Read South Giziga JER 10 Bible Online

JER 10 - South Giziga bible

JER 10

¹Mizli Israyeley, cinaka mingiɓi Bumbulvuŋ maɓa ar kum!

²Bumbulvuŋ a ɓi na: «Ki dubunaka gwat ngi gi ngi sukwi mekelemeye ta! Gwatay magam a muŋ ngi bigi gwat na, anja a zluwunukum ta! Vur mapulaka vu taŋ mbak, ɓa gwat tayna a zluwuna taŋ na, i sukwi mekelemey.

³Asi sipi jiviɗ ngi mizli mekelemey na, i himiɗ ngatara lambaˀ kine. I dum taŋ mungumoko di ti ngum a ɓuh, misina ciɗa gwatay miciɗaka ceɗ ceɗ ti meceɗ.

⁴A puyakaŋ ɓiri bara ati ɓiri tapasl tapasl kor kor, waɗ marto dar dar ti naŋ ti ponti, vur naŋ mawus gengel gengel.

⁵Kuli miciɗa tayna, taŋ kaɓa majuwam gwat ngi zluwuna gwat misãmihey ar guva ngi tatiyak, t'anta ɓam gu ta, sey a jijiraka taŋ ti jijir, asi a ram digi gu ta. Vurˀe, ko ki zluwunam ti taŋ neˀ le ta: anta a gukum malambaˀ ko neˀ gu ta, t'anta pulukum gir ko neˀ gu ta ma kini.

⁶Bumbulvuŋ, mbur misi kaɓa ka, anta! Ka madiɗaŋ, yo slimiɗ ɗike, ara zil haɗa asi ka magi gwat madiɗahay.

⁷Ka buy madiɗa ngi sukwi ngi mizli gar, mazluwun ti ka ta i waka? Zluwuno, sey ti ka. A wuzla mizli misi sinmijileŋ ngir sukwi ngi mizli gar, yo ar zumabuy taŋhay gar na, ko mbur misi kaɓa ka anta.

⁸Taŋ cek i gilaway, manja lesley. Mudubuna taŋ gwata i dum ngatara lambaˀ.

⁹Kuli tayna i ɓiri bara kembreˀ kembreˀ, musoko di ti Tarsis, yo i ɓiri tapasl tapasl musoko di ti Ufas, migaka slra nah i misina slra ngi ɓirihey ati mipi ɓirihey ti pi, aka ka taŋ zana gagaza wit wit, waɗ gagaza ndezze. Miɗiyaka taŋ cek i misina ɗiya gwatay tewle.

¹⁰Amma Bumbulvuŋ Buymisemuŋ mikaslsla, i Buymisemuŋ misi ti siifa, buy madiɗa hã ngi sete. Da naŋ miji mevel le na, hirwuy a jijik ngbir ngbir, yo sukwi ngi mizli anta ɓusaka himaˀ naŋ na gu ta.

¹¹Ki sa ɓaka taŋ na: Kuliheye, migaka muŋ ati hirwuy i taŋ ta, sey a susuymoko taŋ asi ruwuyo, waɗ tisi gazlavaya.

¹²Miga muŋ i Buymisemuŋ ti gidaŋ naŋ, mucufa duniya i naŋ ti sin naŋ mijileŋ, yo miciya muŋ cay i naŋ ti sin ngi lesl naŋ.

¹³Naŋ miɓi le ɗaˀ si na, miviɗiviɗi ngi yam a cikil a muŋ, a go gazlavay mititim titim asi diˀise, a ga vuŋ a wucuɗ, ɓa vuŋ a gi, yo a pulo himiɗe tir li naŋ miwi di vu weˀ anga.

¹⁴mbur gar na, a ndir ngirkik, a sla wala ngi gwata ta, mbur mipi ɓiri gar na, a ndir ti mesem ti kuli naŋ tuwa: kuli miciɗa ti ciɗ tayna i gwat ngatara lambaˀhay, musuwun anta a hur taŋ ta.

¹⁵I gwat ngi gilaway, gwat ngi gi singir tewle, tapas slufa ɓi a mbuŋ Buymisemuŋ na, a sa zizam.

¹⁶Buymisemuŋ, i zlili ngi Israyel, naŋ na, naŋ kanah ta, miga gwatay gar i naŋ, yo sukwi Israyele i mi nga naŋ. Bumbulvuŋ misi gidaŋ wãˀa, i slimiɗ naŋ.

¹⁷Zeruzalem, a ndihukuw le ndah ndah, hila gwat ɗikey misi a ruwuyo!

¹⁸Asi Bumbulvuŋ a ɓi na: «Wurenna, i sa hiziga mizli ngi si ruwuyoyo ti ŋvehŋvehlu muduba, i sa ga ɓa a ndiram guc arleˀe, vur taŋ makilam.

¹⁹Zeruzaleme, ara tuwuy: «Kay, bonoy mike gawlay! Waˀa ɗu anta kuf ta! Yi ɓi le: i malambaˀ ɗu ya miga na kini takwa! Sey i ɓusa.

²⁰Ani a puwikiy guɗuko le paw paw njeɗek, a slaka zeweɗ naŋhaya le gar. Ziri ɗuwoy ati ginew ɗuwoyo, t'anta mata! Mbur ɓa a ɗiyiy guɗuko, hiri naŋ a muŋ, yo ɓa a cica walahay guɗuk ɗu, hiri naŋ a muŋ na, anta mata!

²¹Mijigina mizli, a gam gilaw le, t'anta sipaka Bumbulvuŋ ta. Taŋ mindilaka mizli ta na vurˀe, mbak ginew gezleŋ taˀ na, a zliɗam hirnga lambaˀ.

²²Ɓi mandilo na, i ra cinaka ti ruwuy ti ruwuy, i ɓi ngi muɗa didak maso tir vay muŋ, ɓi masa tiri ti ruwuy Zuda daŋ daŋ, a tiri di hay ngi sunduhoy.

²³Aw Bumbulvuŋ ɗu, i si na le, mburo, jiviɗ naŋ mira zuɓa na, naŋ i buy naŋ ta, mbur mazuɓ mulaka, sar naŋ maɗuva taˀ taˀ na, i naŋ ti haŋ naŋ ta.

²⁴Aw Bumbulvuŋ ɗu, kutiy, amma kutiy weˀe si, anta ti mevel ta ɓula, da kanah ta na, naɓa ani kisa ziza hutuŋ ɗu wãˀ.

²⁵Pa himaˀ ɗike ng'ar sukwi misinukuw ta na, ng'ar mizli mazilam di i slimiɗ ɗik ta na. Asi ara zumaka mizli ngi zakopoyo, ara zumaka taŋ, a ngizlaka taŋ le njeleleŋ, a tiram ti hirwuy naŋ le daŋ daŋ.