Read South Giziga LEV 27 Bible Online

LEV 27 - South Giziga bible

LEV 27

¹Bumbulvuŋ a ɓa Moyise na,

²«Ɓa Israyeleye: Da mbur a vul ngi ji mi nga ya Bumbulvuŋ i mbur deŋ na,

³cikili naŋ ani: Mbur mizile, mazli ti vi kukur cuw, hã a ndila vi kukur merkeɗ na, cikili naŋ, suloy kukur zlum, i suloy magam di slra ar hay nga ya Bumbulvuŋ.

⁴Ngi ngwasa, cikili naŋ, suloy kukur makir.

⁵Ngi mbur mazli ti vi zlum hã a ndila vi kukur cuw na: mangal mizile, suloy kukur cuw, yo zuŋ mongoso kwana, suloy kuruˀu.

⁶Ngi zuŋ meciɗek mazli zle ti kiya purla hã a ndila vi zlumo: mangal mizile, suloy zlum, yo zuŋ mongoso kwana, suloy makir.

⁷Ngi mbur mufuna vi kukur merkeɗe le: mbur mizile, suloy kuruˀ nga zlum, yo ngwasa kwana, suloy kuruˀu.

⁸Da kaɓa buy naŋ i misi murga wãˀ, a wurka cikili muɗuva hanayna gu ta na, aru ti mbur ngi ji mi nga ya Buymisemuŋ vuna nga mbuŋ masay, ɓa i naŋ mavula cikili naŋ. Masay kwana a sa vula cikili naŋ weˀe avu gidaŋ ngi mbur majiy mi nga ya Buymisemuŋ vuna.

⁹Da ginew ngi ji mi ɗu i ginewey, zliv a gam di mikuli da ya Bumbulvuŋ gu na, naɓa ginew mavulikiy di nah na, a tiri le naŋ pal.

¹⁰Ɓa ngi mbiɗa hirnga nah ti mekelem, ko ti ginew mezle ar li ngi malambaˀ, ko ti malambaˀ ar li ngi mezle kwana, jiviɗ naŋ anta na si. Da ko mbur a mbiɗa le ti ginew mekelem tekeɗe kwana, naɓa ginew mimbiɗam di hirnga ngi mekeleme waɗ numuŋ vuna, zlaɓ cuw taŋ, a tiram le, taŋ pal.

¹¹Da kaɓa i ginew majam di mi nga ya Buymisemuŋ ta, a zlir ngi gi di mikuli da ya Bumbulvuŋ ta na, buy naŋ aru di nga mbuŋ masay.

¹²Da i mezle malla da i malambaˀ gar na, masay a pura, waɗ a cicam deŋ angi ngi masay mupura na.

¹³Da buy ngi ginew a wuɗ le ɓa a mbiɗa hirnga ngi ginew nah na, a vula cikili ngi masay mica na, waɗ muzlum ngi cikili ngi ginew vuna bac nga meˀeŋ.

¹⁴Da kaɓa mbur a vul di i hay naŋ da ya Bumbulvuŋ na, da i mezle malla da i malambaˀ gar na, masay a puraŋ, waɗ a cicam deŋ ar cikili naŋ muvula na.

¹⁵Da mbur muvula haya, a wuɗ le, ɓa a mbiɗa hirnga ngi hay naŋ na, a vula cikili ngi masay mica na, waɗ muzlum ngi cikili ngi hay vuna bac nga meˀeŋ, joˀ hay a ndir da naŋ a muŋ.

¹⁶Da mbur a vul da ya Bumbulvuŋ i guva ngisi nga naŋhay na, cikili ngi mbiɗa hirnga naŋ a waka weˀ avu hilfa ngi zligi ar guva nah vuna. Suloy kukur zlum ar deɗe ngi hilfa ngi daw giziŋ kilo skat makir.

¹⁷Da kaɓa mbur a vula guva naŋ zle angi vi ngi zluzluɓ na, cikili naŋ a ndir kahana vuna si.

¹⁸Da mbur a vula guva naŋ a dirba vi ngi zluzluɓ na, masay a ca cikili naŋ weˀe avu vi mindir nga mbuŋ, nga luuma vi ngi zluzluɓ mekelem, a maka cikili naŋ nga ruwuy.

¹⁹Da buy naŋ a wuɗ le a mbiɗa hirnga ngi guva naŋ na, a vula cikili ngi masay mica na, waɗ muzlum ngi cikili ngi hay vuna bac nga meˀeŋ, dar guva a ndir da naŋ a muŋ.

²⁰Da kaɓa a mbiɗa hirnga ngi guva naŋ na ta, a hiɗika le da mbur mekelem ma na, jiviɗ ngi mbiɗa hirnga ngi guva anta mata.

²¹Yo vi ngi zluzluɓ mumbuɗo le ngi pula guva na, guva nah a sa ndir naŋ pal da ya Bumbulvuŋ, kite i guva mitika le da ya, yo a sa ndir i guva ngi masayay.

²²Da kaɓa mbur a vul da ya Bumbulvuŋ i guva, naŋ mihiɗika ti hiɗiki, i guva ngi cine mupulaŋ di ta na,

²³ɓa ngi sla cikili nah na, masay a slufa vi mindire, zle ar nah akẽh, hã sesẽŋ avu vi ngi zluzluɓ mekelem, joˀ mbur a wurka dala nah kalla tapasa vuna si. Dala nah a sa ndir i gwat mipal da ya Bumbulvuŋ.

²⁴Vi ngi zluzluɓ mumbuɗo le so na, guva a sa ndir da buy naŋ mudumbuŋ, mbur, cine mupulaŋ di ti pul tuwa.

²⁵Cikili ngi gwat gar na, a sa zuɓam di i suloy magam di slra ar hay nga ya Bumbulvuŋ, [7] suloy purla a wi gram kuruˀu.

²⁶Modogom ngi gwat misãmi gar, zuŋ sla, zuŋ ˀaw malla zuŋ tumuŋ gar na, inga ya Bumbulvuŋ si, mbur a vuliy di da ya ti vulo mata.

²⁷Da kaɓa i zingaˀ ngi gwat misãmi mitika le ngi zumo na, zliv buy naŋ a mbiɗa hirnga naŋ gu. Na so na, a vula cikili ngi masay mica na, waɗ muzlum ngi cikili ngi gwat vuna bac nga meˀeŋ. Da a mbiɗa hirnga naŋ ta na, masay a hiɗika avra, a wa cikili nah weˀe avu naŋ mica tuwa,

²⁸Yo ma na, mburo, gwat naŋ misi ti naŋ gar, mbur titira, gwat misãmi malla ko guva naŋ, cine mupulaŋ di, mitak ngi vul da ya Bumbulvuŋ, ɓa a mbiɗa hirnga naŋ malla ɓa a hiɗika avra na, jiviɗ naŋ anta mata. Gwat mitak ngi vul ti jiviɗ misi kahana gar na, naɓa i gwat mipal wãˀ da ya Bumbulvuŋ.

²⁹Ko da mitak ngi vul da ya Bumbulvuŋ vuna i mbur titira tekeɗe kwana, anta mbiɗaka hirnga naŋ gu mata, sey a kiɗaka vagay.

³⁰«Mukuruˀngi gwat ngisi ruwuy gar, mumuɗaka le ar gwat ngi migam malla ngi yi ngi widisey gar na, inga ya Bumbulvuŋ, i gwat mipal da ya.

³¹Mburo, mukuruˀ ngi gwat naŋhaya, da a wuɗ le ɓa a mbiɗi hirnga naŋ cah avu taŋ na, a wurka cikili mikaslsla ngi gwat vuna waɗ muzlum ngi cikili naŋ vuna bac nga meˀeŋ.

³²Mukuruˀngi slahay, tumuŋhoy malla away, mbiɗeˀvra, a wuzla gwat misãmihey kuruˀ gar na, purla a wuzla taŋ i mumuɗa le ceɗ [8] i gwat mipal da ya Bumbulvuŋ.

³³I gwat misãmi mezle malla malambaˀ kwana, buy taŋ anta wini ti wini a wuzla taŋ ta, yo anta mbiɗaka ti mekeleme ta ma. Da ko a mbiɗam di mekelem le tekeɗe kwana, ginew mimbiɗam di mekelem ati misi mudumbuŋ vuna, a tiram le i gwat mipal: anta mbiɗaka hirnga taŋ gu mata.»

³⁴Ɓimuɗuvahay, Bumbulvuŋ muvula taŋ da Moyis a muwã Sinay vur Israyeley na, i hanayna so.