ngi gwat ngi migam ar taasa mibi ti dili naŋ le avra, ng'ar hay nga ya Bumbulvuŋ.»

²¹Ya Bumbulvuŋ i ɓi na: «I sa wini masayay, waɗ Levihey a wuzla taŋ vuna.

²²Naŋ kanah, muŋ nawaya ati hirwuy nawaya, ya masa ga taŋ na, a sa ndiram ngi wãˀ a mbuŋ ɗu, yo dideˀ kumoy ati slimiɗ kum kwana, a sa ndir ngi wãˀ a mbuŋ ɗu ya. I ya Bumbulvuŋ maɓi.

²³Dar mizli gar a sa soko hurkom huruk huruk a mbuŋ ɗu, ya Bumbulvuŋ, vur kiya vur kiya, yo vur hin ngi sabat, vur hin ngi sabat.

²⁴Ti mizli masa bam tir walahaya na, a sa puraka vagay ngi mizli mislikiɗam ɓi avu ya na. Mumuyuŋ masa zuma taŋ na, anta sa muc ta, vu mawura taŋ kwana, anta sa muc ta. A sa tiram i gwat mukuyta wãˀ ngi puroy a mihiri ngi mizli ngi si ruwuyoy keɗeɗe.»