Read South Giziga LEV 23 Bible Online

LEV 23 - South Giziga bible

LEV 23

¹Bumbulvuŋ a ɓa Moyise na:

²«Ɓa Israyeleye: Muguzlum madiɗahay ngi Bumbulvuŋ na, i hin kum masa zilam di vu ngi gi kus ti slimiɗ ɗu. Hin ngi kus madiɗa tayna, t'ani:

³Vur luuma gar na, hin merkeɗ ngi gi slra, amma hin mitarnaˀ naŋ na, i Sabat , hin ngi muska vu, ɓa ki gam di cikil ti slimiɗ ɗu, ko ki gam slra neˀ ta, ko da kum amaka gar. Asi i Sabat nga ya Bumbulvuŋ.

⁴Muguzlum madiɗa mekelemey, kum masa gam taŋ kus ti slimiɗ ɗu na, hin taŋhay ani:

⁵Hin mukuruˀ nga mufaɗ ngi kiya mudumbuŋ ngi vi, ti li zuyyo naŋ na, i muguzlum Pak nga ya Bumbulvuŋ.

⁶«Hin mukuruˀ nga zlum ngi kiya nah vuna ma na, i muguzlum nga ya Bumbulvuŋ, muguzlum mazumam di ɗaf manja ˀis ara [5]. Ki zumam di ɗaf manja ˀis ara hã hin tarnaˀ.

⁷Hin mudumbuŋ ngi luuma nah vuna na, ki gam di kus ti slimiɗ ɗu. Tapasa, ki gam slra mutuwaˀ ko neˀ ta.

⁸Angi luuma nah, vur hin gar na, ki vulam gwat ngi zum mizlam zlam wãˀ da ya Bumbulvuŋ. Yo hin mitarnaˀ naŋ na, ki gam kus ti slimiɗ ɗu. Tapasa ma na, ki gam slra mutuwaˀ ko neˀ ta.»

⁹Bumbulvuŋ a ɓa Moyise na:

¹⁰«Ɓa Israyeleye: Hirwuy, ya masa vulukum di na, da kum misa cam le anga, yo da kum mira gam sifi ngi gwat na, maslapa mudumbuŋ naŋ na, ki ram di da masay, i gwat micikiɗeffe ngi sifi.

¹¹Maslapa nah tuwa na, masay a gi di mezegwel da ya Bumbulvuŋ, ɓa a tuɓukum di. A ga tapas zay sef ngi Sabat.

¹²Tapas kum masa gaka mezegwel ti maslapa tuwa na, kisa gam mikuli mizlam zlam wãˀ da ya Bumbulvuŋ ti zuŋ tumuŋ ngi vi purla, manja hereweɗ ava,

¹³waɗ hapa kilo merkeɗ, fukaɗ fukaɗ ti mal. I gwat ngi zum mizlam zlam wãˀ da ya Bumbulvuŋ, misi zĩˀĩ naŋ a tisl mevel, waɗ mbaazla litir pal ti reta ngi pusl.

¹⁴Dumbuŋ angi hin kum masa soko ti maslapa kumoy da ya Buymisemuŋ kumo na, ki zumam ɗaf ta, daw mufuko, ko yi ngi gwat mutukuzo ngi vi nah gar na, ki titilam avu mi t'aruŋ. Nah na, i ɓimujuwa avu kumo mambiɗi ta ngi caˀa, ko da kum amaka gar.»

¹⁵«Zle avu hin ngi zay sef ngi Sabat, hin kum musoko ti maslapa micikiɗeffe ngi gi mezegwel ngi vula gwat tuwa na, ki slufam luuma slaf slaf tarnaˀa.

¹⁶Hin mizli ngir zlum nah na, hã a ndila zay sef ngi Sabat mitarnaˀ naŋ, hin kum masa sikiy ti gwat nawaya ngi sifi kumoy da ya Bumbulvuŋ, ɓa ngi giy di mikuli ma.

¹⁷Da ko kum amaka gar na, kisa soko ti ɗaf cuw cuw ti hay kumoyo, ɓa ngi gi di mezegwel ngi vula gwat, i ɗaf mida ti hapa kilo makir, yo anja maɗaf naŋ a slikiɗ pirtaˀ le. Hanayna i gwat ngi migam micikiɗeffehey da ya Bumbulvuŋ.

¹⁸Jom ng'avi ɗaf na ma na, kisa soko ti ziri tumuŋ ngi vi pal palay tarnaˀ, i manja hereweɗ avu taŋ, yo gusoŋ purla waɗ zlengerekey cuw, ngi gi taŋ mikuli mizlam zlam wãˀ da ya Bumbulvuŋ, ti hapa naŋ ati mbaazla ngi pusl naŋ zlaɓ zlaɓa. Tayna i gwat ngi zum mizlam zlam wãˀ, misi zĩˀĩ naŋ a tisliy mevel da ya Bumbulvuŋ.

¹⁹Ki sa jam bazuway, ɓa ki gam di mikuli ngi pula mungra, waɗ ziri tumuŋhoy cuw ngi vi pal palay, ngi gi mikuli ngi ngiɓiˀay.

²⁰Peŋ ngi gwat ngi migam micikiɗeffe waɗ ziri tumuŋhoy mucuw tuwa, masay a sa gi taŋ mikuli ti mezegwel ngi vula gwat da ya Bumbulvuŋ. Gwat tayna i gwat mipal da ya Bumbulvuŋ, a sa ndiram da masay.

²¹Angi hin mihĩˀĩ nah na, kisa cikilam ti slimiɗ ɗu. Kum anta sa gam slra mutuwaˀ ko neˀ ta. Nah na, i ɓimujuwa mambiɗi ta avu kumo ngi caˀa, ko da kum amaka gar.

²²«Da kum mira gaka sifi ngi gwat ngi migam kumoyo na, ki gaka prek prek ti mivay naŋhaya wãˀ ta. Yo ki gaka holok naŋ ta. Ki pulaka taŋ da misi murgahay ati moholoyoy. I ya Bumbulvuŋ, Buymisemuŋ kum.»

²³Bumbulvuŋ a ɓa Moyise na:

²⁴«Ɓa Israyeleye: Hin mudumbuŋ ngi kiya mitarnaˀ naŋ na, i hin kum ngi muska vu, hin ngi wuluk keŋ, waɗ ngi ji salalay, ki gam kus ti slimiɗ ɗu.

²⁵Ki gam slra mutuwaˀ tapasa ta, yo kisa vulam gwat ngi zum mizlam zlam wãˀ da ya Bumbulvuŋ.»

²⁶Bumbulvuŋ a ɓa Moyise na:

²⁷«Hin kuruˀ ngi kiya mitarnaˀ naŋ hana, a sa gi i hin madiɗa [6] ngi pula mungra. Ki sa gam kus ti slimiɗ ɗu, kisa gam dalyam, yo kisa vulam gwat ngi zum mizlam zlam wãˀ da ya Bumbulvuŋ.

²⁸Angi hin mihĩˀĩ nah na, ki gam slra neˀ le ta, asi i hin madiɗa ngi pula mungra, hin ngi gi mezegwel ar kum ngi vula jiviɗ ngi pula mungra a mbuŋ ɗu, ya Bumbulvuŋ, Buymisemuŋ kum.

²⁹Naŋ kine, ko wa gar magi dalyam tapasa ta na, a sa gwahakaŋ avra ti wuzla muy naŋhaya.

³⁰Yo ko wa gar migi slra wanaka le gar tapasa na, yi sa susuymoŋ avra ti wuzla mizli naŋhaya.

³¹Ko kum anta gam slra neˀ le tapasa ta. Hana i ɓimujuwa mambiɗi ta avu kumo ngi caˀa, ko da kum amaka gar.

³²Hin nah na, i sabat, hin kum ngi muska vu, yo kisa gam dalyam tapasa. Zle avu pastaˀ ngi hin mungoltir naŋ, hã avu pastaˀ ngi li naŋ mawun, jaka a hirnga, i hin kum ngi muska vu, hin ngi sabat.»

³³Bumbulvuŋ a ɓa Moyise na:

³⁴«Ɓa Israyeleye: Zle avu hin kuruˀ nga zlum ngi kiya mitarnaˀ naŋ na, a sa gam muguzlum ngi guɗuk ti slimiɗ nga ya Bumbulvuŋ, hã hin tarnaˀa.

³⁵Angi hin mudumbuŋ naŋ na, ki gam kus ti slimiɗ ɗu, yo ki gam slra mutuwaˀ tapasa ko neˀ ta.

³⁶Angi luuma nah gar na, vur hin gara, ki vulam gwat ngi zum mizlam zlam wãˀ da ya Bumbulvuŋ. Hin midangafaɗ naŋ na, ki gam kus ti slimiɗ ɗu, yo ki vulam gwat ngi zum mizlam zlam wãˀ da ya Bumbulvuŋ. Nah na, i kiɗa mi ngi muguzlum so. Ko kum anta gam slra mutuwaˀ tapasa ko neˀ ta.

³⁷Muguzlum ɗu madiɗahay i hanayna so. Angi muguzlum tayna gar na, ki gam kus madiɗa ti slimiɗ ɗu, ngi vula gwat ngi zum mizlam zlam wãˀ, mikuli mizlam zlam wãˀ malla gwat ngi vul, mikuli ngi ngiɓiˀay malla mikuli ti mbaazla ngi pusl, kasl kasl avu mezegwel magaka vur muguzlumo vur muguzlumo gar.

³⁸Mikuli kum magaka taŋ ti hin gi sabatay da ya Bumbulvuŋ na, a jumom jom ng'avi gwat ngi vul kumoy waɗ ng'avu mikuli ngi ji mi malla mikuli kum magaka ngi mongoy kum na.

³⁹«Ma na, hin kuruˀ nga zlum ngi kiya mitarnaˀ naŋ, a dirba kum migaka sifi ngi gwat ngi migamaya le na, ki zuɓam mulak nga gi muguzlum ngi luuma pal da ya Bumbulvuŋ. Hin mudumbuŋ naŋ ati hin midangafaɗ naŋ gar na, i hin ngi muskavuhoy.

⁴⁰Zle ti hin mudumbuŋ naŋ si na, ki wuɗam yi ngi widise mimezle naŋhay, mihaŋ ngi Babazlahay, mihaŋ ngi widis mitikiɗif tikiɗifey waɗ kalaf ngir futuŋhoy, ɓa ki bigaka mumul kumo hã luuma pal a mbuŋ ɗu, ya Bumbulvuŋ, Buymisemuŋ kumo.

⁴¹Vi gar, angi kiya mitarnaˀ naŋ na, kisa zuɓaka mulak nah ngi luuma pal nga gi muguzlum da ya Bumbulvuŋ. Avu kumo, i ɓimujuwa mambiɗi ta, hã ngi caˀa.

⁴²Angi luuma pal nah na, kisa cifam asi guɗukoy. Zuŋ Israyel gar na, sey a cifi asi guɗuku.

⁴³Ɓa ko ti vunaka gar na, kisa sinaka, ti ya mubo ti dideˀ kumoy tir ruwuy Ezipte na, a cifam zleˀe asi guɗukoy. I ya Bumbulvuŋ, Buymisemuŋ kum.»

⁴⁴Naŋ kahana, muguzlum madiɗa ngi gi ngi gi na, Moyis a slufa taŋ da Israyeleye, ɓa a gaka taŋ ngi ɗuva hirnga da Bumbulvuŋ so.