Read South Giziga JER 17 Bible Online

JER 17 - South Giziga bible

JER 17

¹Malambaˀ ngi mizli Zudahaya i mutoho le gor gor ti milngama, i mutoho le nguɗ nguɗ ti ɗugur mupuɗaw gingiliw gingiliw, miyeŋ yeŋ. I mutoho le nguɗ nguɗ a mevel taŋ, waɗ avu gwat muyoŋ yoŋ kaɓa durumoy misi avu li gi mikuli taŋhaya.

²Li gi mikuli taŋhay, kuli ɓamtal taŋhay migweˀ avu widis mutukuf tukufoyoy ndrehhe, misi ar li miɗingir ɗingirey na, a wulkaka ɓi taŋ kaɓa taŋ mawulkaka ɓi ngi ziri taŋhay na ya.

³Ka Zuda, ka mahuruk huruk a mbuŋ kulihey a hirnga muwã a ɓuh na, zlili ɗik ati gwat ngisi haŋ ɗik gar na, i vula da mizli a hilaka, asi malambaˀ ɗik ka miga ar li miɗingir ɗingirey fuk si li ɗik gar.

⁴Ki sa pula hirwuyo, kisa ru kileŋ avu hirwuy ya muvuluw di na. I sa gi ti ka beke ngi mesene ɗikey angi hirwuy ka misina ta, asi ki slikiɗikiy mevele le, ara tiɓi njilim njilim ka vu hã ngi sete.

⁵Bumbulvuŋ a ɓi na: «Mbur manjih hiri asi mbur titira, masipi gidaŋ nga naŋ i dumvu tewle, mevele kileŋ avu Bumbulvuŋ na, i minisa le.

⁶A bam vu ati widis ngi ɓuh, hin ngi wuya anta ndilo ava ta: a sa ndir ar li muwura le a wuzlaɓuh mikirɗak kirɗak, li melemeɗ, misi hay anta a diga ta.

⁷Mbur manjih hiri asi Bumbulvuŋ, misi mapula vu naŋ mbak da Bumbulvuŋ na, i muɗuwulaŋ mi le.

⁸Mbur nah a bam vu ati widis mikaˀ a mi yam, maka dimbasl naŋ ngir tivi yam, naŋ anta cin pasa ta, kalaf naŋ tukuf tukuf ndrehhe, kwalay ngi vi pal na, anta zluwunaŋ ta, naŋ anta pula yi mbak le ta.

⁹Mevel ngi mburo, a tikin vu fineˀ ko mike gar, naŋ anta ɗiyi ta, mbur masla wala naŋ gu anta.

¹⁰Ya Bumbulvuŋ, i ɗumburo ɓi ngir wuluk ngi mburo, i pura mevel ngi mburo, i wurka mburo gar weˀe avu gwat ngi gi naŋ, yo weˀe avu migir ngi slra naŋ.

¹¹Mbur magi zlili ti jiviɗ mikaslsla ta na, naŋ kaɓa kucukur mahuruk ar tesl naŋ mika ta: zlili nah na, a kisaŋ kassa wurasl hin ngi siifa naŋ si, a sa pulaŋ junjuluf, angi kiɗa mi ngi siifa naŋ na, a sa ndir gilaw kiɗifir lambaˀ.

¹²Janga ngi buyoy misi ti dudok a muŋ a diga, i li mipal ngi Bumbulvuŋ ndra, zle angi ɗuva virzi ngi gwatay.

¹³Bumbulvuŋ, Israyel a ɗuva wuluko le taˀ ar ka, mizli mupulukuw le gar na, a roko ti mesem, mizli mikiraham le gar avu ka na, i mija taŋ le ti kiita, asi ara pulaka Bumbulvuŋ, miviɗiviɗi ngi yam miyaɓ yaɓa.

¹⁴Bumbulvuŋ ɗu, ɓa i mbul na, sey da ka mumbuliy le, ɓa i lih na, sey da ka milihiy le, asi ya malum dudok na, tisi ka.

¹⁵Ani mizli a ɓikiy na: «Mingiɓi ngi Bumbulvuŋ tuwa naŋ ama ska? Anja a gi so ayɗi!»

¹⁶Ka mislino bonoy na, i ya mupuw mi ta. Yi ɗuwul mi ɓa hin ngi bonoy a ndilawa ta, ka ki si na le, ɓi mubo ti balam ɗu na, i ɓa mur ɗiki.

¹⁷Ki puliy mbak i huluɓ hilaɓ hilaɓ ta, asi ar hin ngi bonoyo, ki li ɗum ɗu!

¹⁸Mizli misipi ɗuwoy nder nder na, anja mesem a kiɗ di i taŋ, a kiɗ di i ya ta jaka. Anja mahuluɓam hilaɓ hilaɓa i taŋ, mbak ya le! So ti hin ngi bonoy nga hirnga taŋ, ngila taŋ meɗ meɗe.

¹⁹Bumbulvuŋ a ɓiy na: «A ra cici a mizlingre madiɗa, buy Zudahay macam ati taŋ maboko ti raˀa na, yo kisa ra cici a mizlingre Zeruzalemeye gar kanah ma.

²⁰Ki sa ɓa taŋ na: ‹Kum buy Zudahay ati kum mizli Zudahay, kum Zeruzalemey gar macohom tir mizlingre hanayna gar na, cinaka mingiɓi ngi Bumbulvuŋ.

²¹Bumbulvuŋ a ɓi ani: Jam lesl ngi jijira gwatay tapas hin ngi sabata, yo ngi cuh taŋ tir mizlingre Zeruzalemeye.

²²Tapas sabat na, ki jijiram gwat ng'avra ti hay kumoyo ta, ki gam slra ko wanaka tapasa ta, amma anja ki tiram ti hin ngi sabata pal, kaɓa ya miɓa ɓi nah ɗaˀ le da dideˀ kumoy na.

²³Amma taŋ a tiɓaka mingiɓi ɗu ta, a jikaka slimiɗ aseˀe ta, a tiram hirnga gidaŋ, ɓi ya miɓa taŋ di ɗaˀ ɗaˀ le na, ko a ngumam cinaka ta, a ngumam tiɓaka ta.

²⁴Ya Bumbulvuŋ i ɓi: da kumo, ki ra cinikiy mi kuy kuy, yo da kum anta jijiram gwatay tir mizlingre ngi walahay hana tapas sabata ta, yo hin ngi sabata, ki ra tiram di i hin mipal, yo tapasa, kum anta gam slra ko wanaka ta na,

²⁵naɓa buyoy macifam ar janga ngi buy ngi Davit, migilaˀ gilaˀ mota ngi vurumoy malla piliseye, taŋ ati mizli madiɗa ngi slra taŋhaya, mizli zudahay waɗ mizli Zeruzalemeye, masa cam tir mizlingre ngi walahay hana i taŋ, yo mizli a sa ndiram angi walahay hana ngi sete.

²⁶Dar mizli a sa soko tir walahay zudahay, tir prok ngi Zeruzalemey, ti ruwuy Benjameŋ, tir walahay ngir li muzugudum, ti ruwuy muwãhay, ti ruwuy vay ngi ruwuyoyo. A sa soko ti gwat ngi mikuli mizlam zlam ati gwat ngi mikuli muho gar, ti gwat ngi vul taŋ ngi mikulihey waɗ mukuturɓuyoy, a sa soko taŋ jom ati mizli masa soko ti gwat ngi mikuli ngi hunuma Bumbulvuŋ ar hay naŋ na.

²⁷Amma da ki cinikiy mi, ki tiram ti sabata i hin mipal ta, ki pulaka jijira gwatay tir mizlingre Zeruzalemeye tapas hin ngi sabata ta na, naɓa yi sa bula vu mamuc ta wãˀ a mizlingreheye, ɓa a zlizlira hay mezle ngi Zeruzalemey na kuɗupu.»