Read South Giziga JER 16 Bible Online

JER 16 - South Giziga bible

JER 16

¹Bumbulvuŋ a ɓiy mingiɓi naŋ ani:

²«Ki zuɓ ngwasa ta, angi hirwuy misenna, k'anta sa yi ziri mizile malla mongosohoyo ta.

³Asi mike na, ziri mizile ati mongosohoy mayaka taŋ aka, waɗ mumuŋ taŋhay ati cine taŋhay mayaka taŋ na, ya Bumbulvuŋ i ɓi vur taŋ na:

⁴A sa micam ti bonoy ngi may, ko mbur masa tuwa taŋ malla masa dika taŋ anta. A sa ndiram ngi zãˀã li kaɓa zay gwatay tewle. A sa ngizlam ti kiɗ ti maslalam waɗ ti may, vagay taŋhay a sa tiram gwat ngi zum ngi ɗiyuwoy ati ngi gwat misãmi ngi si ruwuyoy.

⁵Haˀaw, Bumbulvuŋ a ɓi na: «Ki ci ar hay vagaya ta, ki ci ar mezegwel ngi vagaya ta, ko ki ra pur mbur ar li vagaya ta, asi zuy ya muvula da mizli tayna, ji ngama ɗu ati taŋ waɗ pura ircece ɗu na, i tiɓa le a muŋ. I ya Bumbulvuŋ maɓi.

⁶Mizli madiɗahay ati ziri ngi si ruwuy misenna, a sa micam cek, anta sa dikaka taŋ ta, anta sa tuwaka taŋ ta, cira vu ar li vagay taŋ malla hija hirnga vur taŋ anta sa gi ta.

⁷Mizli ngir hay vagayaya, ko mbur ngi sa vula taŋ gwat ngi zum anta, ko ngi tikin taŋ ɓa a taˀaka tuwuyo tekeɗe ka. Mizli misi ar vagay ngi cine taŋ malla ngi mumuŋ taŋ kwana, ko mbur anta ngi sa vula taŋ gwat ngi si ɓa ngi tikin taŋ ta.

⁸Ar hay madam ɗaf ngi muguzlumo, ki ci ng'ara ɓa ki zumam malla ɓa kisam gwat bummoˀ ati mizli mizilahaya ta.

⁹Asi mike na, Bumbulvuŋ misi gidaŋ wãˀ, Buymisemuŋ ngi Israyele, a ɓi na: ‹Salalay ati dimis ngi mumul, dimis ngi mbur muzuɓ ngwas le wureˀ malla mumul ngi ngwas muzuɓ zil le wureˀ na, i wuɗ i tika gar asi ruwuy misenna, mur kum vuna, ki ra puraka ti hiri kum.›

¹⁰Ki sa ɓa ɓi hana gar da mizli tayna, amma a sa cufuɗukuw: «Bumbulvuŋ a cico bonoy madiɗa ar ndra kahana vur mike? I gam mungra madiɗa wanaka? I zluɓam ɓi wana avu Bumbulvuŋ Buymisemuŋ ndra ka?»

¹¹Ka kisa ɓa taŋ na: «I gukum di kahana, asi dideˀ kumoy a pulikiy le, ara sipam kulihey, a huruk hurukam, yo a hurukom a mbuŋ taŋ. A pulikiy ya le mbaka, yo gwat ya mudubuna taŋ di na, a jaka a hirnga ta.

¹²Na kumo ma na, gaɗay gaɗay le wãˀ ar dideˀ kumoyo ma: Mbur gar na, naŋ da hirdam hirdam ar cin ta naŋ malambaˀ wãˀ na, ko anta ciniy di ta.

¹³Vurˀe, i wuɗ i zliɗukum zlaɗ ng'ar hirwuy mekelem, kum misinaka ta, yo dideˀ kumoy kwana a sinaka ta ma. Ki sa huruk hurukam a diga a mbuŋ kulihey, papas ti duvuɗ gar na, ko kum anta sa njaham hiri asi gi mezle ɗu mata.›»

¹⁴Naŋ kine, hin ara ndilawa, tapasa, mingiɓi: «Bumbulvuŋ mubo ti Israyeley ti ruwuy Ezipte, naŋ ti siifa!» na, anta sa ɓam kahana mata!» I ya Bumbulvuŋ maɓi.

¹⁵Amma a sa ɓam jak na: «Bumbulvuŋ misi ti siifa, mumo ti Israyeley ti ruwuy vay muŋ, yo tir lihey naŋ mizliɗa taŋ hirnga zleˀe na, naŋ ti siifa!» Haˀaw, i sa mo taŋ ng'asi ruwuy ya muvula zleˀe da dideˀ taŋhay na.

¹⁶I sa slin miji kilifey haɗi, ɓa a sa joko taŋ, i ya Bumbulvuŋ maɓi, yo i sa slin mizli a gam madala, ɓa ara supoko taŋ a muwãhay gar, ar li miɗingir ɗingirey gar, ko sesẽŋ ar butumoy.

¹⁷Hiri ɗu a ro taˀ ar gwat ngi gi taŋ, ko gwat macuh manja i pura na, anta. Gi malambaˀ taŋ anta ɗum avu hiri ɗu gu ta.

¹⁸Mungra taŋ madiɗa ati zluɓa ɓi taŋ na, i zla virzi naŋ ti pula bol nah ar taŋ makaw cuw wãˀ, asi a hiryaka sukwi ɗu le ti maara ngi kuli taŋhay na, yo a hiryaka sukwi ɗu le ti kuli taŋhay mukuyta wãˀhay na.

¹⁹Bumbulvuŋ, ki gidaŋ ɗu, ki mitika hiri ɗu, ar hin ngi bonoyo, ki li ɗum ɗu, sukwi ngi mizli ngi duniya gar na, a sa soko ng'avi ka, zle tisi ruwuy mira kiɗo mi, a sa ɓukuw na: Sipi ngi dideˀ ndrahay zleˀe gar na, i gwat ngatara lambaˀ si, i gwat ngi gilaway mapul gir ko neˀ ta.

²⁰Mburo, a ɗiyi bumbulvuŋhoy gu kwa? Na zle, a maɗiyam di i bumbulvuŋhoy ta.

²¹Yawwa, i sa vula taŋ sin, wurenna i wuɗ i biga taŋ gidaŋ ɗu, dar a sa sinaka, a zilikiy ya «Bumbulvuŋ»