Read South Giziga JER 25 Bible Online

JER 25 - South Giziga bible

JER 25

¹Angi vi mumufaɗ naŋ ngi Zoˀakim, mangal ngi Zoziyas mazum buy asi ruwuy Zuda na, Bumbulvuŋ a ɓa mingiɓi naŋ da Zeremi vur mizli Yudehey gar, naɓa i vi mudumbuŋ ngi Nabukodonozor buy madiɗa ngi Babiloŋ.

²Mijiviɗ Zeremi a tila mi da mizli Yudehey waɗ da mizli Zeruzalemey gar, a ɓa taŋ:

³«Diga vi kuruˀ nga makir ngi Zoziyas, mangal ngi Amoŋ mazum buy a ruwuy Zuda hã wurenna, a mbiɗeˀvra vi kukur cuw nga makir na, Bumbulvuŋ a ɓiy mingiɓi naŋ le da ya, ya kwana, i ra ɓukum di, ko mbak le anta, amma ko ki cinikiy di ta.

⁴Bumbulvuŋ a pula slinukum gawla naŋ mijiviɗeye mbak le ta. Amma ko ki cinam ta, ki jikaka slimiɗe ngi cine ɓi naŋ ta.

⁵A ɓukum na: ‹Anja mbur gar a mbiɗa kpak naŋ malambaˀa, a pula gi gwat naŋ misi ti kwacay cuwo, ɓa ki ndiram asi ruwuy, Bumbulvuŋ muvulukum di, da kum ati da dideˀ kumoy, diga zlezle hã ngi set na.

⁶Ki ram ti sipi kulihey, ɓa ki huruk hurukam a mbuŋ taŋ ta, ki hurukom a mbuŋ taŋ ta, gwat ngi gi kum ngi slikiɗiy mevel na, kiɗaka mi naŋ, naɓa ko y'anta sa gukum malambaˀ neˀ ta.

⁷Amma gar ti nah kwana, ko ki cinam ta. Na jak ma na, ki slikiɗikiy mevel le ti gwat ngi gi kum maso ti bonoy nga hirnga kum na. I ya Bumbulvuŋ maɓi.

⁸Yo mbak ɗagay so, ya Bumbulvuŋ misi gidaŋ wãˀa, i ɓi na: Ani kum anta cinaka mingiɓi ɗu ta.

⁹I ra slin ɓa ara ziloko mizli ngi ruwuy vay muŋhoyo, yo ɓa ara ziloko gawla ɗu Nabukodonozor, buy madiɗa ngi Babiloŋ, ɓa a sa kiɗam vu ati hirwuy hana, ati mizli ngi raˀahay waɗ ati sukwi midigwi taŋhaya, i wi taŋ vu le weˀ ngi ngizl taŋ da ya, yo i tiri ti ruwuy taŋ cay, daŋ daŋ ngi wãˀ, i tiri taŋ gwat ngi zluwuna vu, li diŋ cay ngi sete. I ya Bumbulvuŋ maɓi.

¹⁰Ɓi ngi zluzluɓ, ngi mumul, dimis ngi mbur mira zuɓ ngwas waɗ mumul ngi ngwas mira zuɓakaŋ, hurum ngi ngurvuŋ mayiˀi, waɗ li minjahha ngi lampe na, i sa kiɗa mi naŋ nga hay taŋ.

¹¹Hirwuy hana taˀ gar a sa tiri diŋ, li midaŋ daŋ cay lambaˀ, joˀ mizli ngi si ruwuyoy gar, a sa gam gawla ngi buy madiɗa ngi Babiloŋ, hã vi kukur tarnaˀa.

¹²Amma da vi kukur tarnaˀa, a gi le na, i sa ga bonoy da buy madiɗa ngi Babiloŋ waɗ da sukwi tayna, asi mungra taŋ madiɗa na, yo i sa ga bonoy da hirwuy Etiyopi: i sa tiri di daŋ daŋ cay ngi sete. I ya Bumbulvuŋ maɓi.

¹³Hirwuy hana, ɓihey ya muslufa taŋ ati ɓi mutoho taŋ ar ɗerewol hana gar vurˀe na, i sa ga taŋ. I ɓi Zeremi minjika a hirnga sukwi ngi mizli tayna gar tuwa.

¹⁴Taŋ kwana, sukwi ngi mizli haɗa waɗ buy migidaŋhay a sa gam gawla taŋ ya. I sa wurka taŋ weˀe avu slra taŋ ati malambaˀ taŋ migaka na gar.»

¹⁵Bumbulvuŋ, Buymisemuŋ ngi Israyele, a ɓiy ani: «Tuɓa sikiɗ ngi mbaazla ani a haŋ ɗu, peɗe peɗe ti mbaazla, yo vula da sukwi ngi mizli gar, ya maslinuw ngi hay taŋ na.

¹⁶A dirba taŋ misa saka mbaazla vuna le na, a sa ram digi zuway zuway, yo taŋ masa puraka ya mangizla mizli a wuzla taŋ ti maslalam na, a sa ba taŋ hirngaŋ mber mber.»

¹⁷Akẽh na, i tiɓa sikiɗ tuwa tiɓeˀ tivi haŋ ngi Bumbulvuŋ, i vula da sukwi ngi mizli gar, Bumbulvuŋ misliniy ng'avi taŋ tuwa.

¹⁸I zla vul naŋ dumbuŋ ngi si da walahay Zeruzalem waɗ da walahay Zudahay, da buy ngi raˀahay ati mizli madiɗa ngi slra taŋhay, ɓa i tiri taŋ diŋ cay, li midaŋ daŋ mayi zluwun madiɗa, dar mizli a sa nisam vu ti naŋ, kaɓa naŋ magi dana ani na.

¹⁹Akẽh na, i vula da buy madiɗa ngi Ezipte, da gawla naŋhay ati mizli madiɗa ngi slra naŋhay waɗ da mizli naŋhay gara ma.

²⁰Yo i vula da mizli, sukwi mijihiɗa le misi a Ezipte gar waɗ da buy ngi ruwuy Usoy, ngi Filistihey gar: i buy Askaloŋhoy, ngi Gaza, ngi Ekroŋ waɗ da is ngi mizli mindiram a Asdot,

²¹da mizli Edomoy, da Moˀapay waɗ da Amoŋhoy,

²²da buy ngi ruwuy Tirey gar, ngi Sidoŋhoy waɗ da mizli ngir matura ngi duba mubuliy gar,

²³da mizli Dedaŋhay, Temahay, Busoy waɗ da buy ngi mizli sukwi mijihiɗa le misi a wuzlaɓuh mikirɗak kirɗaka gar.

²⁴Da buy Arapay gar, waɗ buy ngi mizli sukwi mijihiɗa le misi a wuzlaɓuh mikirɗak kirɗaka.

²⁵Da buy Zimrihey gar, da buy Elamay, waɗ da ngi Medehey gar.

²⁶Da buy vay muŋhoy gar, migweˀ gweˀ ati mikileŋ kileŋhey, mizli purla purla gar, na zle waɗ da zuma buyoy misi ar duniya kurzluˀ, mitaˀ taˀ asi hirwuy keɗeɗe, waɗ ngi kiɗa mi naŋ ndok wãˀ na, da buy ngi ruwuy Sesak.

²⁷Ki sa ɓa taŋ: «Bumbulvuŋ misi gidaŋ wãˀ, Buymisemuŋ ngi Israyele, a ɓi na: Saka mbaazla hana, wam di ɓaˀ ɓaˀ, vunaham, ti kum masa puraka ya masa co kpis ti maslalam a wuzla kum na, kisa ndilam kros kros, manja ki slikiɗam.»

²⁸Da mizli a ngumam tiɓa sikiɗe tisi haŋ ɗike, ɓa a saka ta na, kisa ɓa taŋ: «Bumbulvuŋ misi gidaŋ wãˀa, a ɓi na: ‹Sey ki saka cummo.›

²⁹I ra slino hiryi dumbuŋ dumbuŋ ng'ar walahay mitilam mi ti slimiɗ ɗu ara na ɗagay, na kumo so na, ɓa ki bam cimak sukwa? Kay, kum anta sa bam cimak ta, asi i wuɗ i zilo vurum ng'ar mizli ngisi ruwuyo gar I ya Bumbulvuŋ misi gidaŋ wãˀ maɓi.»

³⁰Ka na, kisa njika taŋ ɓi ya muɓuw taŋ tayna cek, kisa ɓa taŋ na: Bumbulvuŋ ara buco baɗ a muŋ, ara tilo mi baɗ ar hay naŋ mipala. Naŋ kanah, haˀaw ara buco ng'ar zlili naŋ, ara wudo widi ngi muɗuco yi ngi gudubunoy, a wudo ng'ar mizli ngisi ruwuy gar.

³¹ˀAy ngi widi naŋ, a cin angi hirwuy mira kiɗo mi, a ɓi: ya Bumbulvuŋ i wuɗ i ga kiita da sukwi ngi mizli, i zila mizli le keɗeɗe ng'ar kiita. Mizli, kiita mija taŋ le si na, i kiɗa taŋ vagay vagay ti maslalam. I ya Bumbulvuŋ maɓi.»

³²Bumbulvuŋ misi gidaŋ wãˀa, a ɓi na: Hiriyi a sa sipa mizli vur sukwi vur sukwi, burkataŋ gambara ara slikiɗo zle asi diˀisi.

³³Tapasa, asi gazlavay kurzluˀ gara, mizli Bumbulvuŋ mikiɗa taŋ vagay vagaya, mizli anta sa tuwaka vagay taŋ ta, anta sa hilaka taŋ nga dike ta, a sa ndiram ngi zãˀã li kaɓa zay gwatay.

³⁴Kum mijigina mizli, tuwam irslik irslik, zilam mizli ngi kilo widi kumo! Kum buy ngi ginewey, putukulom a ruwuy. Hin a ndila le ngi sli ˀay kumo. Ki sa zliɗam hirnga pal pal, kisa waham kaɓa tutuŋ mupuɗaw puɗaway.

³⁵Kum mijigina mizli, li ɓa ki ra ɗumom ara na anta. Buy ngi gineweye, gwat ɓa ki ɗumom ti naŋ na anta.

³⁶Widi ngi mijigina mizli ara cin huɓuk huɓuk, tuwuy ngi buy ngi gineweye, ara cin, asi Bumbulvuŋ ara wura li zum ngi ginewey avra.

³⁷Bumbulvuŋ muzuɓ himaˀ fõh fõh na, gezleŋ mikweslekwesle ti ginewey tuwa, a ndiram njololoŋ njololoŋ kine.

³⁸A pula mizli naŋhaya kaɓa mobor mupula kuɓuŋ naŋ le. Hirwuy taŋ a ndir daŋ daŋ cay, a mbuŋ vurum manja pura ircece, a mbuŋ himaˀ mufõh fõh ngi Buymisemuŋ.