Read South Giziga JER 29 Bible Online

JER 29 - South Giziga bible

JER 29

¹Mizli madiɗa ngi wuzla mizli mijahay misi ar hirwuy mulak, masayay, mijiviɗey ati mizli keɗeɗe, Nabukodonozor mija taŋ ti Zeruzalem nga Babiloŋ na, mijiviɗ Zeremi a toho taŋ letir ani toh toh baɗ ti Zeruzaleme.

²A dirba buy Yekoniya ati maˀãy mumuŋ naŋ, mizli ngi mamay naŋhay, mizli micawwa ngi wuzla Zudahay ati ngi Zeruzalemey, yo misina ɗiya gwatay ati misina ɗiya faɓuruhoy mubam le ti Zeruzaleme, a toho taŋ di toh toh.

³Zeremi a vula letire da Elasa, mangal ngi Safaŋ waɗ da Gemariya, mangal ngi Hilkiya. Sedekiyas, buy Zuda mislina taŋ ng'avi Nabukodonozor, buy madiɗa ngi Babiloŋ. Zeremi a ɓi angi letire ani:

⁴«Mizli ya Bumbulvuŋ miga ɓa a jaka taŋ gar, ti Zeruzalem nga Babiloŋ na, Bumbulvuŋ misi gidaŋ wãˀ, Buymisemuŋ ngi Israyele, i ɓa taŋ:

⁵‹Ndiram hayay, hinam ar taŋ, hirvam widisey, yo zumam yi taŋhaya.

⁶Zuɓam ngwasay, yam ziri mizile ati mongosohoy. Ɗuvaka ngwas da ziri kumoyo, yo vulaka ziri mongoso kumoyo ngi hay ziley, ɓa a yam ziri mizile ati mongosohoy. Jam haɗa, yo zikam haɗa a diga!

⁷Gam welele vur zlili ngi walahay, ya Bumbulvuŋ miga ɓa a jukum ng'ara na, diram dibiɗ da ya Bumbulvuŋ vurˀe, asi da walahaya naŋ ti zlili na, naɓa kumo kwana, kum zlili aya.›

⁸«Haˀaw, ya Bumbulvuŋ misi gidaŋ wãˀ, Buymisemuŋ ngi Israyel i ɓi na: ‹Mijiviɗey misi a wuzla kum waɗ mupura daˀasay na, ki pulaka taŋ vu kumo, ɓa a tikinukum ta. Ki kam slimiɗ ar kum, taŋ mambuɗukum pulaˀvra naŋ ta.

⁹Ɓi taŋ manjukukum di ti slimiɗ ɗu na, i slir, ko yi slina taŋ ta. I ya Bumbulvuŋ maɓi.

¹⁰«Ya Bumbulvuŋ i ɓi na: ‹Da zumabuy ngi ruwuy Babiloŋ a naha vi naŋ le kukur tarnaˀ na, i sa ki slimiɗ ar kum, ɓi ngi mo kum ng'ar li hana, ya muɓukum di ɗaˀ le zleˀe tuwa na, i sa ga muduba.

¹¹Gwat ya mujuwa a mevel ɗu ngi gi vur kum na, ya i si na le, i ɓi ngi luuma zuy, anta i ɓi ngi so ti hiryi ta, i wuɗ i vulukum hin ngi mbuŋ, i hin ngi njaha hiri. I ya Bumbulvuŋ maɓi.

¹²Ki sa zilaka slimiɗ ɗu, kisa zuɓam mulak vur ya Buymisemuŋ, kisa dirikiy dibiɗi, ya i sa cunukum di.

¹³Ki sa sipikiy, kisa lumikiy: kisa sipikiy ti mevel purla wãˀ.

¹⁴Dar yi sa pula vu ɗu mbak ɓa ki lumikiy. I ya Bumbulvuŋ maɓi. I sa ɗiyukum ka misi zleˀe na a muŋ, i sa cukulo hirnga kumo ti wuzla sukwi ngi mizli gar, tir lihey ya muzliɗukum hirnga mber mber ng'ara na gar. Joˀ i sa mi ti kum nga ruwuy ya mujukum baɗ ara na. I ya Bumbulvuŋ maɓi.

¹⁵«Asi mike na, ki ra ɓam: Ya Bumbulvuŋ i vulukum mijiviɗey le a Babiloŋ.

¹⁶«Haˀaw, buy muar janga ngi buy Davit ati mizli ngir walahaya gar waɗ sukum kumoy mijaka taŋ nga ruwuy mulak ta na, ya Bumbulvuŋ i ɓa taŋ:

¹⁷Ya Bumbulvuŋ misi gidaŋ wãˀa, i ɓi na: ‹I sa pulo vurum, may waɗ jiji mozorbono ng'ar taŋ. I sa gi ti taŋ kaɓa yi ngi uruf mizĩˀĩ le kuyta wãˀ, a zum mata.

¹⁸I sa gidiɗa taŋ ti maslalam, ti may waɗ ti jiji mozorbono. I sa ga ɓa zumabuy ngir duniya keɗeɗe gar mupuraka taŋ le na, a zluwunam, hã a sa nisam vu ti slimiɗ taŋ, i sa ga taŋ geˀ geˀ kuɗup ngi muɗa didak da mizli. Sukwi ngi mizli gar, ya masa zliɗa hirnga taŋ nga wuzla taŋ na, a sa zam vu ti slimiɗ taŋ.

¹⁹Asi t'anta cinaka mi ɗu ta. I ya Bumbulvuŋ maɓi. I slino taŋ gawla mijiviɗ ɗuwoyo le, anta mbak le ta ngbaŋ ni, amma ko a cinam ta. I ya Bumbulvuŋ maɓi.

²⁰«Kum mizli mija ti jihey, ya muɓulukum baɗ ti Zeruzalem nga Babiloŋ na, cinaka mingiɓi nga ya Bumbulvuŋ!

²¹«Ahap, mangal ngi Kolaya, waɗ Sidekiya, mangal ngi Maˀaseya, taŋ manjikam ɓi ngi slir ti slimiɗ ɗu na, ya Bumbulvuŋ misi gidaŋ wãˀ, Buymisemuŋ ngi Israyele, i ɓi vur t'ani: i sa vula taŋ asi haŋ ngi Nabukodonozor, buy madiɗa ngi Babiloŋ, a sa kiɗa taŋ vagay vagay a mihiri kumo.

²²Mizli Zuda mijahay gar nga Babiloŋ na, a sa nisam vu ti slimiɗ ngi mizli mucuw tayna, a sa ɓam: ‹Anja Bumbulvuŋ a gi ti ka kaɓa naŋ migi ti Sedekiyas ati Ahap na ya, buy madiɗa ngi Babiloŋ mufuko taŋ ar vu na.›

²³A gam ti taŋ kanah, asi taŋ migam gwat ngi mesem ani asi ruwuy Israyele: a gam madama ati ngwas ngi cil taŋhay, a ɓam ɓi ngi slir ti slimiɗ ɗu, ko i ya muvula taŋ jiviɗ nah ta ngbaŋ. Ya vuna, yi si na le, yi ga sedewo naŋ le. I ya Bumbulvuŋ maɓi.›»

²⁴Semaya, mbur Nehelama, kisa ɓaŋ na:

²⁵Bumbulvuŋ misi gidaŋ wãˀ, Buymisemuŋ ngi Israyele, a ɓi na: ki slin ti letir le ti slimiɗ ɗik, da mizli Zeruzalemey gar, da masay Sefaniya, mangal ngi Maˀaseya waɗ da masayay gar, ki toho, ki ɓi anga na:

²⁶«Mucufuw ar li ngi masay,Yoyada, mizli magam, i ya Bumbulvuŋ vuna. Mbur magi lambaˀ lambaˀ ar hay nga ya Bumbulvuŋ, yo magam kaɓa ara njikam ɓi na, sey ki ca taŋ dambla gizl gizl a sara, waɗ kaˀ kaˀ taŋ ti celulu.

²⁷Na Zeremi, mbur Anatot magi ka mijiviɗ a wuzla kum na, ki gaŋ malambaˀ ta vur mike?

²⁸A toho ndra letire le wureˀ ani nga Babiloŋ aka, a ɓa ndra na: ‹Ki sa zikam haɗa a Babiloŋ. Kum ndiram hayay, ɓa ki hinam ar taŋ, yo kum hirvam widisey, ɓa ki zumaka yi taŋ.›»

²⁹Sefaniya, masay, a slufa letir hana le da mijiviɗ Zeremi.

³⁰Dar Bumbulvuŋ a ɓa Zeremi tuwa:

³¹«Slin, ɓa ara ɓaka mizli mijahay nga ruwuy mulak na gar: ‹Bumbulvuŋ a ɓi ani da Semaya, mbur Nehelama: Semaya ara njukukum ɓi ngi hiryi masa lumukum, i ya vuna mislinaŋ ta ngbaŋ. A ra pukum mi, ɓa ki tiɓam ɓi ngi slir.

³²Yo mbak ɗagay so! I sa ga gwat kwacay mombroŋ da Semaya, mbur Nehelam vuna waɗ da dideˀ naŋhaya. Gwat mezlehey, ya masa vula taŋ da mizli ɗuwoy, ɓa a sa mumulom di na, ko mbur pal asi taŋ masa lum li a wuzla mizli tayna anta. Asi mike na, mipa mi da mizli ɓa a slikiɗam ɓi ar ya Bumbulvuŋ na, i naŋ vuna takwa? -I ya Bumbulvuŋ maɓi.»