Read South Giziga JER 14 Bible Online

JER 14 - South Giziga bible

JER 14

¹Bumbulvuŋ a ɓa mingiɓi naŋ da Zeremi vur kwalay.

²«Mizli Zudahay a roko ti tuwuy ngi vagay, walahay naŋhay ara zizam, mizli curusl curusl a ruwuy, hiri hindrik hindrik, widi ngi Zeruzaleme, ara zuɓ nga muŋ.

³Mizli micawwahaya, a tikaka ˀay da mizli mizleweye nga nuwa taŋ yam. Ndol a mi futuŋ a diga na, ko yam tes anta, a mam ti gwat ngi nuwa yamaya njoŋ njoŋ kine, a sinaka ɓa a gam kini ta, tilingir tilingir ti mesem, hirnga jik jik a ruwuy.

⁴Muhuvoy a sinaka ɓa a gam kini ta, a roko hirnga jik jik a ruwuy, asi vuŋ magi ta tuwa na, li gar i ɗalak.

⁵A ɓuh kwana, muuni miyi le cak na, a cuh gwat naŋ, asi gwat mutukuzo bilew tekeɗe anta.

⁶Zungu ngi ɓuhoy a cicam dedeŋ ar li miɗigar ɗigaray, a zãˀãka himiɗe kaɓa sunduhoy, a giram gar ar li pura hiri, ɓa a lumam giziŋ kwana, amma ko giziŋ fiɗek tekeɗe anta.

⁷Aw Bumbulvuŋ ɗu, da mungra ndrahay ara mbiɗam ndra hirnga tehhe a muŋ na, gi gwat neˀ ɓa ngi ɗuva hirnga da slimiɗ ɗike! Naŋ kanah ɓula, i ra jam mi ndrehhe: i sinukuw ta, i sinukuw ta, i zluɓam ɓi le avu ka.

⁸Israyel muro hiri njahha na asi ka, ka malih vu ar hin ngi bonoyo na ki ga vu ɗik kaɓa mbur mulak asi ruwuyo vur mike? Yo kaɓa mulak muloˀo ti liˀi, put ti miprike, a zuɓa jiviɗ naŋ a muŋ na, vur mike?

⁹Ki ga vu ɗike kaɓa mbur misi didak mumuɗaŋ le mbrike? Yo kaɓa mbur bugawla malih vu gu mata mbrike? Dambalaka k'ada a wuzla ndra vuna ngbaŋ Bumbulvuŋ, ndr'i mizli muvulahay le da ka, ki pula ndra ta!

¹⁰Bumbulvuŋ a ɓa mizli tayna tuwa na: «Kanah, a wuɗam nga taŋ i liˀi, hirnga kaˀ lambaˀa, t'anta deŋ ar li purla ta.» Vurˀe, gwat ngi gi taŋ anta cira hiri da Bumbulvuŋ ta, malambaˀ taŋ a ro keŋŋe a hirnga naŋ, a kuta taŋ kuti ngi bonoy asi malambaˀ taŋ na.

¹¹Bumbulvuŋ a ɓiy na: «Ki cici ar ɓi ngi mizli tayna ta, ki ɗuwul mi ɓa a ndiram ar wuya ta!

¹²Ko da ara gam dalyam kwana, y'anta cine tuwuy taŋ ta. Ko da ara gikiy mikuli mizlam zlam, yo ara sikiy ti gwat ngi vul taŋhay tekeɗe kwana, naŋ anta ciriy hiri ta. I wuɗ i ngizla taŋ pay ti maslalam, ti may waɗ ti jiji mozorbono.»

¹³Yi mbiɗaŋ di: «Kay, Bumbulvuŋ Buymisemuŋ, na mijiviɗey a ɓaka taŋ: kum anta sa puram vurum a hay kumo ta, may anta sa lumukum gurjik ta, Buymisemuŋ a sa vulukum zuy migisiŋ gisiŋ naŋ ar li hana.»

¹⁴Bumbulvuŋ tuwa, a mbiɗiy di: «Ɓi mijiviɗey minjikaka ti slimiɗ ɗu na, naŋ jeŋ ta. Ko yi slina taŋ ta, yi ɓa taŋ ɓi ɗaˀ le ta, yi ɓa taŋ ta si. Pur taŋ ti kleŋ na, i jeŋŋe ta, i hiziga njol, i li mawucuɗ lambaˀ ka yam kileŋ a mbuŋ taŋ, i cikil ngi kiɗa may taŋ, ɓi taŋ manjikaka, i nah so!»

¹⁵Vurˀe, Bumbulvuŋ a ɓi na: «Mijiviɗ tayna, a njikam ɓi ti slimiɗ ɗu, dambalaka i ya mislina taŋ vuna ta. Amma a waka kaɓa vurum ati may anta sa ci asi ruwuy hana gurjik ta kini. Na i maslalam ati may masa ziza mijiviɗ tayna cummo.

¹⁶Yo mizli taŋ manjikaka taŋ ɓi na, may ati vurum a sa kiɗa taŋ sunokko a jiviɗ madiɗa ngi Zeruzalemeye. Taŋ vuna, ngwas taŋhay, ziri taŋ mizile ati mongosohoyo, ko mbur loŋ anta ngi sa dik taŋ ta. I sa pa moˀore taŋ na nga hirnga taŋ tehhe a muŋ kahana.

¹⁷Ki sa ɓa taŋ ɓi ani: «Duvuɗ ti papasa, i ro hiri hindrik hindrik ti tuwuy, ko teˀ le anta, asi bonoy madiɗa a luuma mizli ɗuwoyo le, i ɓi ngi muc muluma taŋ.

¹⁸Da ya mibi le put nga pala na, i pur di i vagay ngi mizli kuros kuros, mikiɗahay ti maslalam. Da ya mimi le ng'ar walahay na, i pur di i mizli saɓaɓa, may makiɗa taŋ. Mijiviɗey ati masayaya, a bulaka hirwuyo bal bal, amma ko anta slam wala ngi gwat neˀ mata.»

¹⁹Aw Bumbulvuŋ, ki pula hirwuy Zuda fuk wãˀ, yo hirwuy Siyoŋ a ɓuluw mi le wãˀ sukwa? Ki kiɗa ndra ti waˀa misi slalak naŋ anta, vur mike? I ra njaham hiri zleˀe, ɓa i mbulom, amma ko ɓi mezle loŋ anta, hin masa ndilo ndra, zliv i mbulom le na ma na, amma mandilo ndra, i gwat magi zluwun jak ma.

²⁰Bumbulvuŋ ɗu, i sinaka mungra ndra madiɗa le, yo i sinaka malambaˀ ngi dideˀ ndraˀahaya le, gisiŋ, i zluɓam ɓi le avu ka.

²¹Ki hiris vu ta, ɓa ngi ɗuva hirnga da slimiɗ ɗike, janga misi dudok ngi ka buyo, ki pura hiris le ta! Jumoˀay ɗik ati ndra na, wulka keŋ.

²²A wuzla kuli ngi sukwi ngi mizli na, magi vuŋ gu ada asi taŋ kwa? Malla mago vuŋ malasar na, i muŋ vuna kwa? Mago di i ka Bumbulvuŋ, Buymisemuŋ ndra ta kwa? I roko hiri njahha asi ka, asi maga gwat tayna gar i ka.