Read South Giziga LEV 22 Bible Online

LEV 22 - South Giziga bible

LEV 22

¹Bumbulvuŋ a ɓa Moyise na:

²«Ba Aroŋ ati ziri naŋ mizileheye, anja a hiryaka slimiɗ ɗu mipal na ta. Vurˀe, Mikuli mipal, Israyeley magikiydi na, anja a cicam baˀ murvay ava. I ya Bumbulvuŋ.

³Ɓa taŋ na: «Avi dideˀ kum nga mbuŋ nga mbuŋ, ar tizer ngi masayaya, da mburo naŋ ti dili na, gwat ngi vul mipal, Israyeley magaka da ya Bumbulvuŋ, da a kiroho le ng'ava na, a sa gwahakaŋ ti mbuŋ ɗu avra. I ya Bumbulvuŋ.

⁴Mbur ngir tizer ngi Aroŋ, da naŋ ti kukula malla gwat ara ɓulawa ti mbuŋ naŋ, amma a ɗiyi t'aruŋ na, anja a zum gwat ngi sedege mipal na ta. I jiviɗ mupurla vur mbur mija haŋ le avu mbur muwus vagay ngi mbur le ati mbur mumusuwun, vu naŋ a pi le,

⁵mbur mija haŋ le avu mevreŋ gar maca mbur ar dili malla avu mbur maca mbur ar dili, ko da i dili wanaka gar.

⁶Mbur mija haŋ le avu gwat misi kanah gar na, naŋ ti dili hã pastaˀa, ko naŋ anta zum gwat ngi sedege mipal na ta, sey da naŋ mubun le ceɗ ceɗ ɗagay far.

⁷A dirba pas midiɗ le diɗ si na, naɓa dili naŋ a bun le avra. Dar a zum gwat ngi sedege mipal na zuy muduba, asi i ɗaf naŋ.

⁸Masaya, maara ngi gwat mumuc ti muc malla gwat mija ti ji na, a zum ta, asi da naŋ muzuma le na, a caŋ le ar dili. I ya Bumbulvuŋ.

⁹Ɓimuɗuva ɗuwoyo, sey masayay a jaka taŋ a hirnga kuy kuy, ɓa a gam mungra ti gwat ngi zum ti zumo mata. Da a tiram ti ɗaf nah le kaɓa i gwat ngi zum muho gar na, a micam, asi matiri ti taŋ, taŋ pal na, i ya Bumbulvuŋ.

¹⁰Ɗaf mipal na, anja mbur lambaˀ a zuma ta, ko mbur mulak malla ko gawla migi slra ngi dala a hay masay gar na, anja a zuma ɗaf mipal na ta si.

¹¹Amma da masay a hiɗiko beke le zleˀe na, beke nah, a zuma zuy ɓula, yo gawla miyaka cak a haya, naŋ kwana, a zuma zuyo ma.

¹²Zuŋ ngi masaya, da a zuɓ ngi zile i mbur lambaˀ na, gwat ngi zum muwuɗo di le avu gwat ngi zum mipal na, a zuma ta.

¹³Amma, da zuŋ ngi masay i wudiga malla zil a ɓula le, naŋ anta ti zuŋ ta, yo a mo le a hay cine a muŋ, kaɓa ar hin ngi diili naŋ zleˀe na, naɓa a zum ɗaf ngi cine zuy ɓula. Amma ko mbur lambaˀ a zuma ta.

¹⁴Ɗaf ngi mikuli na, da mbur a zum le, a si na ta na, sey a wurka da masay a muŋ waɗ muzlum ngi gwat [4] naŋ muzuma vuna bac ameˀeŋ.

¹⁵«Gwat ngi zum ngi sedege mipal, Israyeley mawuɗam anga ngi vul da ya Bumbulvuŋ na, anja a gam di kaɓa gwat ngi zum muho gar ta.

¹⁶Da a zumaka le na, a so ti mungra nga hirnga taŋ, hã a cufuɗ ɗiya ɓi avu Israyeleye. Asi matiri ti taŋ, taŋ pal na, i ya Bumbulvuŋ.»

¹⁷Bumbulvuŋ a ɓa Moyise na:

¹⁸«Aroŋ ati ziri naŋ mizilehey waɗ Israyeleye gar na, ɓa taŋ: kaɓa ani, mbur Israyel malla mbur moholoy micifi le a wuzla kumo, da a wuɗ le ɓa a so ti gwat ngi gi mikuli mizlam zlam wãˀ, kaɓa masoko di ngi ji mi nga ya Bumbulvuŋ malla mbur maso di ngi mongoy naŋ gar na,

¹⁹da buy naŋ a wuɗ le ɓa i tiɓa mikuli naŋ na, sey a so di i ginew manja hereweɗ ava, gusoŋ mujo di kaw ti wuzla sla naŋhay, tumuŋ ngi wuzla tumuŋ naŋhay malla ˀaw ngi wuzla ˀaw naŋhay.

²⁰Ki soko di ngi vulo i ginew misi hereweɗ ava ta, naɓa y'anta tiɓa ta.

²¹Ginew mbur maso di ngi mongoy naŋ malla ngi ji mi nga ya Bumbulvuŋ, i sla, tumuŋ malla ˀaw, naŋ mujo di kaw a wuzla sla naŋhay, a wuzla tumuŋ malla ˀaw naŋhay, ɓa ngi gi di mikuli ngi ngiɓiˀaya, da a wuɗ le, ɓa i tiɓaŋ di na, sey i ginew manja hereweɗ neˀ le ava far.

²²A soko di i ginew dangar ta, mubuko sar ta, munguɗo ta, muduguyãˀ ta, misi birkacaw malla misi birdiw ava ta. Ginew misi kanah gar na, ki soko di da ya Bumbulvuŋ ta, yo ki vulaka ngi zum zlam zlam ar li gi mikuli da ya Bumbulvuŋ ta.

²³Da kaɓa, sla, tumuŋ malla awa, ble ada ava na, ki gi di mikuli ngi mongoy ɗike zuy ɓula, amma ɓa ngi gi di mikuli ngi ji mi na, anta sa tuɓukuw di ta.

²⁴Ginew munguɗo le, minjisla lakwaya le, mihila le malla misla le avra na, ki soko di ngi vul da ya Bumbulvuŋ ta. Tapas da kum misa cam le angi hirwuy kumo na, anja ki gam gwat misi kanah ta si.

²⁵Kum anta hiɗikam ginew misi kanah a haŋ mulakaya, ɓa ki vulikiy ka ɗaf da ya Buymisemuŋ kumo ta. Asi nguɗ malla hila lakway ngi ginewey misi kanah na, kite i hereweɗ avu ginewe si, y'anta tiɓa ta.»

²⁶Bumbulvuŋ a ɓa Moyise na:

²⁷«Zuŋ sla, zuŋ tumuŋ malla zuŋ awa, a dirba taŋ miyaka le na, a ndir asi mumuŋ hin tarnaˀa. Naŋ mazli zle angi hin midangafaɗ naŋ na, da ara vulaka kaɓa gwat ngi zum mizlam zlam da ya Bumbulvuŋ na, i tiɓaŋ.

²⁸Amma, madiya sla, tumuŋ malla madiya awa, ki slaka ay taŋ pas purla zlaɓ ati zingaˀ naŋ ta.

²⁹Da ki ra gam mikuli ngi gi sise da ya Bumbulvuŋ na, gaka ti jiviɗ naŋ, zliv ɓa i tiɓaŋ.

³⁰A zumaka useˀ nah tapasa tapasa si, ko a pulam neˀ le, ɓa li a wun di ta. I ya Bumbulvuŋ.

³¹Ɓimuɗuva ɗuwoyo, jaka taŋ a hirnga, yo gam taŋ slra. I ya Bumbulvuŋ.

³²Slimiɗ ɗu mipal na, anja ki hiryaka ta, ɓa mabigaka, ya pal na, i kum Israyeley. Matiri ti kum, ɓa kum pal na, i ya Bumbulvuŋ.

³³I ya mubo ti kum ti ruwuy Ezipte, ɓa i tiri Buymisemuŋ kum. I ya Bumbulvuŋ.»