Read South Giziga LEV 21 Bible Online

LEV 21 - South Giziga bible

LEV 21

¹Bumbulvuŋ a ɓa Moyise: Ɓa ziri ngi Aroŋ, masayaya na: «Masaya, da mbur a muc le a wuzla muy naŋhay na, anja a gumbuˀ ng'avi vagay naŋ ta, vur naŋ mandir ti dili.

²Sey da i mbur ngir pumbus purla ati naŋ far: mumuŋ, cine, mangal naŋ, zuŋ naŋ, sukum naŋ mizileŋ.

³Da i sukum naŋ mongoso na, sey da a zuɓ zil ɗaˀ t'aruŋ far. A ci ar dili vurˀe zuy ɓula, asi sukum naŋ mongoso nah na, naŋ anta i ngi mbur mekelem pal a diga t'aruŋ, yo naŋ da a wazlaray taŋ aruŋ ɗagay.

⁴Masay i buy a wuzla sukum naŋhaya, vurˀe, anja a ci ar dili, ɓa a tiri kaɓa mbur ho gar ta.

⁵Ar vagaya, anja masay a hica hirnga teˀe ta, a hica mivay ngi mazlamaya ta, yo a cira dumvu naŋ ta ma. [3]

⁶Masayay i mizli muvulahay le wãˀ da Buymisemuŋ, anja a hiryaka slimiɗ ngi Buymisemuŋ ta. Anja a ndiram ar joˀ taŋ, taŋ pal, asi i taŋ mavulaka gwat ngi zum da Bumbulvuŋ, yo i taŋ mavulaka ɗaf da ya Buymisemuŋ taŋ.

⁷«Ngwas sulome, ngwas mihinam di le ɗaˀ malla ngwas muɓula le na, taŋ a zuɓaka ngi ngwasa ta. Asi masay na, i mbur muvula le wãˀ da Buymisemuŋ naŋ.

⁸Mbur Israyel gar na, sey a pura masaya, naŋ pal, asi i naŋ mavula ɗaf da ya Buymisemuŋ naŋ. Anja naŋ a ndir i mbur mipal avu ka, asi ya Bumbulvuŋ matiri ti kum pal na, ya pal.

⁹«Da zuŋ mongoso ngi masay, a hirya vu naŋ le ti gi sulome na, naɓa a hiryi di i cine, a sa hizigaka ng'ar vu.

¹⁰Masay madiɗa, naŋ i buy a wuzla sukum naŋ masayaya. Asi mike na, a pakaŋ mal ngi vula slra le, yo a cakaŋ le ar slra, ɓa i naŋ maka zana ngi mezegweleye. Vurˀe, anja a pula ngwic hirnga naŋ dibizik ta, yo a ngira zana naŋhaya ta ma.

¹¹Yo anja a gumbuˀ ng'avi vagay ngi mbur ta. Ko da i mumuŋ malla cine mumuc tekeɗe kwana, a gumbuˀ ng'ava ta, vur naŋ mandir ti dili.

¹²Anja a bi put le tir hay nga ya Bumbulvuŋ ta si, vur naŋ masa gi ti hay ɗu kaɓa li ho gar. Asi mike na, a pakaŋ mal ngi vulaŋ slra ngi Buymisemuŋ le. I ya Bumbulvuŋ.

¹³Anja masay madiɗa a zuɓ ngi ngwasa, i diili mungbuˀo kine aruŋ.

¹⁴Wudiga, ngwas muɓula, malla ngwas mihiryi le ti gi sulome na, a zuɓa ngi ngwasa ta. Anja a zuɓ ngi ngwasa, i zuŋ diili, a wuzla muy naŋhay,

¹⁵vur naŋ maco ti sukwi mekelem nga wuzla muy naŋhaya, asi matiri di ɓa naŋ pal na, i ya Bumbulvuŋ.»

¹⁶Bumbulvuŋ a ɓa Moyise na:

¹⁷«Ɓa Aroŋ: Ziri ngi kwacay ɗikey nga mbuŋ gar, da mburo i misi ble na, anja a kiroho kirah le ng'avi li gi mikuli, ɓa a siy ti ɗaf da ya Buymisemuŋ naŋ ta.

¹⁸Naŋ kine, da mbur i misi ble na, a kiroho kirah le ng'avi li gi mikuli ta, kaɓa ani: Dangar malla jegwer, mbur mislirɓah hutuŋ, mbur misi haŋ malla sar migi kuy kuy ta,

¹⁹mbur mingila sara le malla haŋ,

²⁰mbur misi potokor jiv, mbur mizlengeŋ, mbur misi jirzleŋ a hiri, mbur misi burkacaw malla misi ngweɗek waɗ mbur munguɗo le.

²¹Angi tizer ngi masay Aroŋ, da mbur i misi ble na, a kiroho kirah le ng'avi li gi mikuli, ngi so ti gwat ngi zum da ya Bumbulvuŋ ta. Naŋ misi ble tuwa na, anja a kiroho kirah le ngi siy ti ɗaf da ya Buymisemuŋ ta.

²²Ɗaf nga ya Buymisemuŋ naŋ, sedege mipal wãˀ ati sedege mipal na, a zuma taŋ zuy ɓula.

²³Amma a ndil hã sesẽŋ avu zana minjar ngi tika hiri na ta, yo a ndil ng'avi li gi mikuli ta ma, vur naŋ, mbur misi ble tuwa na, naɓa a sa tiri ti hay ɗu ati gwat ngi huroˀohoyo gar, kaɓa i gwat muho lambaˀ, asi maga ɓa taŋ pal na, i ya Bumbulvuŋ.»

²⁴Moyis a ɓi hanayna da Aroŋ ati ziri naŋ mizilehey waɗ da Israyeley gar.