Read South Giziga LEV 5 Bible Online

LEV 5 - South Giziga bible

LEV 5

¹Kaɓa ani so, mbur a cin na, ara zilam mizli haɗa haɗa ng'ar kiita, ɓa a gam sedewo ar ɓi mucuhu. Ɓi mucuh na, naŋ a si na le, yo a pura le ngbaŋ, amma da a ngum njika ɓi naŋ ta na, kite a zuɓa zayɓi ngi mungra naŋ le nga hirnga naŋ.

²Ɓi mekelem ani ma: Mbur mija haŋ le avu gwat misi dili ko wanaka gar, manja a sinaŋ: maara ngi gwat misãmi ngi ɓuh, mitika le ngi zum, ko maara ngi ginew malla mevreŋ ngi zum tahay gar na, naɓa a tiri le naŋ ti dili, yo a ci le ar mungra.

³Malla ta na, mbur a ja haŋ le avu mbur misi dili, dili wanaka gar matiri ti mburo naŋ ti dili. Mbur nah, a si na zleˀe ta. Akẽh na, naŋ misa si na le sin muduba na, naɓa a ci le ar mungra.

⁴Kaɓa ani ma na, mburo, tir manja sin naŋ na, a hudum manja a wuluko si. Hudum naŋ nah na, a saŋ ti malambaˀ malla mezle nga hirnga naŋ gu. Ar ɓi wanaka gar, mbur mahudum manja wuluko, da naŋ misa si na le sin muduba na, naɓa a ci le ar mungra.

⁵Da mbur a ci le ar mungra pal a wuzla tayna na, sey a njika, naŋ migi mungra na ar gwat hana, hana.

⁶Yo gwat naŋ maso di, ɓa ngi ɗiya mungra naŋ miga avu ya Bumbulvuŋ na, sey gwat mongoso, tumuŋ malla ˀaw, ɓa ngi gi mikuli ngi pula mungra naŋ. Akẽh na, masay a sa gaŋ mezegwel ngi pulaŋ mungra naŋ na.

⁷«Da mburo, gwat naŋ anta ngi vula tumuŋ malla ˀaw ngi ɗiya ɓi ngi mungra naŋ miga na ta na, ko gonokoy cuw malla ɗiyuw dirgwaɗay cuw kwana, a so taŋ da ya Bumbulvuŋ gu. Purla mekeleme, ngi gi mikuli ngi pula mungra naŋ miga na, yo purla numuŋ kwana, ngi zlum zlam zlam wãˀ.

⁸Mburo, a vula taŋ da masay, joˀ masay kwana, a gi dumbuŋ da ya Bumbulvuŋ, i mikuli ngi pula mungra ngi mbur miga na. A ngila ˀay ngi ɗiyuwo ngir tisi kulete, amma a buko buk wãˀ ta ɓula.

⁹A kuca pumbus naŋ nga hur li gi mikuli gun gun. Joˀ a pula is ngi pumbus tuwa, a mul ng'asi virzi ngi li gi mikuli. Hana i mikuli ngi pula mungra.

¹⁰Ɗiyuw mucuw naŋ na, a gi di mikuli mizlam zlam wãˀ kaɓa muɗuvaka jiviɗ naŋ. Da masay, a ga mezegwel ngi pula mungra ngi mburo le kanah na, naɓa ya Buymisemuŋ i pulaŋ mungra naŋ miga na le.

¹¹Da mbur a luuma gonokoy cuw malla ɗiyuw dirgwaɗay cuwo gu ta ma na, ko da i hapa kilo makir kwana, a so di ngi gi mikuli ngi pula mungra naŋ vuna gu. A pi mal anga ta, yo a ki mukuturɓuy ngi zlum ti zlum anga ta, asi i mikuli ngi pula mungra.

¹²Mbur nah a so ti hapa tuwa da masay, masay a hil hapa tuwa ngbal haŋ kuy kuy. Hapa mingbal haŋ hana, a zilaka‹wuluk keŋ.› Joˀ masay a wura taŋ jom ati gwat ngi zum mizlam zlam da ya Bumbulvuŋ ar li gi mikuli. Hana i mikuli ngi pula mungra.

¹³«Masaya, da naŋ miga mezegwel misi kahana le a hirnga mbur migi mungra pal a wuzla mungra tayna na, Buymisemuŋ a pulaŋ mungra naŋ le ya. Masay a ga mezegwel hana kaɓa magakaa ti gwat ngi migam.»

¹⁴Bumbulvuŋ a ɓa Moyise na:

¹⁵«Mburo, tir manja sin naŋ na, a gi mungra madiɗa le, asi a zluɓa vula gwat mihĩˀĩ da ya Bumbulvuŋ na le. Na, ɓa ngi ɗiya ɓi nah avu ya na, sey a so ti zlengerek manja hereweɗ ava. A jo di a wuzla tumuŋ naŋhay, yo anja naŋ puɗaw kaslsla avu cikili magam di slra ar hay nga ya Bumbulvuŋ tapasaŋ, ɓa a gi di mikuli ngi ɗiya ɓi naŋ.

¹⁶Waɗ ma na, naŋ muzluɓa vula gwat ar hay nga ya Bumbulvuŋ tuwa na, a wurkaŋ. Yo a wuɗuka cikili ngi gwat ngi vul vuna taˀ taˀ zlum, waɗ a vulo pal bac nga mi gwat naŋ mawuɗ a gi di mikuli vuna, a vula da masay. Da masay a ga mezegwel ngi pula mungra ngi mburo le ti zlengerek ngi ɗiya ɓi tuwa na, Buymisemuŋ a pulaŋ mungra naŋhaya le avra.

¹⁷«Ɓimuɗuva nga ya Bumbulvuŋ, misi i mitika jiviɗ naŋ le ngi gi na, da mbur a ngil ɓi le purla a wuzla taŋ, tir manja sin naŋ na, kite a ci le ar mungra, yo a zuɓa zayɓi nah le nga hirnga naŋ.

¹⁸Ɓa ngi gi mikuli ngi ɗiya ɓi nah na, sey a so ti zlengerek manja hereweɗ ava, zlengerek naŋ mujo di a wuzla tumuŋ naŋhay. Anja naŋ kaslsla avu cikili ngi zlengerek ngi mikuli ngi ɗiya ɓi. Da masay a gaŋ mezegwel ngi zula mungra naŋ miga waˀ waˀ ta tir manja sin naŋ tuwa le na, ya Buymisemuŋ i pulaŋ mungra naŋ na le ya.

¹⁹Hana i mikuli ngi ɗiya ɓi, asi mbur nah na, avu ya Bumbulvuŋ, a ci le ar mungra gisiŋ gisiŋ.»

²⁰Bumbulvuŋ a ɓa Moyise na:

²¹«Mburo, a gi mungra madiɗa le, a hiryi ɓi le avu ya Bumbulvuŋ, a gi slir vur gwat sukum naŋ miwi di vu ava na, ɓa a vulaŋ di mata, malla gwat naŋ mididiɗa ava, a maŋ di ta, malla a huloŋ ti hul, malla a zuma sukum naŋ ti zum,

²²malla gwat ngi sukum naŋ mizizi na, a luuma le, amma ara ngil mi. Malla ta na, a gi mungra le pal a wuzla mungra tayna vuna ngbaŋ, amma a hudum na si.

²³Mbur migi malambaˀ le kahana, yo mici le ar mungra na, sey a mi ti gwat naŋ muhulo na, yo gwat naŋ mitiɓa ti gidaŋ avu sukum naŋ na, sey a maŋ di, gwat sukum naŋ miwi di vu ava na, sey a maŋ di, yo gwat mizizi, naŋ muluma na, sey a maŋ di,

²⁴malla gwat naŋ muhudum aseˀe ti slir gar na, tapas naŋ misa si na le, a ci le ar mungra na, sey a wurka gwat nah cineˀe. Yo a wuɗuka cikili ngi gwat ngi vulo taˀ taˀ zlum, a vul pal bac nga hirnga gwat ngi mikuli. Joˀ a vula da buy ngi gwat migisiŋ gisiŋ na a muŋ.

²⁵Ɓa ngi ɗiya ɓi avu ya Bumbulvuŋ na, sey a so ti zlengerek manja hereweɗ ava. A jo di a wuzla tumuŋ naŋhay. A so di da masay. Anja i zlengerek mindila le kaslsla avu cikili muvulaka ngi hiɗika zlengerek ngi gi mikuli ngi ɗiya ɓi.

²⁶Da masay, a ga mezegwel ngi zuɓaŋ mungra naŋ na le a mbuŋ ɗu na, gwat naŋ miga gar ngi ci ar mungra na, i mupulaŋ di le.»