Read South Giziga JER 18 Bible Online

JER 18 - South Giziga bible

JER 18

¹Bumbulvuŋ a ɓa mingiɓi naŋ ani da Zeremi:

²«Slikiɗ, aru kutum ngi hay mbur mindira gwatay, i wuɗ i ra ɓuw ɓi ɗu a diga ɓa ki cine.»

³Yi ru ngi hay mbur mindira gwatay tuwa, i ra luuma ara kiɗ hohoy ngi ndira gwata.

⁴Da mbur mindira gwatay tuwa, a bi ti jiŋ ta na, gwat naŋ mandira ti hohoyo, anta bo kuy kuy ta na, a mahiri nah a muŋ ti sin nga naŋ mbur misina ndira gwat mezleŋ.

⁵Akẽh na, Bumbulvuŋ a ɓiy na:

⁶«Kum mizli Israyeley, i gi ti kum gu kaɓa mbur mindira gwatay nah vuna ta kwa? Kum mizli Israyeley, kum a haŋ ɗu, kaɓa hohoy a haŋ mbur mindira gwata. I ya Bumbulvuŋ maɓi.

⁷Pas mekeleme, sukwi ngi mizli malla zumabuy na, i cica ɓi, ɓa i putukuso avra, i hizigiɗaŋ waɗ i hiryaŋ.

⁸Amma da sukwi nah tuwa, a zil marava le ar naŋ migi malambaˀ avu ɓi micica ɗu na, naɓa malambaˀ ya mawuɗ ngi gaŋ di na, i pula ɓi nah teˀe.

⁹Pas mekeleme, i cica ɓi ngi pi sukwi asi ruwuyo malla ngi ɗuva zuma buyo.

¹⁰Amma da a gam nga taŋ i gwat malambaˀ, ya mahĩyã ta jak, mbak cine mingiɓi ɗu le na, naɓa mezle ya mujuwa a mevel ɗu ngi ga taŋ di na, i pula ɓi nah teˀe.

¹¹Wurenna, ara ɓa mizli Zudahay ati Zeruzalemeye na: «Bumbulvuŋ a ɓukum na: I ra juw vu nga gukum bonoy, i ra mbizi ɓi a mevel ɗu vur kumo, anja ko wa gar na, a zil marava ar gwat ngi gi naŋ malambaˀa. Haˀaw, kpak kum ati ngi gwat ngi gi kumo, ɗiyaka hiri naŋ amuŋ.

¹²Amma taŋ a sa ɓam: «A ca ndra ta! I sa gam ngi ndra i gwat ndra mihinam di a kwacay ndra na si, yo mbur gar a sa cici kaŋ kaŋ ar cin ta naŋ malambaˀ wãˀ na.»

¹³Vurˀe, ani Bumbulvuŋ a ɓi na: «Kaka virzi ngi ɓi ani a wuzla sukwi ngi mizli mekelemeye: Ki cinam gwat migi kahana ɗaˀ ta kwa? Israyel mungbuˀo kine na, a gi malambaˀ mimadiɗa le.

¹⁴Slaslalay mubuk buk a muwã Libaŋ, mapo tir mandazlay muwã nga ɓuhoy na, a tik kwa? Yam miyaɓyaɓ maɓulo baɗ ar li mikileŋ na, a pul kwa?

¹⁵Na mizli ɗuwoyo, a puyukom ti ya hirnga le, ara wuram gwatay taŋ mavulaka taŋ da gwat lambaˀhay, gwatay mabaka taŋ sar ar buwalay, a jiviɗ taŋ misi zleˀehey, a zuɓam jiviɗ mikelew kelewey, buwal manja cir.

¹⁶Ma na, a tiram ti ruwuy taŋ le, i li puɗak puɗak, daŋ daŋ, joˀ mizli a singiram angaŋ. Mizli macohom ti raˀ a gar na, a zluwunam, a hizigiɗam hirnga deŋ.

¹⁷I sa zliɗa taŋ hirnga mber mber a mbuŋ mesene taŋhaya, kaɓa himiɗ ngi si pas ngi miprik mazliɗ gwat. Ar hin ngi bonoy mindilo le na, i mbiɗa taŋ duba, i ɗuv hiri avu taŋ ta.

¹⁸A ɓam: «Akum, i ra kiɗaka mi ngi ɓi ndra majuwaka a kwacay vur Zeremi na wãˀ muduba. Masayay a sa bigam ndra jiviɗ ngi Buymisemuŋ, i sa lumam mi ngi kuti avu misi sinmijileŋheye, i sa lumam mingiɓi avu mijiviɗeye si. Akum so, i ra hiryakaŋ ti mi muhuzlok huzlok, ko i kam slimiɗ ar mingiɓi naŋ ta.»

¹⁹Aw Bumbulvuŋ ɗu, jika slimiɗe kuy kuy asi mingiɓi ɗu na takwa, cine ɓi ngi mizli makipikiy di na.

²⁰Ada maka mezle ti malambaˀa makwa? Taŋ a gunikiy hirnga ɗu le gun gun ti gadaŋhay. Inga wulka keŋ takwa, ya micici a mbuŋ ɗik na, ɓa i cik vu vur taŋ, yo ɓa i tisluw mevel ɗik mufõh fõh ng'ar taŋ na.

²¹Da kine na mbak so, vula ziri taŋhaya, ɓa may a ngizla taŋ, pa taŋ haŋ ɓa maslalam a zuma taŋ. Anja ngwas taŋhay a mucaka ziri ati zil taŋhaya, anja muc a kiɗa mizli mizileheye, yo gawlahaya kwana, anja a kiɗaka taŋ ti maslalam ar vurum.

²²Ti ka misa slino mivi vuhoy le gurjik ngi hay taŋ na, anja widi ngi bonoy a cin ngirzliŋŋe a hay taŋ, asi a gunikiy hirnga le gun ti gadaŋhay ɓa ngi ji ɗu, a pam mazaɓ le ɗum ɗum ar jiviɗe.

²³Ka na Bumbulvuŋ ɗu, wuluk taŋ majuwaka ngi kiɗ ɗu vagay na, ki si na le kuy kuy. Malambaˀ taŋ mihaɗi na, ki pula taŋ di ta, ki pula malambaˀ taŋ na a susuyum a mbuŋ ɗike ta. Anja a ndilam ɓaˀ ɓaˀ a mbuŋ ɗike, pas ka miji mevel le na, pa nga hirnga taŋ.