Read South Giziga LEV 15 Bible Online

LEV 15 - South Giziga bible

LEV 15

¹Bumbulvuŋ a ɓa Moyis ati Aroŋ:

²«Ɓaka Israyeleye na: Da kaɓa mbuŋ ngi mbur mizile, ara ɓulo gwat na, naɓa gwat maɓulo nah vuna, a tiri di le i mbur misi dili.

³Da ko mbuŋ naŋ na, ara ɓul malla ara disl ti disl kwana, naɓa naŋ ti dili na si. Gwat maɓulo ti mbuŋ naŋ na, gwatay naŋ matiri taŋ i misi dilihey na, ani:

⁴Mbur misi mbuŋ naŋ maɓul na, arngawo, naŋ mihin le ara gar na, naŋ ti dili, yo gwat naŋ micifi le ara gar na, naŋ ti dili.

⁵Mbur mija haŋ le avu arngawo nah gar na, sey a buna zana naŋhaya, naŋ vuna a bun ceɗ ceɗe, amma a ndir ti dili hã pastaˀa.

⁶Mbur misi mbuŋ maɓul na, gwat naŋ micifi le ara, da mbur mekelem a cifi le ara ya na, sey mbur nah a buna zana naŋhaya ceɗ ceɗe, naŋ vuna a bun, amma a ndir ti dili hã pastaˀa.

⁷Mbur misi mbuŋ maɓul na, mbur mija haŋ le avu dumvu naŋ na, sey a buna zana naŋhaya ceɗ ceɗe, naŋ vuna a bun, amma a ndir ti dili, hã pastaˀa.

⁸Mbur misi mbuŋ maɓul na, da a tufa tazlay le da mbur manja dili na, sey mbur nah a buna zana naŋhaya, naŋ vuna a bun, amma a ndir ti dili hã pastaˀa.

⁹Mbur misi mbuŋ maɓul na, sarde ngi pilis, naŋ micifi le anga ngi zuɓa mulak gar na, naɓa naŋ ti dili.

¹⁰Gwat misi asi virzi ngi mbur nah gar, ko waka gar mija haŋ le ava na, naɓa mbur nah naŋ ti dili, hã pastaˀa. Mbur mijijira gwat nah le na, sey a buna zana naŋhaya, yo naŋ vuna kwana a bun, amma a ndir ti dili, hã pastaˀa.

¹¹Mbur misi mbuŋ maɓul na, naŋ mija haŋ le avu mbur gar, manja a buna haŋ na, sey mbur nah, a buna zana naŋhaya, naŋ vuna a bun, amma naŋ da ndir ti dili, hã pastaˀa.

¹²Gwat mindira ti hohoy gar, mbur misi mbuŋ naŋ maɓul mija haŋ le ava na, sey a wahaka avra, amma da i gwat miciɗa ngi dum na, sey a bunaka ti bun ceɗ ceɗe.

¹³Mbur misi mbuŋ maɓul tuwa, da ɓul naŋ a cici le na, a kutuk hin tarnaˀ, zle avu hin ngi ɗiyi naŋ na, a buna zana naŋhaya, yo naŋ vuna a bun ar yam miviɗiviɗi. Akẽh na, dili naŋ a zuɓ le avra muduba.

¹⁴Angi hin midangafaɗ naŋ na, a hil gonokoy cuw malla ɗiyuw dirgwaɗay tap cuw, aru taŋ nga mbuŋ ɗu, ya Bumbulvuŋ, ɓa a vula taŋ da masay, a mizlingre guɗuk ngi zlir ti ya.

¹⁵Ɗiyuw pal mekeleme, masay a gi di mikuli ngi pula mungra, yo mipal numuŋ kwana, a gi di mikuli mizlam zlam wãˀ. Dar masay a ga mezegwel ngi vula jiviɗ ngi pula mungra ngi mbur tuwa, a mbuŋ ɗu.

¹⁶«Da kaɓa mburo, a musuwun, vu a bo le na, sey a bun ceɗ ceɗe, yo a ndir ti dili, hã pastaˀa.

¹⁷Zana wanaka gar malla garak wanaka gar, vu ngi mbur tuwa migi le ava na, sey a bunaka ceɗ ceɗe, amma a ndiram ti dili, hã pastaˀa.

¹⁸Da mbur mizile a hin le ti ngwas na, sey taŋ cuw taŋ a bunam ceɗ ceɗe, amma a ndiram ti dili, hã pastaˀa.

¹⁹Da nguf muluma ngwasa le, pumbus ara ɓulo ti mbuŋ naŋ na, naɓa a tiri le naŋ ti dili hã hin tarnaˀa. Mbur mija haŋ le ava na, naɓa a ndir ti dili hã pastaˀa.

²⁰Ngwas nah, gwat naŋ mihin le anga gar na, naŋ ti dili, yo gwat naŋ micifi le anga gar na, naŋ ti dili.

²¹Mbur mija haŋ le avu arngawo naŋ na, sey mbur nah a buna zana naŋhaya ceɗ ceɗe, naŋ vuna a bun, amma a ndir ti dili hã pastaˀa.

²²Gwat, ngwas nah micifi le anga, da mbur a ja haŋ le ava na, sey a buna zana naŋhaya, naŋ vuna a bun, amma a ndir ti dili hã pastaˀa.

²³Gwat misi ar arngawo naŋ malla gwat misi ar li naŋ micifi le anga, da mbur mija haŋ le ava na, naɓa mbur nah, a ndir ti dili, hã pastaˀa.

²⁴Da kaɓa mbur ara hin di, da pumbus naŋ na, a ɓulawa, a njuf le avu mbur tuwa na, naɓa mbur nah, a ndir ti dili hã hin tarnaˀa, yo arngawo, mbur nah mihin le anga gar na, naŋ ti dili.

²⁵Da kaɓa ngwasa, pumbus ara ɓulo ti mbuŋ, hã hin mbeˀ mbeˀe, mbak hin ngi juw naŋ na le, malla pumbus ara ɓulawa, hã a tuwuɗa hin ngi juw naŋ na, naɓa ar hin ngi pumbus maɓul nah gar na, naŋ ti dili, rak rak ati hin naŋ misi ti nguf zleˀe na ma.

²⁶Da pumbus a wi mi ta na, arngawo, naŋ mahin anga gar malla gwat naŋ macifi anga gar na, naŋ ti dili, rak rak kaɓa naŋ misi ti nguf zleˀe tuwa ma.

²⁷Gwat tayna, mbur mija haŋ le avu taŋ na, naŋ ti dili, sey a buna zana naŋhaya ceɗ ceɗe, naŋ vuna a bun, amma a ndir ti dili hã pastaˀa.

²⁸Ngwasa, da pumbus naŋ maɓul tuwa, a kiɗ mi le na, a sluf hin tarnaˀa, naɓa dili naŋ na, a zuɓ le avra.

²⁹Angi hin midangafaɗ naŋ na, a hil gonokoy cuw malla ɗiyuw dirgwaɗay tap cuw, aru taŋ da masay a mizlingre guɗuk ngi zlir ti ya Buymisemuŋ.

³⁰Ɗiyuw pal mekeleme, masay a gi di mikuli ngi pula mungra, yo mipal numuŋ kwana, a gi di mikuli mizlam zlam wãˀ. Dar masay a ga mezegwel a mbuŋ ɗu, ya Bumbulvuŋ, ngi vula jiviɗ ngi pula mungra vur pumbus naŋ muɓul, mitiri di i misi dili tuwa.

³¹Israyeleye, da taŋ muroko ti dili na, ki ɓa taŋ a cicam baˀ murvay. Kanah na, t'anta sa micam asi taŋ misi ti dili na ta, yo t'anta sa micam vur taŋ mihiryaka guɗuk ɗu misi a wuzla taŋ na ta.

³²Mbur misi gwat ara ɓulawa ti mbuŋ naŋ, yo mbur mumusuwun, vu a bo le, matiri di naŋ ti dili gar na, dubunoy vurˀe, i hana.

³³Naŋ vur ngwas nguf mulumaŋ le malla mbur zil gar gwat maɓulawa ti mbuŋ, waɗ vur mbur mahin ti ngwas misi dili ma gar.