Read South Giziga JER 2 Bible Online

JER 2 - South Giziga bible

JER 2

¹Bumbulvuŋ a ɓiy ani:

²«A ra til mi ti ɓi ani da mizli Zeruzalemeye, ɓa taŋ: Bumbulvuŋ a ɓi na: Ti kum misi ti zuŋ zleˀe gumbaˀ gumbaˀ avu ya, kum mawuɗikiy zleˀe kaɓa wuɗa vu ngi mangasl, kum misipikiy a wuzlaɓuh mikirɗak kirɗak, waɗ ar papala mapus gwat ta na, yi ra wulka ɓi nah keŋ.

³Israyel, ka ki muvula le taˀ da ya Bumbulvuŋ, kakaɓa gwat ngi migam micikiɗeffe da ya. Ko wa gar muzuma le na, naɓa malambaˀi naŋ, hiryi a sa sipaŋ. I ya Bumbulvuŋ maɓi.

⁴Kum dideˀ ngi Zakopoy ati kum Israyel muyoy gar, cinaka mingiɓi ngi Bumbulvuŋ.

⁵Bumbulvuŋ a ɓi na: Dideˀ kumoy mupulikiy na, a lumam zluɓ mi avu yaka? A kilam ngi ru ti sipi gwat lambaˀ kine, mbak ani taŋ vuna a tiram le ka gwat lambaˀhay.

⁶A ɓam: «Bumbulvuŋ mubo ti ndra ti Ezipte na, mibiga ndra jiviɗ a wuzlaɓuh mikirɗak kirɗak, ar ɓuh, yo ar li misi hurjijiŋhey ara, ar hirwuy ngi kwalay, mamuɗ didak, hirwuy misi ko mbur macuh ti ra malla macifi ara anta» na, ɓa a ɓam misi naŋ amaka na, ko a ɓam ɗaˀ ta.

⁷Yi ci ti kum le ar hirwuy misi widis ngi zumoy kiŋ, ɓa ki zumaka yi taŋhay ati zlili ngi raˀahaya. Amma kum micam kulaˀ angi hirwuy ɗu na, ki hiryaka ti hiryi jaka, yo hirwuy ɗu, ki tiram di gwat mukuyta wãˀ naŋ.

⁸Masayay a cufuɗam ɗaˀ, «Bumbulvuŋ naŋ amaka?» ta. Buy ngi ɓimujuwahay a sinikiy mata. Mijigina mizli a slikiɗam ɓi ng'ar ya. Mijiviɗey a njikam di i ɓi ngi Baˀal , a ram ti kil kiŋ kiŋ asi gwatay mapulaka taŋ gir neˀ le ta.

⁹Vurˀe, yi ra widi ti kumo aruŋ, yo yi sa widi ti ziri ngi ziri kumoyo ma. I ya Bumbulvuŋ maɓi.

¹⁰Inga cohom ti mi matura ngi Kitim na ayɗi, ɓa ki puraka, slinam mizli nga Kedar, yo kaka virzi ngi ɓi kuy kuy, ɓa ki puraka ɗi, da gwat misi kahana a gi le ɗaˀ kwana?

¹¹Sukwi ngi mizli a mbiɗaka kuli taŋhaya le ɗaˀ ti mekelemey kwa? kulihey vuna i gwat mupuɗaw puɗaway ta ngbaŋ ni! Amma mizli ɗuwoyo, a mbiɗikiy ya dudok taŋ le ti gwat mapul gir ko neˀ ta.

¹²Kum ngi muŋhoy, anja gwat nah a zumukum hirnga, a gukum kuyta wãˀ, a huluɓukum hilaɓ hilaɓ wãˀ. I ya Bumbulvuŋ maɓi!

¹³Haˀaw, mizli ɗuwoy, a gam malambaˀ le hã makaw cuw: ya miviɗiviɗi ngi yam mavul siifa na, a pulikiy le fuk, a lam futuŋhoy, futuŋ mindislahay le, yam anta cifi angi taŋ ta.

¹⁴Israyeley i bekehey kwa? Malla a ya ka taŋ i gawla ngi mizli kwa? Na mizli a gam taŋ kaɓa gwat ngisi haŋ taŋ mbri mbri maka?

¹⁵Mizli a tuwam ng'ar taŋ kaɓa mobor njawalay, a bucaka taŋ ɓar ɓar. A musukuɗoko hirwuy taŋ le tur, a wuraka walahay taŋhaya le, mbur anta loŋ ar taŋ mata.

¹⁶Ko mizli Memfihey ati Tapanesey kwana, ara hujukum ngwic hirngahaya.

¹⁷Gwat hana migi avu kum gar na, asi kum mupulaka Bumbulvuŋ Buymisemuŋ kumo mbak, ti di naŋ mukusukum zleˀe na takwa?

¹⁸Na wurenna, maɗuɗukum nga Ezipte, ng'asi yam a mizaw Nil na, i gwat mike? Maɗuɗukum nga Asiri, ng'asi yam a mizaw Efrat na, i gwat mike?

¹⁹Anja a kutukum ti bonoy vur malambaˀ kum tehhe a muŋ! Sinaka sin le, saka bonoy kumo, yo naŋ ɗalak avu kum hã ar kiɗa mi naŋ, asi kum mupulaka sipi jiviɗ kum na, a mbuɗukum hirnga a muŋ! Asi kum mupulaka Bumbulvuŋ Buymisemuŋ kumo fuk, yo kum majijikam a mbuŋ ɗu ko neˀ mata na. I ya Bumbulvuŋ Buymisemuŋ misi gidaŋ wãˀ maɓi.

²⁰Diga zlezle na, ki ra ngilaka galalaŋ mukukum di gindiɗ asi ˀay na, ki ra mburucaka zeweɗey mujuwukum ti taŋ na, joˀ ki ɓam na: «Ndr'anta wuɗam gi beke mata.» Amma ar li miɗingir ɗingir madiɗahay gar, asi widis mutukuf tukufoy gar na, ki roko gbangbaŋ mirkendel kaɓa ngwas sulomehey.

²¹Yi hirvukum le zleˀe kaɓa kum i gudubun hirngahay, kaɓa widis mimezlehey wãˀa. Ki mbiɗam a mihiri ɗu, plaˀplaˀ gudubun manja sin, mayi malambaˀ mbri mbri maka?

²²Anja ko da ki bunam ti muguduwuŋ, ko ki tikam sabuno kiteka gar na, malambaˀ kum na, naŋ da a pur ndilimme a mbuŋ ɗu na si. I ya Bumbulvuŋ Buymisemuŋ maɓi.

²³Ki zlaka avu mi ɓa ki ɓam: «Ndr'anta ti dili ta, yo ndr'anta sipaka Baˀala ta» naka? Inga puraka gwat ngi gi kum ar [3] sozo na kwaɗay, sinaka gwat kum migaka na ayɗi. Ki bam vu ati zlogomo njawal maru ti kil ngiŋ ngiŋ lambaˀ!

²⁴Ki bam vu ati madiya zungu ngi ɓuh misirik le a wuzlaɓuh. Hin ngi cifi mindila le na, a ka hutuŋ ɓaˀ ɓaˀ, may zil ara jaŋ na, gwat mitik naŋ naŋ da kwa? Gawla zunguhoy mira wuɗam gar na, anta giram vu gar le ngi sipi naŋ mata si, kiya ngi cifi naŋ mindila le na, a lumaka kutumo si.

²⁵Jam lesl Israyeley, vur kum maram sar ɓaˀ ɓaˀ kine, yo vur mumburlok kumoy mamuˀulom. Amma ki ɓam na: «Ĩˀĩ! Kanah ta! I wuɗam kuli mulakaya, i ra wuɗam sipi taŋ.»

²⁶Kum mizli Israyeley ati buy kumoyo, mizli madiɗa kumoy, masay kumoy ati mijiviɗ kumoyo mesem ara gukum, kaɓa mesem maga mbur mijaka le tap ar li hul.

²⁷Ki ɓaka kuli dumo: «Ki cine ɗu!» Kuli ɗuguro ma na: «Miyiy i ka.» Haˀaw ɓula ni! Ɓa ki puroko hiri ng'avi ya jak na, ki mbiɗikiy di i duba. Amma da bonoy mulumukum le lum ɓula na, ki ɓikiy: «Kilawa, laha ndra takwa!»

²⁸Na kulihey kum miɗiyaka taŋ tuwa taŋ amaka? Anja a slikiɗam, a so luhukum ar bonoyo so ayɗi, asi kuli kumoy a gam le haɗi, kaɓa walahay kumoy vuna ya takwa, kayya Zudahay!

²⁹Ki tuwam ti ya vur mike? Ki mbiɗam hirnga le cek avu ya. I ya Bumbulvuŋ maɓi.

³⁰Ya makiɗa ziri kumoy na, i gir ngataraŋ, t'anta tiɓaka mi ngi kuti ta. Maslalam kumoy a zumaka mijiviɗ kumoyo le kap, kaɓa mobor maji gwatay sunok sunok.

³¹Kum mizli migwenehey, cinaka mingiɓi ngi Bumbulvuŋ! Ani yi tiri le avu Israyele, yi wuzlaɓuh mikirɗak kirɗak sukwa? Malla yi hirwuy misi luvuŋ timbiɗim avu taŋ sukwa? Na mizli ɗuwoy a ɓam: «I ram ng'ar li ndra muwuɗam le, ko i moko ng'avi ka mata na, vur mike?

³²Zuŋ diili ada puyuk hirnga ti gwat ngi wuya naŋ kwa? Zuŋ mazuɓaka ngi hay zile, ada puyuk hirnga ti zana ngi zuɓa zile kwa? Amma kum mizli ɗuwoyo, ki puyukom ti ya hirnga le, diga misi ngadana ta.

³³Kayya, ki sinaka wer ngi sipa mangasl kumoyo le haɗa teˀe! Gisiŋ, mbak hã ki sirikaka gi mungra madiɗa.

³⁴Pumbus ngi misi murgahay ati ngi mizli migam gwat tahaya, a mul sesẽŋ avu mi ngi zana kumoy. Ko ki lumaka taŋ kasl ar li ngila miviŋ kumoyo ta ngbaŋ ni.

³⁵Amma ti nah gar na, ki ɓam: «Ko i cam ar ɓi ta, i sinaka le, himaˀ ngi Buymisemuŋ anta sa po ng'ar ndra ta zleˀe si.» Na yi ra gukum kiita, asi kum maɓam: «I gam malambaˀa ta» na.

³⁶Kum mawusam vu kutum ngi mbiɗa sipi jiviɗ kum na, ara mukum nga ruwuy! Eziptehey a sa pukum mesem, kaɓa mizli Asirihey mupukum mesem zleˀe na ya.

³⁷Ki sa moko baɗ ti diga, haŋ sesek sesek a hirnga. Asi mizli kum mupulaka vu kum mbak vur taŋ na, Bumbulvuŋ a zliɗa taŋ le avra, ɓa gwat kum magaka, a sa gi kasl kasl na, anta