Read South Giziga ISA 8 Bible Online

ISA 8 - South Giziga bible

ISA 8

¹Bumbulvuŋ a ɓiy: «Zuɓ beleler madiɗa, toho gwat ani ara nguɗ nguɗ ti milngama. Toho na: ‹Kutum, ara tuɓoko gwat ngi lum ar vurumo, wusam vu, ara voko gwat ngi mesene kumoyo.›»

²Joˀ i biga gwat mutoho tuwa da mizli cuw ɓa a gam sedewo. I mizli mindilaka le gisiŋ: i ti masay Uriya, ati Zakari, mangal ngi Yeberekiya.

³Mijiviɗ ngwasa, i gi di ngwas. A gi hur, a yi mangal mizile. Bumbulvuŋ a ɓiy: «Caŋ slimiɗe ‹Kutum, ara tuɓoko gwat ngi lum ar vurumo, wusam vu, ara voko gwat ngi mesene kumoyo!›

⁴Asi mangala, dumbuŋ ɓa a sa si na zila ‹Baha› ati ‹Maha› na, a sa soko ti zlili ngi Damas ati gwat mitiɓa ar vurum a Samari nga mbuŋ buy Asiri.»

⁵Bumbulvuŋ a ɓiy ani ma:

⁶«Yam maɓul ar zlazlar ngi Silowe na, mizli Zudahay anta wuɗam ta, yo ma cira taŋ hiri i ɓi ngi buy Resiŋ ati Peka.

⁷Vurˀe, yam mihaɗa, maɓul ti gidaŋ ar mizaw Efrata, mbiɗeˀvra Buy Asiri ti dudok naŋ wãˀa, Bumbulvuŋ a sa ga ɓa a ɓul ng'ar Zudahaya. Mizaw madiɗa Efrata a sa zuɓvra vra, hã a tuwuɗa mibuzugumo.

⁸A sa zuma hirwuy Zuda rekrek, a sa tuwuɗa mibuzugumoyo, a zuɓvra vra, hã giw ti ˀay. Aw Emanuwel! Mihaŋ naŋhay maɓulomo, a sa naha hirwuy ɗike zlar.»

⁹Mizli, jijikam, ɓurzlam ti zluwun. Mizli ngi ruwuy mikileŋhey, jikam slimiɗe. Da ko ki juwam vu le ngi gi vurum kwana, didak a sa muɗukum. Haˀaw, da ko ki juwam vu le ngi gi vurum kwana, didak a sa muɗukum.

¹⁰Da ko ki juwam vu le ngi gi gwat nga mbuŋ kwana, a sa hiryi loɗoy loɗoy. Da ko ki ɓam ɓi le kwana, gwat nah anta sa gi ta. Asi Buymisemuŋ naŋ da ati ndra.

¹¹Haˀaw, ti gidaŋ ngi Bumbulvuŋ muso ar ya na, a ɓiy ɗaˀ ɗaˀ le, ɓa gwat mizli Zuda tayna magaka na, i sipa sar taŋ ta. A ɓiy na:

¹²«Mizli tayna mazilam gwat gar ‹gidiɓi, gidiɓi› na, kumo ki zilaka taŋ ‹gidiɓi› ta. Gwat taŋ mazluwunam di na, kumo ki mam murdirba vurˀe ta, ki zluwunam di kər kər ta.»

¹³Ki sa sinam mbur mipala , i ya Bumbulvuŋ, misi gidaŋ wãˀ tewle. Ki sa mam murdirba sey ti ya, kisa zluwunam kər kəre sey ti ya.

¹⁴Ya Bumbulvuŋ, avu sukwi mucuw ngi Israyeleye, i sa tiri hay, yo mana, yi ɗugur ngi bi sar, yi mandazlay ngi hizigiɗa mbur. Avi mizli Zeruzalemeye, i sa tiri zuva, yo kwara ma.

¹⁵Mizli haɗa a sa bam sar ti naŋ, a ndilam, a ngilam, a sa cam ng'ar kwar, a ja taŋ.

¹⁶Wi vu ti mingiɓi hana weˀ, dubun hana i sa slirɓa mi naŋ sliraɓ sliraɓ, i sa ɓa sey da mizli ngisi yahay.

¹⁷Bumbulvuŋ maɗumo mihiri naŋ avu dideˀ ngi Zakopoy na, i ra kutukoŋ, i ra njih hiri aseˀeŋ.

¹⁸Ya vuna ati ziri Bumbulvuŋ miviliy taŋ na, avu Israyeleye, ndr'i gwat mabigam gwat, ndr'i mingiɓi muso tivi Bumbulvuŋ, misi gidaŋ wãˀ, misi hay naŋ a muwã Siyoŋ.

¹⁹Yo mizli mekelemey a ɓam: «A ram ng'avu mupura daˀasay masisikam ˀay, yo maɓam ti mi yaŋ yaŋ, ar gwat masa gi tumbuŋ. Mizli ada puraka kuli taŋhaya ta kwa? Yo ada puram mulvuŋhoy vur mizli misi ti siifahaya takwa?» Da ara ɓukum kanah,

²⁰kisa mbiɗaka taŋ di: «Moko ng'ar dubun ati mingiɓi ngi Bumbulvuŋ.» Da a cinaka mingiɓi hana ta na, li anta sa wun ti taŋ ta.

²¹Mizli a sa ngiraka ruwuyo, a giram le kupuyah kupuyah, yo may a sla taŋ zlambar le. May maja taŋ tuwa na, a sa jam mevel, a nisaka buy taŋ ati Buymisemuŋ taŋ. A sa mbuɗam hiri nga muŋ,

²²waɗ a sa puram hiri ng'asi ruwuy. Keɗ na, bonoy ati luvuŋ waɗ li mititim titim, duvuɗ manja li a pur feŋ.

²³Amma, hirwuy didak mamuɗaŋ zleˀe na, a sa bo tir luvuŋ. Hirwuy Zabiloŋ ati hirwuy Neftali, Bumbulvuŋ a pa taŋ mesem le haɗa. Amma tumbuŋ na, jiviɗ miɓaˀ a mubuliy, hirwuy misi tir vay pas ngi miprik ngi Zurdeŋ waɗ hirwuy mulakay na, a sa ga taŋ ɗongor.