Read South Giziga JER 30 Bible Online

JER 30 - South Giziga bible

JER 30

¹Bumbulvuŋ a ɓa mingiɓi naŋ ani da Zeremi:

²«Ya Bumbulvuŋ, Buymisemuŋ ngi Israyele, i ɓi na: Mingiɓi ya maslufuw di ani na, toho taŋ cek ar ɗerewol.

³Ya Bumbulvuŋ i ɓi na: Hin ara ndilawa, Israyel, mizli ɗuwoy waɗ Zudahaya, i sa ɗiya taŋ a muŋ. I sa mo ti taŋ nga ruwuy, ya muvula zleˀe da dideˀ taŋhay na, a sa zumakaŋ. I ya Bumbulvuŋ maɓi.»

⁴Mingiɓi, Bumbulvuŋ miɓa ɗaˀ le da Zeremi vur Israyel waɗ vur Zuda na ani:

⁵Bumbulvuŋ a ɓi: I ra cinam widi ngi zluwun madiɗa, i muɗa didak, jam anta mata wãˀ.

⁶Mbur mizile ada yi kwa? Inga ka ka virzi naŋ, puraka ɗi: Na ma na, i pura mbur mizile gar na, haŋ a magaryaŋ a magaryaŋ, kaɓa ngwas mawuɗ a yi na vur mike? Hiri hindrik hindrik, ndaɓaɓaɓa.

⁷I bonoy mike gawlay! Haˀaw, hin nah, i hin madiɗaŋ, hin mubam vu ati naŋ anta wãˀ. I hin ngi bonoy avu Zakopo, amma a sa lahakaŋ ti raˀa.

⁸Tapasa, i sa ngila galalaŋ naŋ, i sa cukoŋ di tisi ˀay avra, i sa mburca zeweɗey majuwakaŋ ti naŋ na, naŋ anta sa gi beke ngi mizli mulakaya mata ndiɗaˀ. I ya Bumbulvuŋ misi gidaŋ wãˀ maɓi.

⁹A sa gam gawla nga ya Bumbulvuŋ, Buymisemuŋ taŋ waɗ ngi Davit, buy taŋ, ya masa cufa taŋ di na.

¹⁰Ka gawla ɗu Zakopo, ki zluwun ta. Israyel, ki pula vu ɗike, ki hĩhĩy ta! I sa loho ka ti ngi hirwuy mikileŋ kileŋheye, yo i sa loho dideˀ ɗikeye ti ruwuy mujukuw ng'ara na. Zakop ara mawa, naŋ anta zluwun mata, ara pul vu, ko mbur magaŋ zluwun anta. I ya Bumbulvuŋ maɓi.

¹¹Y'ada ati ka ɓa i lihuw. Sukwi ngi mizli, ya muzliɗukum hirnga ngi hay taŋ na, i sa musukuɗo tur: Amma y'anta sa ngizlukum kumo ta, ɓi miɓa ɗaˀ le na, i kutuw ɓa ki cikaŋ hirnga, i puluw manja kuti ta ɓula. I ya Bumbulvuŋ maɓi.

¹²Bumbulvuŋ a ɓi na: Kiɗ ɗik ti waˀa na, a ɗiyi mata, waˀa madiɗa ɗikeye, a kufam mata!

¹³Ko mbur majiniˀis asi ka anta, vur waˀa ɗik misi gwehgweh na, slalak ngi kuf naŋ mikas anta!

¹⁴Mangasl ɗikey gar, a puyukom ti ka hirnga le, t'anta lukukuw mata. I kuɗuw le kaɓa makiɗam mesene, i kutuw kuti ngi bonoy le haɗi, vur mungra ɗik madiɗahay mihaɗi, waɗ vur malambaˀ ɗik makiɗ mi pas le ta na.

¹⁵Pura, ka mawidi ti kiɗ ɗik muculok na ayɗi! Ko waˀa ɗik anta kuf ta. Ya magi ti kakahana na, asi mungra ɗik madiɗahaya taŋ haɗi, yo asi malambaˀ ɗikey makiɗam mi pas le ta na.

¹⁶Yo mbak ɗagay so! Mizli mandukuw na, a sa ndaka taŋ ya, mesene ɗikeye, a sa jaka taŋ fec fec ng'ar ruwuy mulak aya, mizli mazumukum gwataya, a sa zumaka taŋ gwatay aya, i sa vula mizli mavukum gwatay aya, ɓa mizli a vaka taŋ aya.

¹⁷Slimiɗ ɗike: ‹Muɓula le, Siyoŋ misi mbur maki slimiɗ ara anta.› Ko da a cukuw slimiɗe kahana tekeɗe na, ya i sa pusluɗuw hiri ngi waˀa ɗikeye, i sa kufuw waˀahayakaf kafa, I ya Bumbulvuŋ maɓi.

¹⁸Bumbulvuŋ a ɓi na: «I wuɗ i cifa hay ngi Zakopo hiri naŋ a muŋ, i sa pura ircece da mizli ngi raˀahaya: walahaya gar na, a sa ndiraka ar li naŋ miɗingir na a muŋ, hay mezle gar kwana, a sa ndiraka ar li nga naŋ nga naŋ a muŋ.

¹⁹Mizli a sa cinam ˀay ngi hunum tir walahay tayna, ˀay kaɓa ngi mizli ar muguzlum. I sa ga ɓa a jam haɗi, t'anta sa yuyoˀom ta wãˀ. I sa tiri taŋ mizli mupuɗaw puɗaway, anta sa puraka taŋ hiris le mata.

²⁰Ziri taŋhay a sa boko ti jeŋ kaɓa misi zleˀe a muŋ, jum taŋ a sa ndir taˀ gidaŋ gidaŋ a mbuŋ ɗu, mizli maguzuvuraka taŋ gar na, i sa ga taŋ kiita mihimaˀ.

²¹Buy naŋ a sa bo ti vaˀa vuna si, buy madiɗa a sa ya ka a hay naŋ, i sa kiroho di, a sa kiroho nga mbuŋ ɗu. Mbur masa tum vu tum, ngi kiroho ng'avi ya i waka? I ya Bumbulvuŋ maɓi.

²²Ki sa tiram mizli ɗuwoy, ya kwana, i sa tiri Buymisemuŋ kum.

²³Burkataŋ ngi Bumbulvuŋ, himaˀ naŋ a slikiɗ le, burkataŋ ngi vuŋ a ɗuvo dibiɗ le taˀ, ara kicuwur a hirnga mizli migi mungraˀahaya.

²⁴Bumbulvuŋ, mevele mufõh fõh, ɓa a sa tisle na, gwat naŋ ɓi micica ɓi nah wãˀ ngi gi ngi gi gar na, sey da naŋ miga taŋ le gar far. Nga mbuŋ, kisa slaka wala nah ɓula.