Read South Giziga LEV 20 Bible Online

LEV 20 - South Giziga bible

LEV 20

¹Bumbulvuŋ a ɓa Moyise na:

²«Ɓa Israyeleye: mbur Israyel malla moholoy micifi le angi hirwuy Israyel, da a gi mikuli le ti zuŋ naŋ da kuli Molek na, a sa kiɗaka vagay. Mizli ngisi ruwuyoy masa kuyupaka ti ɗugur.

³Ya vuna, i sa zuɓ himaˀ ar mbur nah. I sa gwahaŋ avra ti wuzla mizli naŋhaya, asi naŋ muvul zuŋ naŋ da kuli Molek, naŋ muso ti dili ng'ar hay ɗu, waɗ naŋ mihirya slimiɗ ɗu mipal na.

⁴Mbur muvula zuŋ naŋ da kuli Molek tuwa, da mizli ngisi ruwuyoy ara puraka kinihhẽ, asi a wuɗam ɓa a kiɗaka vagaya ta na,

⁵ya ti hirnga ɗu, i sa slikiɗ himaˀ ng'ar mbur nah, ng'ar muy naŋhaya ma, yo i sa gwaha taŋ ti wuzla mizli taŋhay avra, naŋ vuna ati mizli ngiseˀehey mahuruk hurukam a mbuŋ kuli Moleke gar.

⁶Mbur maɓi ɓi ati kulihey ti daˀas, ko ti jiviɗ wanaka gar na, i sa mbiɗi pulaˀ ng'araŋ, yo i sa gwahaŋ ti wuzla mizli naŋhay avra.

⁷Zuɓaka dili kumoy avra, ɓa ki ndiram pal, asi Bumbulvuŋ, Buymisemuŋ kumo i ya.

⁸Ɓimujuwa ɗuwoyo, jaka taŋ a hirnga, gam taŋ slra. I ya Bumbulvuŋ matiri ti kum, kum pala.

⁹Naŋ kanah, da mbur ara za cine malla mumuŋ na, a kiɗaka vagay. Pumbus naŋ a mbiɗi nga hirnga naŋ, asi naŋ miza miyi naŋhay na.

¹⁰Da mbur a hin le ti ngwas ngi mbur cil naŋ na, a kiɗaka taŋ vagay vagay cuw taŋ, mbur mizile ati ngwasa.

¹¹Da mbur a hin le ti ngwas ngi cine na, kite a pura mbuŋ ngi cine le. A kiɗaka taŋ vagay vagay cuw taŋ. Pumbus taŋ a mbiɗi nga hirnga taŋ vuna tehhe.

¹²Da mbur a hin le ti dideˀ naŋ, ngwas ngi mangal naŋ na, a kiɗaka taŋ cuw taŋ vagay vagay, asi a gam di i gwat mukuyta wãˀ. Pumbus taŋ a mbiɗi nga hirnga taŋ.

¹³Da mbur zil, a hin le ti mbur zil cil naŋ, kaɓa mahinam ti ngwas na, gwat taŋ migaka cuw taŋ na, i gwat mukuyta wãˀ. A kiɗaka taŋ vagay vagay. Pumbus taŋ a mbiɗi nga hirnga taŋ.

¹⁴Da mbur a zuɓ ngi ngwasa, i ngwas vuna zlaɓ ati zuŋ naŋ na, naɓa i gwat ngi mesem. Mbur vuna ati ngwasaya cuw taŋ, a wuraka taŋ ar vu. Kanah na, naɓa gwat ngi mesem anta sa gi a wuzla kumo mata.

¹⁵Da mbur a hin le ti gwat misãmi na, a kiɗaka vagay, yo gwat misãmi vuna kwana, a kiɗaka vagay aya.

¹⁶Da ngwas a kirih le ng'avi gwat misãmi, ɓa gwat misãmi vuna a cufaŋ na, a kiɗaka ngwasa vagay, waɗ gwat misãmi vuna ya. Pumbus taŋ a mbiɗi nga hirnga taŋ.

¹⁷Da mbur a zuɓ ngi ngwasa i sukum naŋ mongoso, miya mandaf mandaf malla ngi wazlaray, a pura mbuŋ ngi zuŋ le, yo zuŋ kwana a puraŋ mbuŋ naŋ le na, i gwat mukuyta wãˀ. A sa gwahaka taŋ avra, a mihiri ngi mizli taŋhaya. Mbur mizile, zayɓi ngi malambaˀ naŋ na, a ndir a hirnga naŋ, asi naŋ mupura mbuŋ ngi sukum naŋ mongoso na.

¹⁸Da mbur a hin le ti ngwas misi ti nguf na, a sa gwahaka taŋ cuw taŋ ti wuzla mizli taŋhay avra, asi mbur mizile mupura mbuŋ ngi ngwasa na, a pura li ngi pumbus mabo ti raˀa na le, yo ngwas vuna kwana, a pura li ngi pumbus mabo ti raˀa na le ya.

¹⁹Mudumunuk, sukum ngi bunuk malla ngi munuko, ki pura mbuŋ naŋ ta. Da mbur a hin le ti muy naŋ tehhe a muŋ na, taŋ cuw taŋ a jijiraka zayɓi nah.

²⁰Da mbur a hin le ti mudumuŋ na, kite a pur di i mbuŋ ngi jamba naŋ malla ngi gumseˀe naŋ. Taŋ cuw taŋ a jijiraka zayɓi ngi mungra taŋ. A micam pam kine, manja a puram hiri ngi zuŋ.

²¹Da mbur a zuɓ ngi ngwasa i ngwas ngi sukum naŋ na, i ɓi ngi dili. T'anta lumam zuŋ ta, asi naŋ mupura mbuŋ ngi sukum naŋ na.

²²Ɓimujuwa ɗuwoy ati sirik ɗuwoyo, jaka taŋ a hirnga, yo gam taŋ slra. Kanah na, naɓa hirwuy, ya maru ti kum nga pi ara na, anta sa ɓulukum avra ta.

²³Sukwi, ya masa ra ɓula t'ani a mbuŋ kum na, ɓimujuwa taŋhaya, ki sipaka taŋ ta. Ya mupura taŋ kuyta wãˀ na, asi taŋ migaka slra tayna gar na.

²⁴Waɗ ma na, yi ɓukum le: ‹Hirwuy taŋ a sa ndir da kum mawakaŋ. Yo mavulukum di da kum ɓa ki waka na, i ya. Hirwuy nah na, ɗuwa ati mam ara ɓulom anga.› Muwunukum a wuzla mizli gar na, i ya Bumbulvuŋ, Buymisemuŋ kum.

²⁵Vurˀe, gwat misãmihey, misi ngi zumoy ati ngi zumoy ta, yo ɗiyuw ngi zumoy ati ngi zumoy ta gar na, slaka wala taŋ. Kanah na, gwat misãmihey, ɗiyuwoy ati gwatay maram digam wenewene a ruwuy gar, ya vuna muwuna taŋ ɓa ki zumaka taŋ ta gar na, sey ki slaka wala taŋ.

²⁶Ndiram avu ya pal, asi ya Bumbulvuŋ, ya pal. Yi wunukum a wuzla mizli gar na, ɓa ki ndiram da ya.

²⁷Mbur mizile malla ngwasa, da a vula vu naŋ le ngi pi daˀas na, a kiɗaka vagay. A kuypaka ti ɗugur, pumbus naŋ a mbiɗi nga hirnga naŋ tehhe a muŋ.