Read South Giziga LEV 2 Bible Online

LEV 2 - South Giziga bible

LEV 2

¹Da mbur a wuɗ le ɓa a so ti gwat ngi gi sedege da ya Bumbulvuŋ, i gwat ngi migam na, sey a hil hapa, a pi mal sekke angaŋ, waɗ mukuturɓuy ngi zlum ti zlum sek angaŋ,

²ar di da masayay, ziri ngi Aroŋhoy. Hapa mipam mal ara tuwa na, masay a hil ngbal haŋ kuy kuy, waɗ mukuturɓuy ngi zlum ti zlumo paɗ wãˀa. Gwat ngi sedege nah na, a zilaka ‹wuluk keŋ›. Hana i sedege mizlam zlam wãˀ, misi zĩˀĩ naŋ a tisliy mevel da ya Bumbulvuŋ.

³Gwat migam di sedege tuwa, mindir is naŋ da Aroŋ ati ziri naŋhay. Hana i gwat mipal wãˀ. Asi a bo tivi gwat ngi zum mizlam zlam wãˀ da ya Bumbulvuŋ.

⁴Gwat ka maso di ngi vul da ya Buymisemuŋ, da i maɗaf manja is ara mida ar li di ɗaf na, sey i mufukuɗa ti mal waɗ tos tos ar vu malla i helelem mikefer kefer, waɗ pay pay mal ava.

⁵Da gwat ngi vul ngi gi sedege i mususulo ar ɓiri muputikay na, sey i hapa manja ˀis ara, mufukuɗa ti mal.

⁶A ngilaka le ɓuluˀ ɓuluˀ na, a pakaŋ mal, naɓa i sedege ngi gwat ngi migam.

⁷Da gwat ka mavula ngi gi sedege i mida ti magayak muputikay na, sey a lihiɗaka hapa nah ti mal.

⁸Gwat ngi sedege ka milihiɗa kanah ngi vul da ya Bumbulvuŋ tuwa na, ki ru di da masay, dar naŋ kwana a kirih di ng'ar li gi mikuli.

⁹Masay a wuɗ cah avu gwat ngi sedege mazilaka ‹wuluk keŋ› tuwa, a wura ar li gi mikuli. Hana i gwat ngi zum mizlam zlam wãˀ, misi zĩˀĩ naŋ a tisliy mevel da ya Bumbulvuŋ.

¹⁰Gwat ngi vulo, is naŋ a ndir da Aroŋ ati ziri naŋhay. Nah na, i gwat mipal wãˀ, asi a bo tivi gwat ngi zum mizlam zlam wãˀ da ya Bumbulvuŋ.

¹¹Gwat muvula ngi gi sedege da ya Bumbulvuŋ gar na, anja i manja ˀis araŋ. Naŋ kine, gwat kum mavulaka ngi zlum da ya Bumbulvuŋ na, ki gam ˀis malla mam ara ta ndiɗaˀ si.

¹²Gwat micikiɗeffe ngi migam kumoyo, ki soko taŋ ngi vul da ya Bumbulvuŋ ɓula. Amma li zluma gwat ngi vul da ya Bumbulvuŋ, ɓa zĩˀĩ naŋ a tisliy mevel na, anta zlumaka micikiɗeffe ngi gwatay ara ta.

¹³Gwat ngi migam ngi vul da ya Bumbulvuŋ gar na, sey ki gam mandaŋ geˀ le angaŋ. Gi mandaŋ nah na, ki puraka kaɓa ɓi ngi sefel ta, asi mandaŋ a bigi jumoˀay nga ya Bumbulvuŋ ati kum. Gwat ka mavula da ya Bumbulvuŋ gar na, sey ti mandaŋ aseˀeŋ.

¹⁴«Gwat ngi vul kum, ngi sedege da ya Bumbulvuŋ, da i gwat micikiɗeffe ngi migam na, sey ki soko di i hirnga ngi daw mufuko naŋ fok fok waɗ yeˀ yeˀ le.

¹⁵Ki sa pakaŋ mal pulaˀa, waɗ mukuturɓuy ngi zlum ti zlum sek araŋ. Hana a tiri le i gwat ngi vul mubo tivi gwat ngi migam.

¹⁶Mineˀ muwuɗam avu daw mingirwa, avu mal waɗ mukuturɓuy paɗ wãˀ tuwa na, masay a wura ar mikuli mazilaka ‹wuluk keŋ›. Hana i gwat ngi zum mizlam zlam wãˀ da ya Bumbulvuŋ.»