Read South Giziga JER 21 Bible Online

JER 21 - South Giziga bible

JER 21

¹Bumbulvuŋ a ɓa mingiɓi naŋ da Zeremi, hirak ti buy Sedekiyas mislina Pasehur mangal ngi Malkiya waɗ masay Sefaniya, mangal ngi Maˀaseya, ɓa a ɓaka Zermi na:

²«Inga ara pura Bumbulvuŋ vur ɓi ndra takwa, asi Nabukodonozor buy madiɗa ngi Babiloŋ, ara gi vurum ti ndra, asinta, da Bumbulvuŋ a sa gi cekene naŋ purla ngi jina ndra, ɓa a mi murdirba a muŋ kwani?»

³Zeremi a mbiɗa taŋ di: «A ra ɓaka Sedekiyasa na:

⁴Bumbulvuŋ, Buymisemuŋ ngi Israyele, a ɓi na: ‹Kum mihilam gwat ngi vurum ati buy madiɗa ngi Babiloŋ waɗ ati mizli Babiloŋhoy mindah ndah a duba mohol na, i sa ga ɓa a coko taŋ nga hur walahay hana a muŋ.

⁵I ya vuna ti haŋ ɗu masa gi vurum ti kumo, ti himaˀ ati mevel fõh fõh matiɓi ka vu.

⁶I sa kiɗa walahay hana, mizli titirahay ati gineweye, a sa micam sunok sunok ti jiji mozorbono mukuyta wãˀ.

⁷A dirba nah, Sedekiyas buy Zuda, gawla naŋhay, mizli mindiram ti siifa, milaham avu jiji mozorbono, avu ngum ti maslalam waɗ avu may na, i sa vula taŋ asi haŋ ngi buy madiɗa ngi Babiloŋ, asi haŋ ngi mesene taŋhay, yo waɗ asi haŋ ngi mizli mawuɗam kiɗ taŋ vagay vagay na. A sa ngizlaka taŋ kuɗup manja ircece, manja mbur mandir loŋ le, waɗ manja kila mesem. I ya Bumbulvuŋ maɓi.›»

⁸Na mizli tayna, kisa ɓa taŋ na: «Bumbulvuŋ a ɓukum na: gwatay ani cuw, ki wuɗam muc kwa malla siifa kwana, wunam.

⁹Mbur misa ndir le ar walahay hana na, a sa kiɗaka ti maslalam, may malla jiji mozorbono masa kiɗaŋ. Amma mbur misa bi le tir walahaya ng'avi mizli Babiloŋhoy mindah hirnga kum na, a sa ndir ti siifa, a sa laha hutuŋ naŋ.

¹⁰Haˀaw, i sa mbiɗi hiri ng'ar walahaya, anta ngi gaŋ mezle ta, amma ngi gaŋ malambaˀa. I sa vula walahay nah asi haŋ ngi buy madiɗa ngi Babiloŋ ɓa a wuraŋ. I ya Bumbulvuŋ maɓi.»

¹¹Mingiɓi vur hay ngi buy Zuda ani: «Cinaka mingiɓi ngi Bumbulvuŋ!

¹²Mizli ngi hay Davitey, Bumbulvuŋ a ɓi na: Ti miprik gar na, gam kiita mijeŋŋe, mbur mazumakaŋ gwatay na, tuɓoko di tisi haŋ ngi mbur muguzuvur naŋ! Da kanah ta na, mevel ɗu a sa tiɓi ka vu, a sa tiɓi giw giw, ko mbur mumuc naŋ gu anta, vur gwat ngi gi taŋ malambaˀ na.

¹³Wurenna, mindiram i ndra cuw ndra, ka mbur ngir sozo, ngir mandazlay micay. Kumo ki ɓam na: «Masa po sar ngi zla ndra i waka? masa ci ng'ar li ndra muɗum anga i waka?» I ya Bumbulvuŋ maɓi.

¹⁴I ra gukum kiita da kumo, weˀe avu migir ngi slra kumo, i ra ɗuva vu da ɓuh kum mingiriɗ na, [5] vu a sa wura gwat ngi ciki naŋhaya gar. I ya Bumbulvuŋ maɓi.