Read South Giziga JER 20 Bible Online

JER 20 - South Giziga bible

JER 20

¹Masay mazilaka Pasehur, mangal ngi Imer, i mbur madiɗa ngir hay ngi Bumbulvuŋ. Ɓi Zeremi manjika taŋ gar na, a cine taŋ le.

²Dar Pasehur a ɓa gawla naŋhay, a kiɗaka Zeremi, a juwaka avu ɓamtal ngi mizlingre vay muŋ ngi Benjameŋ, mizlingre ngi hay ngi Bumbulvuŋ, ɓa mizli a purakaŋ.

³Put ngi miprik naŋ na, Pasehur a so ɓa a puska Zeremi mujuwa avu ɓamtal tuwa, Zeremi a ɓaŋ na: «Bumbulvuŋ anta ziluw Pasehur mata, amma a sa ziluw ‹Zluwun ɓaˀ li.›

⁴Asi mike na, Bumbulvuŋ a ɓi: ‹Zle wurenna, i sa guw zluwun, da ka vuna ati ngama ɗikey gar. Taŋ, mesene taŋhay a sa kiɗaka taŋ ti maslalam, i ka masa ga sedewo taŋ. I sa vula mizli Zudahaya asi haŋ ngi buy madiɗa ngi Babiloŋ ɓa a wa taŋ, a sa jaka taŋ nga Babiloŋ, a sa ngizla taŋ ti maslalam.

⁵Gwat walahay Zeruzalem miwi di vu gar, migir ngi slra naŋ gar, gwat mupuɗaw puɗaw naŋhay, zlili ngi buy Zudahay gar na, i vula taŋ asi haŋ ngi mesene taŋhay: a sa vaka taŋ, a sa hilaka taŋ, a sa cohom taŋ nga Babiloŋ.

⁶Ka kwana Pasehur ati mizli ngi hay ɗik gar na, a sa jukum nga ruwuy mulak, kisa ndil a Babiloŋ, kisa mucu, yo a sa dukukuw a diga. Haˀaw, ka ati ngama ɗikey gar, ka minjika taŋ ɓi mijeŋ ta na.»

⁷Bumbulvuŋ ɗu, ki tikiniy le haɗa, haˀaw, i pula vu ɗu le mbak, ki tikiniy le, ki lum gidaŋ le a hirnga ɗu, yo ki tikiy ˀay le. Vur hin gar na, mizli ara singiram ar ya, mizli gar ara gam ti ya dungur.

⁸Da ya muwuɗ le ɓa i ɓi ɓi gar na, sey i zil vu, ɓa a kiloko widi ɗu, i widi: «Gi moˀore, guzuvura vu!» Vur hin gar na, mizli ara wuɗam kiɗ ɗu vagay, asi mingiɓi ngi Bumbulvuŋ, ara zikiy, yo ara singiram ar ya.

⁹Da yi ɓi le: «I ki slimiɗ ar Buymisemuŋ mata, yo i ɓi ɓi ti slimiɗ naŋ mata» na, mingiɓi naŋ tuwa, a tiɓi a hur ɗu ka vu mazuma li. I tika gidaŋ ngi dumvu ɗu tikeˀ, ɓa i tikaŋ ˀay kwana, amma gar ngataraŋ.

¹⁰I ra cine mizli haɗi maɓam ɓi malambaˀ ar ya na, a cikiy slimiɗe: ‹Zluwun ɓaˀ li›. Mekelemey a ɓam: ‹Njikakaŋ!› ‹Haˀaw, njukukum di!› Ko yeme ɗuwoy gar kwana, ara jiɗikiy, da i sluw mi kwana, a ɓam: «Naŋ mbur miteˀteˀ na, asinta, a sa gi gilaw kwana, naɓa i lumam bugawla le, yo i pulaka bol ndra le muduba.»

¹¹Amma Bumbulvuŋ a ro ati ya, kaɓa bugawla ar vurum. Misipi ɗuwoy nder ndere, a sa ndilam, t'anta sa lumam bugawla gu ta. Mesem a sa sirta taŋ, t'anta sa gaka gwat taŋ mawuɗam gi naŋ gu ta. Busukum ngivi dangwal taŋ a diɗ le ngi set! Ko mbur masa puyuko hirnga naŋ anta.

¹²Bumbulvuŋ misi gidaŋ wãˀ, ka ki sla wala ngi mbur mijeŋŋe le, ki si na mevel ati wuluk ngi mburo le, i sa pura ka masa pula bol ɗik a hirnga taŋ na, asi i pula ɓi ɗu le asi haŋ ɗiki.

¹³Hunumaka Bumbulvuŋ ti dimisi! Gaka dudok da Bumbulvuŋ! Asi ara laha siifa ngi misi murgahaya, tisi haŋ ngi mizli migi malambaˀhaya.

¹⁴Hin miyikiy tapasa na, anja a ndir i minisaŋ! Hin maha miyi tapasa na, anja a ndir i hin muɗuwulaŋ mi le ta!

¹⁵Mbur muso ti labara mezle ngi vula mumul madiɗa da baha, miɓaŋ: «A yukuw mangal mizile le» na, a ndir i minisaŋ.

¹⁶Anja mbur nah, a tiri kaɓa walahayay, Bumbulvuŋ muwaha taŋ avra ngi wãˀa! Anja ti miprike, a cin widi: gawla kilawa. Yo ti wuzla papas ma na, i widi ngi vurum!

¹⁷Buymisemuŋ a puliy i muc daˀ a kwacay maha vuna zleˀe ta vur mike? Anja ar deɗe ngi zivi ɗu i kwacay ngi maha vuna si! Zuwen naŋ miyiy cak le ta ndiɗaˀ takwa!

¹⁸I bo ti kwacay maha vuna ngi mi, ɓa ngi si na bonoy ati ndurɓo hiri kahana ska? Yo ɓa i ndir ti mesem vur hin gar kahana ngi mi ska?