Read South Giziga LEV 6 Bible Online

LEV 6 - South Giziga bible

LEV 6

¹Bumbulvuŋ a ɓa Moyise na:

²«Aroŋ ati ziri naŋhaya, ɓa taŋ ɓi ngi gwat ya mawuɗ ani: Ɓi ngi mikuli ngi zlum zlam zlam wãˀ: Mikuli hana a hin kap ti duvuɗo ar li zlum hã ti mipriki. Vu naŋ da, ara tiɓi ar li gi mikuli na si.

³Masay a ka jibe naŋ mija ti gugumay mislirkeɗ waɗ kalsoŋ ngi gugumay mislirkeɗe, kulaˀ a virzi. Fucu mingiˀ ngiˀ ngi gwat ngi mikuli mizlam zlam tuwa, a zoho di zah zah tir li gi mikuli taˀ murvay.

⁴Dar akẽh, a cuko zanahaya, a ki zana mekelemey. A hila fucu mingiˀ ngiˀ tuwa nga duba gala, ara pa ar li manja dili.

⁵Vu misi ar li ngi gi mikuli na, ara tiɓi ndrehhe, ko anta pam le ta ndiɗaˀ. Vur miprik gar na, masay a pi musluŋvu ng'araŋ, a ka gwat ngi mikuli ngi zlum ti zlumo nga hirnga naŋ. Li misi mal naŋhaya, masay a wura taŋ ngi gi mikuli ngi ngiɓiˀay.

⁶Vu ara tiɓi ndrehhe ar li ngi gi mikuli, ko anta pam le ta ndiɗaˀ.»

⁷«Mikuli ti gwat ngi migamaya, gi mezegwel naŋ ani: I ziri ngi Aroŋhoy magaka da ya Bumbulvuŋ, a mbuŋ li gi mikuli.

⁸Hapa milihiɗa ti mal ɓa ngi vul ngi gi sedege da ya Buymisemuŋ na, a hilam ngbal haŋ, waɗ mukuturɓuy miɓaˀ ar hapa ngi vul ngi gi sedege tuwa paɗ wãˀ. Joˀ a wuraka ar li gi mikuli tuwa. I urdi ngi tisliy mevel da ya Bumbulvuŋ, ya mawulka mbur nah keŋ ava.

⁹Is naŋ mandir na, Aroŋ ati ziri naŋhay a zumakaŋ. A zumaka nah manja ˀis araŋ, yo a zumaka ar li mipal, a wazlaray guɗuk ngi zlir ti ya Bumbulvuŋ.

¹⁰Hapa nah, anta slikiɗ purtaˀ le ta, a da ka kine. Mi nga taŋ, ya mavula taŋ di ar sedege ngi gwat ngi zum muwura ar vu mavulikiy di na, i nah. Naŋ pal, naŋ kaɓa is ngi mikuli ngi pula mungra malla mikuli ngi ɗiya ɓi avu ya Buymisemuŋ.

¹¹Mazumama, sey ziri mizile, dideˀ ngi Aroŋhoy tewle. Hana i mi ngi kum vur dideˀ, vur dideˀ hã ngi sete. Mikuli ngi gwat ngi zum muwura da ya Bumbulvuŋ na, mi ngi kum, ya muvulukum di anga i hana. Ko mi gar muwusa le na, a sa tiri naŋ pal.»

¹²Bumbulvuŋ a ɓa Moyise na:

¹³«Aroŋ ati ziri naŋhaya, tapas taŋ micaka taŋ le ar slra ngi gi mikuli da ya Bumbulvuŋ na, gwat ngi vul taŋ masa sikiy di ani: Hin gar na, hapa kilo makir, reta ti miprik, reta ti pastaˀa.

¹⁴A lihiɗa hapa tuwa ti mal lahaɗ lahaɗ kuy kuy, waɗ a da ar goŋgoŋ madam di ɗaf. Hapa mukutommo tos tos ar vu tuwa, a ngila meɗ meɗ, dar a vula ngi sedege ar deɗe ngi urdi ngi tisliy mevel da ya Bumbulvuŋ.

¹⁵Dideˀ ngi Aroŋ wanaka gar misa tiri masay madiɗa le na, a sa ga kanah ya. Hana i gwat ngi sedege ngi vul da ya Bumbulvuŋ ndrehhe. A wuraka war war wãˀ da ya Bumbulvuŋ.

¹⁶Mikuli masay mavula gar na, a zlumaka zlam zlam wãˀ, anta zumaka ta.»

¹⁷Bumbulvuŋ a ɓa Moyise na:

¹⁸«Ɓa Aroŋ ati ziri naŋhaya na: mikuli ngi pula mungra na, mezegwel naŋ ani: Li taŋ maslaka ginew ngi zlum zlam zlam wãˀ a mbuŋ ɗu na, ginew ngi mikuli ngi pula mungra, a slaka ˀay naŋ anga ya. Hana i gwat mipal wãˀ.

¹⁹Masay maga mikuli nah na, sey mazuma useˀ nah i naŋ. Sey a zumaka ar li mipal , a wazlaray guɗuk ngi zlir ti ya Bumbulvuŋ.

²⁰Ko mi gar muwusa useˀ nah le na, a sa tiri naŋ pal. Yo da pumbus naŋ a mul le ng'avi zana na, sey ki ra buna pumbus misi avu zana na ar li mipal.

²¹Misirgaɗ, midaka useˀ anga na, a wahaka avra. Amma da a da ka zleˀe ar magayak ngi ɓiri gaza na, sey a giraka gar gar waɗ kikeɗ kikeɗ avra ti yam.

²²Useˀ nah na, mbur ngir sukwi ngi masay gar na, a zuma zuy. Hana i gwat mipal wãˀ.

²³Amma ginew ngi gi mikuli ngi pula mungra, musoko ti pumbus naŋ le angi guɗuk ngi zlir ti ya Bumbulvuŋ, ɓa ngi gi mezegwel ngi pula mungra angi li mipal na, anta zumaka useˀ naŋ ta wãˀ, sey a wuraka ti wur.»