Read South Giziga JER 26 Bible Online

JER 26 - South Giziga bible

JER 26

¹Ar ɗuva virzi ngi zumabuy ngi Zoˀakim, mangal ngi Zoziyas, buy Zuda, Bumbulvuŋ a ɓa Ziremi na:

²«Ya Bumbulvuŋ i ɓuw na: A ra cici deŋ a wazlaray nga ya Bumbulvuŋ, mizli ngir walahay Zudahay gar, masoko huruk ar hay nga ya Bumbulvuŋ na, ɓi ya maɓuw di ani ɗaˀ ɗaˀ gar, ɓa ki ɓa vur taŋ na, ɓa taŋ di, ko ki pul loŋ ta.

³Asinta, a sa cinam, yo kpak taŋ malambaˀ na, mbur gar a sa zil marava vurˀe kwani. Kanah na, naɓa yi pula hiryi ya mira wulka ngi ga taŋ di asi gi gwat taŋ malambaˀ na.

⁴Ki sa ɓa taŋ na: Bumbulvuŋ a ɓi: ‹Da kum anta jikam slimiɗ asi ɓi ya madubunukum di na ta,

⁵gawla mijiviɗ ɗuwoy, ya maslinukum taŋ mbak le ta na, da kum anta cinaka mingiɓi taŋ ta, na zle kum anta cinaka vuna ta si.

⁶Naɓa yi sa gi ti walahay hana, kaɓa ya migi ti walahay Silo na ya, yo i sa tiri di i gwat sukwi ngi mizli ngisi ruwuy gar, manisam di vu ar wala taŋ.›»

⁷Ti Zeremi matil mi ti ɓi ar hay ngi Bumbulvuŋ tuwa na, masayay, mijiviɗey ati mizli gar, ara cinakaŋ di.

⁸Akẽh na, Zeremi mikiɗa mi ngi sipa ɓi Bumbulvuŋ miɓa ɗaˀ le, ɓa a sipa da mizli gar tuwa na, masayay ati mijiviɗey waɗ mizli gar, a jakaŋ, a ɓakaŋ: «Ki ndila le ngi kiɗ vagay.

⁹Ki tum vu mbri ngi njika ɓi ngi Bumbulvuŋ, ki ɓi: ‹Hay hana a sa tiri kaɓa Silo, a sa musukuɗoko walahaya tur, a sa ɓulaka mizli ngi raˀahaya talalaˀ wãˀ kini kwa!» Mizli gar a kusom nga hirnga Zeremi gun ar hay ngi Bumbulvuŋ.

¹⁰Mizli madiɗa ngi ruwuy Zudahay micinaka ɓi nah na, a bam ti hay buyo, a ram ng'ar hay ngi Bumbulvuŋ, dar a cifam joa mizlingre nawaya ngi hay ngi Bumbulvuŋ.

¹¹Masayay ati mijiviɗeye, a ɓaka mizli madiɗahay ati mizli gara: «Mbur hana a ndila le ngi kiɗ vagay, a ɓi ɓi malambaˀ muwãˀ naŋ ar Zeruzaleme, ki cinaka le ti slimiɗ kum takwa!»

¹²Akẽh na, Zeremi a ɓa mizli madiɗahay ati mizli gar tuwa: «Ɓi kum micinaka hana gar na, i Bumbulvuŋ mislino ya, ɓa i njika a hirngi hay hana waɗ a hirnga walahay hana.

¹³Amma wurenna, mbiɗaka kpak kumo, mbiɗaka gwat ngi gi kumo, Bumbulvuŋ Buymisemuŋ kumo mazulukum na, cinakaŋ. Kanah na, Bumbulvuŋ a sa pula hiryi, naŋ mujuwa a mevele ngi gukum di tuwa.

¹⁴Na ya, ya asi haŋ kum, gam ti yakaɓa kum mawuɗam, kaɓa kum mupuraka le naŋ jeŋŋe.

¹⁵Amma sinaka sin le ɓula, ya mbur migi gwat ta, da ki kiɗikiy le vagay na, naɓa kum vuna, walahay hana ati mizli ngi raˀahaya gar na, ki zluɓam ɓi le. Asi mislino ya, ɓa i ɓa ɓi hana gar, ki cinaka na, i Bumbulvuŋ gisiŋ.»

¹⁶Mizli madiɗahay ati mizli gar a ɓaka masayay ati mijiviɗeye: «Mbur hana a ndila ngi kiɗ vagaya ta: Naŋ miɓa ndra na, ti slimiɗ ngi Bumbulvuŋ Buymisemuŋ ndra.»

¹⁷Mizli micawwa ngisi ruwuyoy a slikiɗam ɓulaŋ ɓulaŋ a wuzla taŋ, dar a ɓaka zigiduw mukus timbiɗime:

¹⁸«Mise, mbur Moreset, ti naŋ miga slra naŋ ngi mijiviɗ ti hin ngi Ezekiyas, buy Zuda na, a ɓa mizli Zudahaya gar: Bumbulvuŋ misi gidaŋ wãˀa, a ɓi na: Walahay Siyoŋ, mesene naŋhay a sa huvakaŋ kaɓa guva, Zeruzaleme kwana, a sa tiri diŋ hoŋ, yo muwã ngir hay Buymisemuŋ, a sa tiri ɓuh misi widis ngiriɗi.

¹⁹Ani Ezekiyas, buy Zuda ati mizli naŋhaya, a kiɗaka mijiviɗ Mise le vagay kwa? Ezekiyas a zluwun ti Bumbulvuŋ, yo a tislaŋ mevel le ta kwa? Dar Bumbulvuŋ a pula hiryi, naŋ ɓi micica ɓi nah ngi ga taŋ di zleˀe na. Ani da i ra gam di i mungra madiɗa nga hirnga ndra kwani.»

²⁰Ar hin nah na, mijiviɗ mekelem ada ma, manjik ɓi ti slimiɗ ngi Bumbulvuŋ: i Uriya mangal ngi Semaya, mbur Kiriyat-Yeˀarim. A ɓi ɓi ngi hiryi masa luuma walahay Zeruzalem ati hirwuy Zuda, kaɓa Zeremi miɓa vuna ya.

²¹Buy Zoˀakim ati mizli majigin naŋhay waɗ mizli madiɗa ngi slra naŋhaya, micinaka mingiɓi ngi Uriya cin cin na, buy a pur jiviɗ ɓa a kiɗa vagay. Amma Uriya micina na, a gaŋ zluwun le, dar a kil nga Ezipte.

²²Amma buy Zoˀakim a slin mizli nga Ezipte: i ti Elnataŋ, mangal ngi Akbor waɗ mizli mekelemey neˀ aseˀe, a ram sesẽŋ nga Ezipte.

²³A ra joko Uriya a Ezipte, a soko di da Zoˀakim, dar Zoˀakim a kiɗa vagay, waɗ vagay naŋ fuk ng'ar vigiɗ ngi dika zigiduw.

²⁴Amma Zeremi na, i Ahikam mangal ngi Safaŋ micik vu a hirnga naŋ. Taŋ muvulakaŋ asi haŋ ngi mizli mawuɗam ziza hutuŋ naŋ ta na, mbele naŋ.