Read South Giziga JER 3 Bible Online

JER 3 - South Giziga bible

JER 3

¹Bumbulvuŋ a ɓi: Da mbur a ɓula ngwas naŋ le, a pula hay naŋ le, a tiri ngwas ngi mbur mekelem le na, a mo di ɓa a tiri ngwas naŋ gu aruŋ makwa? Da a mo di le na, naɓa hirwuy a hiryi le wãˀ aseˀe takwa? Ani ka Israyele, ki gi sulome le ati mizli haɗi, amma kisa mo ng'avi ya a muŋ mbri mbrike? I ya Bumbulvuŋ maɓi.

²Inga zuɓa hiri paɗ nga jiviɗi, pur ɗi: li ɓa ki gi madama ara ta na, ada kwa? A ciki jiviɗ kwana, ki cifi le joˀ ngi kutuko mizli, kaɓa mbur Arap a wuzlaɓuh mikirɗak kirɗak. Ki hirya hirwuyo le, ti gwat ngi gi ɗik mijeŋ ta, waɗ ti sulome ɗik na.

³Akẽh na, ki lum vuŋ malasa ra mata, ko vuŋ ngi sifi kwana, ki lum mata: Amma gar ti nah kwana, ki sulome macin ta wãˀ na si, ko ki ngum si na pi mesem ɗik na ta ma.

⁴Ani wurenna ma na, ki ra ziliy: «Baha! Ka yeme ɗu, diga ti ya misi ti zuŋ!

⁵Ki ɓi a kwacay ɗike: Ɓi naŋ ada ti ya aruŋ makwa? A jiy le a kwacay ngi set kwa?» Ko ti ka mira ɓi kahana na kwana, ki pula gi malambaˀa ta na si, yo ki ra ga kuy kuy wãˀ le jaka!

⁶Ti di Zoziyas mazum buy na, Bumbulvuŋ a ɓiy ani: «Israyel mapula sipi jiviɗ na, ki pura gwat naŋ miga na le ya? Israyele, aru nga muwã madiɗahay gar, ng'asi widis mutukuf tukufoy gar, ngi gi sulome.

⁷Yi ɓi ti kwacay ɗu: Ko ti gwat naŋ miga taŋ gar na kwana, a sa mo ng'avi ya na si, amma ko a mo ta. Sukum naŋ mongoso, Zuda miteŋteŋ ta na, a pura le.

⁸Israyel mapula sipi jiviɗ na, yi ɓulaŋ le asi gi madama naŋ na, yo i vulaŋ ɗerewol ngi ɓul naŋ le. Amma sukum naŋ mongoso Zuda miteŋteŋ ta na, a pura le ngbaŋ, ti nah gar na, ko zluwun a gaŋ neˀ le ta, a zla a gi sulome ya.

⁹Naŋ muwuluk ta wãˀ, yo gi gwat naŋ ka ɓi ngi sefel tuwa na, joˀ hirwuy a hiryi aseˀe. A gi madama ati kuli ɗugur waɗ kuli dumoy.

¹⁰Gar ti nah kwana, Zuda sukum naŋ mongoso miteŋteŋ ta na, a mo ng'avi ya ti mevel purla ta: a zil marava ti jiviɗ naŋ kaslsla ta. I ya Bumbulvuŋ maɓi.

¹¹Bumbulvuŋ a ɓiy: Israyel mupula sipi jiviɗ naŋ tuwa, a pura vu naŋ a avu Zuda miteŋteŋ ta na, kaɓa naŋ i mbur mijeŋŋe.

¹²Buymisemuŋ a ɓiy ma: ara til mi ti ɓi ani tir vay muŋ, ɓi na: «Ka Israyel macica wuluk ɗik dar purla ta na, mawa. I ya Bumbulvuŋ maɓi. Y'anta i purukum pur ngi mevel ta. Naŋ kanah, yi ngama kum miteŋteŋ. I ya Bumbulvuŋ maɓi. Y'anta i ji mbur a kwacay ngi caˀa ta.

¹³Amma si na malambaˀ ɗik na ɓula: ka mislikiɗ ɓi na, avu Bumbulvuŋ Buymisemuŋ ɗiki. Ki wus vu ngi ru aka aka ng'avi kulihey, asi widis mutukuf tukufoy gar. Ki cine mingiɓi ɗu ta. I ya Bumbulvuŋ maɓi.

¹⁴Kum ziri ngi mizli mupulaka sipa jiviɗi, moko. Asi buy ngi hay kumoy i ya: i zuɓ asi kumo purla ar walahay aka, cuw a wuzla muyoy a diga, ɓa i mi ti kum nga Siyoŋ.

¹⁵I sa vulukum mijiginey masa jiginukum kaɓa ya mawuɗo, a sa jiginukum ti lesl waɗ ti sinmijileŋ. I ya Bumbulvuŋ maɓi.

¹⁶Ti di nah, da kum misa jam le haɗi asi ruwuyo na, anta sa ɓam: «Akoti ngi jumoˀay ngi Bumbulvuŋ» mata. Bi nah anta sa so keŋ a hirnga mbur loŋ ta, anta sa zilaka slimiɗ naŋ mata, naŋ anta a wuzla taŋ ta kwana, anta sa sinaka mata, yo anta sa ɗiyam mekelem mata ma. I ya Bumbulvuŋ maɓi.

¹⁷Tapasa, a sa zilaka Zeruzaleme «Janga ngi buy ngi Bumbulvuŋ.» Sukwi ngi mizli gar a sa kusom ng'avaŋ, asi taŋ mizilaka Zeruzaleme ti slimiɗ ngi Bumbulvuŋ na. Tˀanta sa sipaka wuluk taŋ malambaˀ ngir mevel na mata.

¹⁸Tapasa, mizli Zudahay a sa jumom ng'avi Israyeley. A sa moko zingif zingif tir vay muŋ nga hirwuy, ya muvula da dideˀ taŋhay, ɓa a ndir da taŋ na.

¹⁹Yi ɓi ti kwacay ɗu zleˀe na: «Yawwa, yi wuɗ i muɗuw ceɗ ti wuzla ziri ɗu mizileheye, i vuluw hirwuy mimezle haɗa, hirwuy mukuy teˀ misi a wuzla sukwi ngi mizli.» Dar yi ɓi ti kwacay ɗu: «Ki sa zilikiy‹Baha›, kum anta sa mbiɗikiy duba mata.»

²⁰Amma na, kum Israyeleye, ki gam teŋteŋ avu ya ta gisiŋ, kaɓa ngwas miteŋteŋ ta avu zil naŋ. I ya Bumbulvuŋ maɓi.

²¹Widi ara cino tir li miɗingir ɗingireye, i Israyeley matuwam, yo matumbuloko Buymisemuŋ, asi taŋ mupuyukom hirnga ti Bumbulvuŋ Buymisemuŋ taŋ tuwa na, a zizam jiviɗ ti zizi.

²²Kum ziri mupulaka sipi jiviɗi, moko! ɓa i vulukum slalak ngi sipi jiviɗe.» «Ndra ani! I ra mam ng'avi ka, haˀaw, Bumbulvuŋ Buymisemuŋ ndra, i ka!

²³Ndra magam a muwã na, i gwat mijeŋ ta gisiŋ. Hurum ngi gwatay macino ti muwã na, i ngatara lambaˀa. Ɓa Israyel a lih gisiŋ na, sey tivu Bumbulvuŋ, Buymisemuŋ ndra.

²⁴Slra ngi dideˀ ndrahay migaka, diga ndra misi ti ziri na, mikuli magi mesem, a zuma taŋ le kap, waɗ tumuŋhoy ati awaya, slahay, ziri mizile ati mongoso taŋhaya ma.

²⁵Hunukum tup ar mesem ndra, anja mi ndra a ruwuy na, a sirta ndra ngbulum wãˀ! Haˀaw i zluɓam ɓi le avu Bumbulvuŋ Buymisemuŋ ndra gisiŋ, ndra ati cine ndraˀahaya, zle ti ndra misi ti zuŋ, hã dana, i cinaka mi da Bumbulvuŋ, Buymisemuŋ ndr