Read South Giziga LEV 4 Bible Online

LEV 4 - South Giziga bible

LEV 4

¹Bumbulvuŋ a ɓa Moyise:

²«Ɓa Israyeleye na: Ɓimuɗuva nga ya Bumbulvuŋ, mitika jiviɗ taŋ le ngi gi ngi gi gar na, da mbur a gi le pal asi taŋ tir manja sin naŋ, yo da a ngil le purla a wuzla taŋ na, sey a ga gwat anihĩ:

³da i masay madiɗa miga mungra nah, yo mungra nah a tiri ti mizli le gar i migi malambaˀhay na, sey a so di da ya Bumbulvuŋ i gusoŋ manja hereweɗ ava ngi gi mikuli ngi pula mungra.

⁴A so ti gusoŋ a mbuŋ ɗu, ya Bumbulvuŋ a mizlingre guɗuk ngi zlir ti ya. Mbur vuna, a buca haŋ bac a hirnga gusoŋ, waɗ a sla ˀay naŋ daˀ a mbuŋ ɗu ya Bumbulvuŋ.

⁵Masay madiɗa, a wuɗ pumbus ngi gusoŋ tuwa, ar di ng'ar guɗuk ngi zlir ti ya Bumbulvuŋ.

⁶A ca muzuŋ haŋ yop ar pumbuso, a kuca pumbus tuwa is tarnaˀ da godo vay mapur ngir li mipal misi a mbuŋ ɗu na.

⁷Li gi mikuli ti urdi misi a mbuŋ ɗu, ya Bumbulvuŋ angi guɗuk ngi zlir ti ya, mivay naŋhay muyoŋ yoŋ kaɓa durumoyo masay a ga taŋ pumbuso njoffo njoffo. Yo waɗ is ngi pumbus ngi gusoŋ tuwa na, a pa gar ng'asi virzi ngi li gi mikuli mizlam zlam wãˀ misi a mizlingre guɗuk ngi zlir ti ya.

⁸Gusoŋ migam di mikuli ngi pula mungra tuwa, li misi mal naŋhaya gar na, a zuɓa taŋ paɗ paɗa: i mungul misirit ar gwat ar gwat ngi kwacayaya wãˀ,

⁹yo ɗugur dubahaya cuw taŋ, mal naŋhay ati meficek ngi ɗugur dubahay milaw law avu taŋ, waɗ guzluzluk ngi mevele torro bac ng'avu ɗugur dubahaya.

¹⁰A zuɓam di i li misi mupurla kaɓa muzuɓaka avu useˀ ngi gusoŋ ngi mikuli ngi ngiɓiˀay tuwa, joˀ masay a wura taŋ ar li gi mikuli ngi zluma gwata.

¹¹Garak ngi gusoŋ tuwa, useˀ naŋ gar waɗ hirnga naŋ jom ati poprok naŋhaya, gwat ngi kwacaya jom ti zaya,

¹²na zle, is ngi useˀ ngi gusoŋ vuna wãˀ si, a bi di nga duba gala, ng'ar li manja dili, li mapaka fucu misi mal ngiˀ ngiˀ ava na, a zluma ar vu miɗiya ti musluŋvu. A zlumaka ar li mapaka fucu misi mal ngiˀ ngiˀ ava.

¹³Da mungra nah, migaka i Israyeley keɗeɗe, tir manja sin naŋ, yo mizli taˀ gar a sinaka ta, ɓimuɗuva ngi Bumbulvuŋ mitika jiviɗ naŋ le ngi gi ngi gi gar, da a ngilam le purla ar wala taŋ na, naɓa a cam le ar mungra.

¹⁴Da taŋ misa sinaka mungra taŋ migaka na le sin so na, sey mizli taˀ gar a soko ti gusoŋ ngi gi mikuli ngi pula mungra, a ram di ng'ar guɗuk ngi zlir ti ya Bumbulvuŋ.

¹⁵Micawwa ngi wuzla mizli a bucaka haŋ a hirnga gusoŋ a mbuŋ ɗu. Joˀ a slaka ˀay naŋ daˀ a mbuŋ ɗu.

¹⁶Masay madiɗa, a wuɗ pumbus ngi gusoŋ tuwaˀ cah, ar di ng'ar guɗuk ngi zlir ti ya Bumbulvuŋ.

¹⁷Masay tuwa, a ca muzuŋ haŋ naŋ yop ar pumbus naŋ muwuɗo di tuwa. Yo a kuca pumbus tuwa is tarnaˀ da godo vay mapur misi a mbuŋ ɗu na.

¹⁸Li gi mikuli misi a mbuŋ ɗu ar guɗuk ngi zlir ti ya na, mivay naŋhay muyoŋ yoŋ kaɓa durumoyo, a ga taŋ pumbuso njoffo njoffo. Is naŋ sek wãˀ ng'asi virzi ngi li gi mikuli ngi zlum ti zlum, misi a mizlingre guɗuk ngi zlir ti ya.

¹⁹Masay a zuɓa li misi mal naŋhaya paɗ paɗ gar, a zluma taŋ ar li ngi gi mikuli.

²⁰A gi ti useˀ ngi gusoŋ hana kaɓa naŋ migi ti useˀ ngi gusoŋ ngi mikuli ngi pula mungra nga naŋ na ya. Masay miga mezegwel ngi pula mungra le da mizli kahana na, naɓa ya Bumbulvuŋ i pula mungra taŋhaya le avra ya.

²¹Gusoŋ tuwa, gwatay mindiram ngi vaˀa gar na, a hila taŋ nga duba gala, dar a zluma taŋ kaɓa naŋ muzluma ngi gusoŋ mudumbuŋ tuwa ma. Mikuli ngi pula mungra ngi zigiduwo, a gaka kahana.

²²Ɓimuɗuva nga ya Bumbulvuŋ, ya Buymisemuŋ naŋ mitika jiviɗ naŋ le ngi gi ngi gi gar na, da buy a gi mungra le, a ngil le purla a wuzla taŋ tir manja sin naŋ na, naɓa a tiri le i mbur mici le ar mungra.

²³Da a bigakaŋ mungra naŋ miga nah le na, sey a so di ngi vul da ya Bumbulvuŋ i bazuway manja hereweɗ ava.

²⁴A buca haŋ bac a hirnga bazuwaya, a sla ˀay naŋ daˀ ar li maslaka ˀay ngi ginew ngi zlum ti zlum a mbuŋ ɗu. Hana i mikuli ngi pula mungra.

²⁵Li gi mikuli ngi zluma gwata, mivay naŋhay muyoŋ yoŋ kaɓa durumoyo, masay a ca muzuŋ haŋ yop ar pumbus ngi ginew mikiɗaka ngi gi mikuli ngi pula mungra tuwa, a ga taŋ di njoffo njoffo, waɗ is naŋ sek ng'asi virzi ngi li gi mikuli ngi zluma gwata.

²⁶Li misi malay gar na, a wura taŋ ar li gi mikuli, kaɓa magaka mikuli ngi ngiɓiˀay na ya. Masay miga mezegwel ngi pula mungra ngi buyo le na, naɓa ya Bumbulvuŋ i pulaŋ mungra naŋ le ya.

²⁷Da mbur ho gar a gi mungra le, a gi gwat le purla tir manja sin naŋ a wuzla gwat ɓimuɗuva nga ya Bumbulvuŋ mitika le na, naɓa a tiri le i mbur mici le ar mungra.

²⁸A dirba nah, da mbur a bigaŋ malambaˀ naŋ miga na le na, sey a so di ngi vulo i ˀaw mongosoŋ, manja hereweɗ ava, ngi pula mungra naŋ miga na.

²⁹A buca haŋ bac a hirnga ginew ngi gi mikuli tuwa, a sla ˀay naŋ ar li misi purla ati maslaka ˀay ngi gi mikuli mizlam zlam na.

³⁰Li gi mikuli ngi zluma gwata, mivay naŋhay muyoŋ yoŋ kaɓa durumoyo, masay a ca muzuŋ haŋ yop ar pumbuso, a ga taŋ di njoffo njoffo, waɗ is naŋ sek ng'asi virzi ngi li gi mikuli.

³¹Li misi malay gar na, a zuɓa taŋ nyaˀ nyaˀ kaɓa muzuɓaka taŋ avu ngi useˀ ngi gi mikuli ngi ngiɓiˀay na ya. Dar masay a zluma taŋ ar li gi mikuli, zĩˀĩ naŋ a tisliy mevel da ya Bumbulvuŋ. Masay miga mezegwel ngi mbur mici ar mungra na le na, naɓa ya Bumbulvuŋ i pulaŋ mungra naŋ le ya.

³²Da mbur mici ar mungra a so di ngi vul ngi gi mikuli ngi pula mungra naŋ i tumuŋ na, sey tumuŋ mongoso, manja hereweɗ ava.

³³A buca haŋ bac a hirnga ginew ngi mikuli ngi pula mungra tuwa, a sla ˀay naŋ ngi pula mungra ar li maslaka ˀay ngi ginew ngi gi mikuli ngi zluma gwata.

³⁴Li gi mikuli ngi zluma gwata, mivay naŋhay muyoŋ yoŋ kaɓa durumoyo, masay a ca muzuŋ haŋ yop ar pumbuso, a ga taŋ di njoffo njoffo, waɗ is naŋ mindire sek wãˀ ng'asi virzi ngi li gi mikuli.

³⁵Li misi malay gar na, a zuɓa taŋ nyaˀ nyaˀ, kaɓa muzuɓaka avu useˀ ngi tumuŋ migam di mikuli ngi ngiɓiˀay na ya. Joˀ masay a wura taŋ jom ati gwat ngi zum mizlam zlam wãˀ da ya Bumbulvuŋ. Masay miga mezegwel ngi pula mungra ngi mbur mici ar mungra na le na, naɓa ya Bumbulvuŋ i pulaŋ mungra naŋ le ya.