Read South Giziga JER 31 Bible Online

JER 31 - South Giziga bible

JER 31

¹Hin ada, naŋ misa ndilawa le na, yi sa tiri Bumbulvuŋ ngi muy ngi Israyeley gar, taŋ kwana, a sa tiram mizli ɗuwoy. I ya Bumbulvuŋ maɓi.

²Bumbulvuŋ a ɓi na: «Mizli milaham avu maslalam a wuzla ɓuh mikirɗak kirɗak na, i sa ga taŋ mezleŋ. Israyel a sa pul vu muduba so.

³A sa ɓi: ‹Bumbulvuŋ a bigiy vu le deŋ kileŋ.› Joˀ yi mbiɗaŋ di: ‹Yi ra wuɗ ka zle misi ngadana ta, yo ma na, ya maɗuɗo ka ng'avi ya na, asi ki ngama ɗu.

⁴I wuɗ i ɗiyuw ngi ɗik ngi ɗik a muŋ, kisa tiri ki miɗiya le ngi ɗik ngi ɗik a muŋ, ka Israyel mungbuˀo kine. Ki sa zuɓa gangaŋ ɗikey a muŋ, joˀ kisa ɓurgam jom ati mizli magam muguzlum.

⁵A muwã Samari, kisa hirvi widisey a muŋ ma, mizli mihirivaka na, a sa ngilaka yi naŋ.

⁶Hin ada, a sa ndilawa, i hin misla le, mijiginey a sa wudam a muwã Efrayime, a ɓam: Slikiɗam, akum nga Siyoŋ, ng'avu Bumbulvuŋ, Buymisemuŋ ndra.

⁷Bumbulvuŋ a ɓi ani: Jaka salalay kiɗ kiɗ da Israyele, mudumbuŋ ngi wuzla sukwi gar na, tiɓakaŋ mulaka ti membezleŋ ngi vu kum wãˀ! Jam salalay, zluzluɓam, ɓam: Bumbulvuŋ ara laha mizli naŋhay, Israyeley mindirama.

⁸I sa mo taŋ ti ruwuy mikini tir vay muŋhoyo, i sa cikilo taŋ tisi gazlavay kuɗgulum gar. A wuzla taŋ, dangaray ada, waɗ jegwerey, ngwas misi ti huroy ati medevlehey, a sa moko cek cek ng'aka, i zigiduw taˀa.

⁹A ra ndiloko cek ti tuwuy, a wudam: ‹Wereke!› i kisa taŋ, i ru ti taŋ ng'ar sozo misi yam kuy kuy, tir jiviɗ mezle, ɓa sar a ba taŋ ta. Haˀaw, yi tiri le yi cine ngi Israyel, Efrayime kwana, i mangal ɗu modogom.

¹⁰Kum sukwi mekelemey, cinaka ɓi ngi Bumbulvuŋ, tilam di mi ar matura mikileŋ kileŋhey, ɓam: «Mbur mizliɗa hirnga ngi Israyeley zlaɗ lambaˀ tuwa na, ara kuso hirnga taŋ a muŋ, ara jigina taŋ, kaɓa mijigin majigin ginew naŋhay.»

¹¹Bumbulvuŋ ara mbiɗa hirnga ngi Israyele, a ro gak ar ɓi naŋ, ɓa a lahaŋ tisi haŋ ngi mbur migidaŋ haɗa.

¹²Israyeley ara ndiloko, ara zlam dimis ngi mumul a muwã Siyoŋ. A ra soko hiɗim hiɗim ng'avi gwat mezlehey Bumbulvuŋ mavula taŋ di, ng'avi alkamari, mbaazla si, mal muɗuco wureˀ, tumuŋ ati ˀaway, waɗ ng'avi slahay. A puraka vu taŋ zuyyo kaɓa widis mikaˀ a mi yam. ko t'anta sa hĩhĩyam mata.

¹³Dar ziri mongosohoy a ɓurgam ti cine ndum, gawlahay ati midigilahay kwana, kanah ya. Tuwuy taŋ ngi vagaya, i mbiɗa taŋ di mumul, i vula taŋ gidaŋ, i vula mumul da mizli malikamaya.

¹⁴I mba masayaya ti useˀ misi mal, yo mizli ɗuwoyo, a mbam pecek ti zlili ɗu. I ya Bumbulvuŋ maɓi.

¹⁵Bumbulvuŋ a ɓi na: «A ra wudam cǝruw cǝruw a Rama, tuwuy kaɗam kaɗam: i Rasel matuwuy ziri naŋhay, anta ngum a tikinakaŋ ɓa a taˀa tuwuyo ta wãˀ, asi ziri naŋhaya, t'anta ta.

¹⁶Amma Bumbulvuŋ a ɓi na: «Tewle Rasel! Ki widi mata, sohõ tuwuyo! I sa wurukuw migir ɗike, ziri ɗikey a sa moko ti ruwuy mesene taŋhay a muŋ. I ya Bumbulvuŋ maɓi.

¹⁷Ka njih hiri vur hin ngi mbuŋ, ziri ɗikey ara moko ng'asi ruwuy taŋ a muŋ. I ya Bumbulvuŋ maɓi.

¹⁸I ra cine, haˀaw, Efrayim makuɗuma tuwuy na, i ra cine, a ɓi: «Ya zleˀe kaɓa ngaari manja siriki, amma ki sirkiy le. Na mo ti ya, ɓa i mo gu ng'avi ka, asi ka Bumbulvuŋ, ki Buymisemuŋ ɗu.

¹⁹Da ya mumo le si na, dar i zil marava haɗa. A dirba nah, da ya misla wala ngi mungra ɗuwoy misi zleˀe na le si na, i buca haŋ bac a didak: i pura na, mesem, busukum ɗu ngivi dangwala a diɗ le! Gi zuŋ ɗu, i gi di gwat ngi hizigiɗa mizli le ng'ar mungra, ya maɓus na, i migir naŋ.»

²⁰Efrayime, i mangal ngisi mevel ɗu, mangal ya mahĩyã haɗa kwa? Ya mira ɓa ɓi naŋ ko ti vunaka gar na, sey i zila slimiɗ naŋ daɗ le daɗ le na si. I wuɗaŋ haɗi a mevel ɗu! I wuɗaŋ haɗi, gisiŋ, i wuɗaŋ haɗi. I ya Bumbulvuŋ maɓi.

²¹Ngi gwat mabigi gwat kaˀ kaˀ ar jiviɗ ɗike, ngi dumoy kaˀ kaˀ ar li ka mira ru, ji lesl ar buwalaya, ar jiviɗ ka masa ru, ka Israyel mungbuˀo kine, mawa, mawa ng'aka, ng'ar walahay ɗikey a muŋ!

²²Haya zuŋ ɗu mislikiɗa ɓi, kisa ndir ti liˀi kiŋ kiŋ hã ti vunaka? Bumbulvuŋ a gi gwat nawaya le asi ruwuyo: ani mabubuɗ ti mbur mizile i ngwasa.

²³Bumbulvuŋ misi gidaŋ wãˀ, Buymisemuŋ ngi Israyele, a ɓi na: «Ti ya misa ɗiya Israyele le hiri naŋ muŋ na, a sa ɓaka ɓi ani angi hirwuy Zuda waɗ angi walahay naŋhaya: Ka li migi kiita mijeŋŋe, muwã mipal , anja Bumbulvuŋ a ɗuwuluw mi!»

²⁴Mizli Zudahay ati ngir prok naŋhay gar na, a sa cifam arleˀe jom ati muhuvoy waɗ mijigineye.

²⁵Mizli misi didak saf saf wãˀ na, i sa kiɗa taŋ madalyama, mizli mihĩhĩyam le wãˀ na, i sa vula taŋ gidaŋ haɗa.

²⁶Yo ma na, ya mupuɗuko, i pura na, i hinje le kuy.

²⁷Hin ara ndilawa, tapasa, angi Israyel ati Zuda, i sa zliɗa hirnga ngi mizli ati ginew taŋhay ar li gar, kaɓa mazliɗam hilfa ngi daw mosoko. I ya Bumbulvuŋ maɓi.

²⁸Waɗ ma na, i sa gi welele ti taŋ ngi ndira taŋ ati ngi hirva taŋ, kaɓa ya migi welele ti taŋ ngi muɗ taŋ ati ngi putukus taŋ, ngi wuh taŋ ati ngi tiri taŋ diŋ, waɗ ngi ga taŋ malambaˀ na ya. I ya Bumbulvuŋ maɓi.

²⁹Mi maɓaka ani: «Sliŋ ngi ziri a zumam le ngirwaŋ ngirwaŋ, asi cine taŋhay muzumam yi ngi gudubun magala» na, mizli anta sa ɓam kanah mata.

³⁰Naŋ kanah ta wãˀ! Mbur gar a muc asi mungra ngi hirnga naŋ, vurˀe, da mbur a zum yi ngi gudubun magala le na, masa zum ngirwaŋ ngirwaŋ i sliŋ nga naŋhay tehhe.

³¹Hin ara ndilawa, i sa ɗiyi ɓi ngi jumoˀay nawaya ati jum ngi Israyeley waɗ jum ngi Zudahaya. I ya Bumbulvuŋ maɓi.

³²Jumoˀay nah na, a sa gi naŋ wal avu ngi ndra mujumom ati dideˀ taŋhay, ti ya mubo taŋ kaw kaw avu haŋ ti ruwuy Ezipte na. Taŋ a ngilaka jumoˀay ɗu le, amma ya, yi buy ngi hay taŋ na si. I ya Bumbulvuŋ maɓi.

³³A dirba hin nah na, jumoˀay, ya masa jumo ati Israyeley ani: I sa ca ɓimujuwa ɗu a mevel taŋ, i sa toho ar membezleŋ ngi vu taŋ, i sa ndir yi Buymisemuŋ taŋ, yo taŋ kwana, a sa ndiram i mizli ɗuwoy. I ya Bumbulvuŋ maɓi.

³⁴«Sinaka Bumbulvuŋ ayɗi» na, ko mbur masa ɓa cala malla sukumuŋ kahana anta mata. Asi taŋ cek a sa sinikiy, ziri ati mizli madiɗahaya. Mungra taŋ madiɗa ati malambaˀ taŋ na, y'anta sa ɓa avu mi mata. I ya Bumbulvuŋ maɓi.

³⁵Bumbulvuŋ a ɓi na: ‹Muɗuva pas ɓa a pusluɗa li ti papasa i waka? Kiya ati wurzlaŋhay ar li taŋ ar li taŋ, ɓa a pusluɗaka li ti duvuɗo, miɓa taŋ i waka? Maguzluwura mubuliy ɓa a ngi diɓel na i waka? I ya Bumbulvuŋ misi gidaŋ wãˀ, slimiɗ ɗu naŋ kahana.›

³⁶Da yi ɓi le, ɓimujuwa hana anta mata na, naɓa tizer ngi Israyel kwana, a susuyum le ngi set a mbuŋ ɗu ya. I ya Bumbulvuŋ maɓi.

³⁷Ya Bumbulvuŋ i ɓi na: Da mbur a wa jek ngi birngiŋ ngi muŋ gu, a pura ɗuva virzi ngi ruwuyo gu na, naɓa i zliɗa tizer ngi Israyeley avra gu, vur malambaˀ taŋ gar migaka na. I ya Bumbulvuŋ maɓi.

³⁸Hin ara ndilawa, tapasa a sa ndiraka walahaya hiri naŋ a muŋ da Bumbulvuŋ, zle avu hay musubur ngi Hananeyel, hã avu mizlingre ngi zlirɗi. I ya Bumbulvuŋ maɓi.

³⁹A sa slaka maakway ngi walahaya puɗak a mbuŋ naŋ akẽh, cir cir nga muwã Garep, waɗ ara musl maslsla nga Goˀa.

⁴⁰Sozo ngi maara ngi gwatay, yo mapam fucu ara na, waɗ li ngi ciki sozo ngi Kedroŋ silaɓɓa wãˀ, hã ar zlirɗi ngi mizlingre pilisey, tisi pas ngi miprike, nah gar na, a sa ndir i li ngi Bumbulvuŋ. Anta sa mbizlaka ta, yo anta sa wahaka ta ndiɗaˀ wãˀ, hã ngi sete.