Read South Giziga LEV 9 Bible Online

LEV 9 - South Giziga bible

LEV 9

¹Angi hin midangafaɗ naŋ na, Moyis a zila Aroŋ ati ziri naŋhay, waɗ mizli micawwa ngi Israyeleye.

²Moyis tuwa, a ɓa Aroŋ na: «Ji zuŋ sla ngi gi mikuli ngi pula mungra, waɗ zlengerek ngi zlum zlam zlam, taŋ cuw taŋ manja hereweɗ avu taŋ, yo ɓa ki biga taŋ a mbuŋ Bumbulvuŋ.

³A dirba nah na, kisa ɓa Israyeleye na: ‹Jam bazuway ngi gi mikuli ngi pula mungra, yo zuŋ sla waɗ zuŋ tumuŋ ngi vi pal palay, taŋ cuw taŋ manja hereweɗ avu taŋ, ɓa ngi gi mikuli mizlam zlam wãˀ,

⁴gusoŋ waɗ zlengerek ngi gi mikuli da Bumbulvuŋ ɓa ngi ngiɓiˀay, waɗ hapa ngi vul mufukuɗa ti mal. Asi mike na, Bumbulvuŋ a sa bugukum vu dana.›»

⁵Israyeleye, gwat Moyis miɓa ɗaˀ le gar na, a soko taŋ nga mizlingre guɗuk ngi zlir ti Buymisemuŋ, yo zigiduw gar a kirahawa waɗ taŋ dedeŋ a mbuŋ Bumbulvuŋ akẽh.

⁶Moyis a ɓi: «Ɓa dudok ngi Bumbulvuŋ a bigi vu avu kumo na, gwat Bumbulvuŋ muɓukum di ɗaˀ le, ɓa ki gaka na, i hana.»

⁷Akẽh na, Moyis a ɓa Aroŋ: «Kirih ng'avi li gi mikuli, ga mikuli ɗik ngi pula mungra, yo mikuli ngi zlum ti zlumo, ɓa ngi gi mezegwel ngi pula mungra ɗik ati ngi mizli. Yo gwat mizli muvulaka na, gi taŋ mikuli, ɓa ngi gi mezegwel ngi pula mungra taŋ, kaɓa Bumbulvuŋ miɓa ɓi nah ɗaˀ le.»

⁸Akẽh na, Aroŋ a kirih ng'avi li gi mikuli, a sla ˀay ngi zuŋ sla ngi gi mikuli ngi pula mungra ngi hirnga naŋ.

⁹Ziri naŋhay a bigakaŋ pumbus ngi ginew tuwa, a ca muzuŋ haŋ naŋ ar pumbuso yop, dar a ga da hirnga ngi li gi mikuli muyoŋ yoŋ kaɓa durumoyo, waɗ a mbiɗa is ngi pumbus tuwa pulaˀ ng'asi virzi ngi li gi mikuli.

¹⁰A ɓi ɓa a wuraka mungul naŋhaya ar li gi mikuli, ɗugur dubahay waɗ guzluzluk ngi mevel ngi ginew vuna torro, kaɓa Bumbulvuŋ muɗuva da Moyise.

¹¹Useˀ naŋ ati garaka, ara wura taŋ a duba gala.

¹²Aroŋ a sla ˀay ngi ginew ngi gi mikuli ngi zlum ti zlumo. Ziri naŋhay a tiɓakaŋ pumbus naŋ, a kuca ciki li gi mikuli gun gun zlar ti naŋ.

¹³Ginew ngi gi mikuli mizlam zlam tuwa, a vulakaŋ di, mupuwa naŋ paw paw le, jom ti hirnga naŋ, a ɓi ɓa a zlumaka taŋ ar li gi mikuli.

¹⁴A buna gwat ngi kwacay naŋhay ati poprokoyo, a pa taŋ sek a hirnga useˀ tuwa, a wura taŋ jom ar li gi mikuli.

¹⁵Akẽh na, gwat mizli muvulaka taŋ na, Aroŋ a biga da Bumbulvuŋ. A ja bazuway ngi gi mikuli ngi pula mungra ngi mizli, a sla ˀay naŋ, a gi di mikuli, kaɓa migam ti ginew mudumbuŋ tuwa.

¹⁶A biga ginew mucuwoy ngi gi mikuli mizlam zlama, a gi taŋ mikuli kaslsla ti jiviɗ naŋ.

¹⁷A biga hapa ngi gi sedege, a hil ngbal haŋ kuy kuy, a zluma ar li gi mikuli, bac ng'avi mikuli ngi zlum ti zlum vur miprik gar na.

¹⁸Gusoŋ ati zlengerek, mizli muvuloko taŋ tuwa, Aroŋ a sla ˀay taŋ ngi gi mikuli ngi ngiɓiˀay. Ziri naŋhay a tiɓakaŋ pumbuso, a kuca ciki li gi mikuli gun gun zlar ti naŋ.

¹⁹Gusoŋ ati zlengereke, li misi mal naŋhaya: zle avu dangwal naŋ, mal misirit sirit ar gwat ngi kwacay taŋhaya, ɗugur dubahay ati guzluzluk ngi meveleye tor tor,

²⁰a pa taŋ sek sek ar didak taŋhaya, dar a wura taŋ ar li gi mikuli.

²¹Didakay ati tuwal paw vay hazumo, Aroŋ a gi taŋ mikuli kaslsla kaɓa magam mezegwel ngi vula gwat a mbuŋ Bumbulvuŋ, kaɓa Moyis miɓa ɗaˀ le.

²²Akẽh na, Aroŋ a hila haŋ a muŋ ng'ar mizli, dar a ɗuwula taŋ mi, waɗ a pi sar nga ruwuy a muŋ, naɓa mikuli ngi gi ngi pula mungra, mikuli ngi zlum ti zlum ati mikuli ngi ngiɓiˀay gar na, a kiɗa mi ngi gi taŋ le.

²³Moyis ati Aroŋ a cam ng'ar guɗuk ngi zlir ti Buymisemuŋ, a boko a muŋ, ɓa a ɗuwulaka mi da mizli, dar Bumbulvuŋ a biga dudok naŋ da mizli gar.

²⁴Vu a bo ti mbuŋ Bumbulvuŋ, a zluma mikuli ngi zlum ti zlum ati munguloy tuwa, zlam zlam ar li gi mikuli. Mizli gar mupuraka kanah na, a jam salalay, a hurukom huruk huruk a ruwuy.