Read South Giziga JER 22 Bible Online

JER 22 - South Giziga bible

JER 22

¹Bumbulvuŋ a ɓa Zermi na: «Aru ngi hay buy Zuda, kisa ɓa ɓi ani a diga,

²kisa ɓi na: ‹Ka buy Zuda muar janga ngi buy ngi Daviti, ka ati gawla ɗikey waɗ mizli ɗikey macohom tir mizlingre hanayna na, cinaka mingiɓi ngi Bumbulvuŋ!

³Bumbulvuŋ a ɓi na: Ɓimujuwa mitaˀ gar waɗ gi jeŋŋe na, cikam vu vurˀe. Mbur mazumakaŋ gwataya, tuɓoko di tisi haŋ ngi mbur muzum naŋ, ki guzuvuram mbur ta, mbur moholoy, mutuhu waɗ wudiga na, ki gaka taŋ bonoy ta. Mbur migi gwat ta na, ki paka pumbus naŋ angi li hana ta!

⁴Da ki ra gaka kahana gisiŋ na, naɓa buy kumoy mujoˀ ar janga ngi buy ngi Davit na, a sa cohom tir mizlingre ngi hay hana, joˀ ar mota ngi vurumoy waɗ ar pilisey, taŋ vuna, gawla taŋhay waɗ mizli taŋhaya.

⁵Amma da ki tiɓaka mingiɓi hana ta na, Hadam ti slimiɗ ɗu vuna, naɓa hay hana a sa tiri diŋ hilgim. I ya Bumbulvuŋ maɓi.

⁶Naŋ kanah, Bumbulvuŋ a ɓi vur hay ngi buy Zuda na: Ko da ka avu yakaɓa walahay Galaˀat, mallakaɓa mesengel ngi muwã Libaŋ tekeɗe kwana, ko y'anta mur ta, i tiri ti ka wuzlaɓuh mikirɗak kirɗak na si, i tiri ti ka walahay manja mizli anga.

⁷I hil mizli le hoc nga wuh ɗike, mbur gar ti gwat ngi slra a haŋ. A sa bukukuw ɓamtal ɗik mimezle ngi miterey na avra, yo a sa pulaka taŋ a ndilam nguɓoc nguɓoc ng'ar vu.

⁸Mizli ngir sukwi mekelemey gar, da ara cohom ti cikeˀe na, a sa ɓam ar wala taŋ: «Bumbulvuŋ a gi ti walahay madiɗa hana kahana vur mike?»

⁹Dar mizli a sa mbiɗaka taŋ di: «A ga taŋ di kanah na, asi a pulaka jumoˀay taŋ ati Bumbulvuŋ Buymisemuŋ taŋ le, ara hurukom a mbuŋ kulihey, yo ara huruk hurukam a mbuŋ taŋ.»

¹⁰Kum mizli Zudahay, ki tuwaka Zoziyas mumuc na ta, nga naŋ, ki tuwaka vagay naŋ ta! Amma tuwam mbur macuh na jaka, asi naŋ anta sa mo mata, yo naŋ anta sa pura hirwuy miyakaŋ ara na mata.

¹¹Haˀaw, Salum mangal ngi Zoziyas, buy Zuda, mici ar li ngi cine naŋ Zoziyas, mupula hirwuy hana ani na, Bumbulvuŋ a ɓi vurˀe na: «naŋ anta sa mo mata,

¹²asi a sa muc ar li mijaka ng'ara na, amma naŋ anta sa pura hirwuy hana mata.

¹³Buy mindira mugum naŋ le, ti jiviɗ mijjeŋŋe ta, yo jirngasl jirngasl a hirnga cala a hirnga cala ti jiviɗ ngi ɓimujuwa mitaˀ gar muwuɗ ta, waɗ mavula slra ngi gi da mizli, manja a wurka taŋ migir taŋ na, kay, naŋ ar bonoy.

¹⁴Yo maɓi: «I ra ndir hay madiɗaŋ, hay mikiɓiŋ kiɓiŋhey jirngasl jirngasl a hirnga cala, a hirnga cala.» A pul fenetirey avu taŋ, a sirta dalama sirit sirit ti dum ngi miterey, waɗ a kuroŋ ɓerem kor kor.

¹⁵Ka mawa vu ɗik ati dum ngi miter na, ki wa na, zumabuy ɗik a sa ndir vurˀe sukwani? Cine ɗike, a zum, a si gwata le, a ga gwata kaɓa ɓimujuwa mitaˀ gar ati ɓi mijeŋŋe mawuɗo, naŋ micifi ar ndum na vurˀe!

¹⁶A zuɓa ɓi ngi mihina hirngahay ati ngi misi murgahay asi haŋ naŋ, gwat gar a cuh ti ndum! Mbur magi gwat misi kanah na, kite a siniy le takwa? I ya Bumbulvuŋ maɓi.

¹⁷Pura hiri ɗik ati wuluk ɗike, sey ngi luuma gwat tewle, ngi pi pumbus ngi mbur migi gwat ta, yo ngi gi moˀore kaɓa gwat misãmi.

¹⁸Yo mbak ɗagay so, i ya Bumbulvuŋ misi gidaŋ wãˀ maɓi da Zoˀakim mangal ngi Zoziyas, buy Zuda: «Anta sa tuwam kaɗam kaɗam ar vagay naŋ ta, mbur masa ɓi ka misi ani na, anta: ‹Aw zuŋ ngi ba! Aw zuŋ ngi ma!› Anta sa tuwakaŋ ka misi ani na ta: ‹Aw buy ɗu!› ‹Aw kumani ndra madiɗa!›

¹⁹A sa dikaka kaɓa madikam zungu: a sa ɗiɗaka vagay naŋ gborororo tir mizlingre Zeruzaleme, fuk nga duba gala.

²⁰Zeruzalem, jiɗ nga muwã Libaŋ, hiziga widi, bo ti ˀaya kaˀ a muwã Basaŋ. Hiziga widi ɓaˀ li, asi mangasl ɗikey a ngizlam le.

²¹Ti ka muro zleˀe ko zluwun anta na, i ɓuw le, ki mbiɗiy di: ‹I wuɗ cin ɓi neˀ ta.› Gwat ka mugo di diga ti zuŋ na, i nah, ko ki ciniy mi ɗaˀ ta ndiɗaˀ!

²²Mijigin ɗikeye, himiɗ ara kil taŋ le, mangasl ɗikeye, ara jaka taŋ ng'ar hirwuy mulak. Dar busukum ngi dangwal ɗik a diɗ, mesem a sirtuw, asi moˀore ɗik ka maga gar na.

²³Ka mujoˀ ti hay ɗik a Libaŋ, ka misi hay ɗik ka ngi ɗiyuwo ɗiyeˀ ɗiyeˀ ar miterey, vu ngi ji mindiluw gurjik na, kisa niˀic di, kaɓa ngwas ar li yi!

²⁴Kaɓa ya misi ti siifa gisiŋ na, Koniya, mangal ngi Zoˀakim, buy Zuda, da ko a tiri le i gwat ngi ɗuva haŋ ɗu mikaˀ avu haŋ hazum ɗu kwana, i sa mburca avra. I ya Bumbulvuŋ maɓi.

²⁵Haˀaw, i sa vuluw asi haŋ ngi mizli mawuɗam zizi ɗike, mizli ka mazluwun ti taŋ na, kaɓa ani Nabukodonozor, buy madiɗa ngi Babiloŋ ati mizli naŋhay.

²⁶I sa ɓulukum ati mumuŋ miyi ɗike, nga hirwuy mekelem muyukum anga ta, hã kisa micam a diga.

²⁷Angi hirwuy misi may kum ngi mo ng'aka a muŋ, amma kum anta sa moko gu ta.›»

²⁸Mizli a cufuɗam vu: «Mbur mazilaka Koniya vuna, naŋ kaɓa kukulum muwaha le, mawuɗam mata, zlaɗ avra wãˀ kwa? Na a ɓulaka taŋ ati ziri naŋhaya, zlaɗ nga ruwuy taŋ misinaka ta na vur mike?

²⁹Aw hirwuy ɗu, aw hirwuy ɗu, cine mingiɓi ngi Bumbulvuŋ!

³⁰Bumbulvuŋ a ɓi na: «Tohom ɓi a hirnga Koniya, ɓam: ‹naŋ kaɓa mbur manja zuŋ, a ga ngaˀa ngi siifa naŋ le!› Mbur mindila ngi sa cifi ar janga ngi buy ngi Davite, ɓa buy a ndir ar sukwi ngi Zuda na, ko mbur anta loŋ a wuzla ziri naŋhaya ta.»