Read South Giziga LEV 10 Bible Online

LEV 10 - South Giziga bible

LEV 10

¹Ziri ngi Aroŋhoy, Nadap ati Abihu, mbur gar a zuɓa taasa naŋ meciɗek ngi zluma urdi, a kam zayvu angi taŋ waɗ a pam urdi angi taŋ. Naŋ kahana, a ram ti vu muho gar nga mbuŋ Bumbulvuŋ. Jiviɗ ngi gi kanah anta ngbaŋ.

²Akẽh na, vu a bo ti mbuŋ Bumbulvuŋ, a zuma taŋ kap, waɗ a micam daˀ a mbuŋ Bumbulvuŋ vuna si.

³Moyis a ɓa Aroŋ na: «Bumbulvuŋ a ɓa le ngbaŋ takwa! A ɓi na: ‹Mizli makirohoko ng'avi ya na, anja a purikiy, ya pal , yo a mihiri ngi mizli gar na, yi wuɗ anja a gikiy dudok.›» Aroŋ a ndir lek.

⁴Amma Moyis a zila Mikayel ati Elisafaŋ, ziri ngi Uziyeley. Uziyel i jamba ngi Aroŋ, Moyis tuwa, a ɓa taŋ: «Kirohoko! A ram, bam ti vagay ngi sukum kumoy avra tir li mipala nga duba gala.»

⁵Ti Mikayel ati Elisafaŋ mikiraham ng'avi Moyise na, a bam ti vagay ngi sukum taŋhay tuwa, ti jibe taŋhaya kine nga duba gala, kaɓa Moyis miɓa taŋ di tuwa.

⁶Dar Moyis a ɓa Aroŋ ati ziri naŋ mizile mekelemey, Elazar ati Itamara «Ki pulaka ngwic hirnga kumoyo slipicak slipicak ta, yo ki ngiraka zanahaya kaɓa ki roko ti tuwuy a hiri ta. Da kine na, kisa micam, yo kisa soko ti himaˀ ngi Bumbulvuŋ nga hirnga zigiduw gar. Mizli, Bumbulvuŋ mizlizlira taŋ ti vu na, masa tuwaka taŋ i sukum kum Israyeley gar.

⁷Kumo, ko ki pulaka mizlingre ngi guɗuk ngi zlir ti Buymisemuŋ na mbak le ta, vur kum mamicam. Asi mike na, a pukum mal ngi Bumbulvuŋ ngi vula slra le.» Ti Aroŋ ati ziri naŋhay a gaka le kasl kasl kaɓa Moyis miɓa tuwa.

⁸Bumbulvuŋ a ɓa Aroŋ:

⁹«Aroŋ, ka ati ziri ɗikeye, dumbuŋ ɓa kum masa cam ng'ar guɗuk ngi zlir ti ya Buymisemuŋ na, mbaazla malla baraasa gar na, ko kisam ta, ɓa kanah na, kisa micam. Hana avu kumo, i ɓimujuwa mambiɗi ta, hã avu dideˀ kumoy nga mbuŋ nga mbuŋ.

¹⁰Hana ɓa ngi wuɗuka wala ngi gwat mipal ati gwat muho gar, gwat misi dili ati gwat manja dili.

¹¹Waɗ ma na, ɓi micicahay, ya muvula taŋ da Israyeley ti haŋ Moyis na, ɓa a dubunaka taŋ di gar taŋ.»

¹²Moyis a ɓa Aroŋ ati ziri naŋhaya: Elazar waɗ Itamar mindirama: «Hapa ngi sedege, mihilam ava ngi zlum da ya Bumbulvuŋ tuwa, is naŋ na, zuɓaka, dam di ɗaf manja ˀis araŋ. Zumaka daˀ a ciki li gi mikuli vuna si, asi i gwat ngi zum mipal wãˀ.

¹³Peŋ ngi sedege nah na, kisa zumaka angi li mipal , asi gwat ngi zum mizlam zlam wãˀ da Bumbulvuŋ na, mi ngi kum ati ziri ɗikey anga na i nah. Hana i mingiɓi ya mulumo di ti vu Bumbulvuŋ.

¹⁴Didak ati tuwal ngi ginewey migam taŋ mikuli da Bumbulvuŋ, ɓa ngi ngiɓiˀay, yo muvulaka taŋ da Bumbulvuŋ ti gi mezegwel ngi vula gwat a mbuŋ Bumbulvuŋ na, sey ki zumaka taŋ ar li manja dili, ka ati ziri ɗik mizilehey waɗ mongosohoyo. Mikuli ngi ngiɓiˀay Israyeley migaka da Bumbulvuŋ na, ka ati ziri ɗikeye, mi ngi kum anga i nah.

¹⁵Tuwal mipaw ati didak ngi ginew ngi gi mikuli, migam taŋ mezegwel ngi vula gwat a mbuŋ Bumbulvuŋ na, masayay a ram taŋ jom ati li misi mal ngi zlumoyo, ɓa a vulaka taŋ da Bumbulvuŋ ti gi mezegwel ngi vula gwat a mbuŋ Bumbulvuŋ. Naŋ kine, useˀ tayna, i mi ngi ɗik waɗ ngi ziri ɗikeye caˀa, kaɓa Bumbulvuŋ miɓa ɓi nah ɗaˀ le.»

¹⁶Bazuway, mizli muvulaka ngi gi mikuli ngi pula mungra tuwa, Moyis a cine na, a fukoko le. Moyis a ji mevel ar Elazar ati Itamar, ziri ngi Aroŋhoy mindiram tuwa. Joˀ a cufuɗa taŋ:

¹⁷«Useˀ migam di mikuli hana, ki humbuɗaka angi li mipal ta vur mike? Asi mike na, useˀ nah, naŋ pal wãˀ, Bumbulvuŋ a vulukum di ɓa ngi pula mungra ngi jum ngi Israyeley, yo ɓa ngi ga mezegwel ngi pula mungra.

¹⁸Pumbus ngi ginew nah vuna, ki ram di ndol le a hur li mipala ta, anja ki zumaka useˀ naŋ ar li mipal zleˀe, kaɓa ya muɓukum ɓi nah ɗaˀ le na.»

¹⁹Aroŋ a mbiɗa da Moyise: «Cina ɗi, tapas Israyeley migaka mikuli taŋ da Bumbulvuŋ, mikuli ngi pula mungra ati mikuli mizlam zlam wãˀ na, wuluk muso a hirnga ɗu ani: Gwat magam di mikuli ngi pula mungra na, ɓa i zuma useˀ naŋ angi hin hana na, Bumbulvuŋ a sa hĩyã kwa?»

²⁰Mi ngi Aroŋ mimbiɗaŋ di hana, Moyis a hĩyã le.