Read South Giziga JER 4 Bible Online

JER 4 - South Giziga bible

JER 4

¹«Israyel, da ki ra mawa na, sey ki mawa ng'avi ya. Gwat ngi gi malambaˀ ɗikey mukuyta wãˀ na, da ki pula taŋ le avra ti mbuŋ ɗu na, naɓa k'anta sa ru digi kiŋ kiŋ mata.

²Da ki hudum, ki ɓi le: «Ti slimiɗ ngi Bumbulvuŋ misi ti siifa!» Da i gisiŋ, i kaslsla, yo ti jiviɗ mijeŋŋe na, naɓa sukwi ngi mizli a sa ɗuwulam mi ti slimiɗ nga ya Bumbulvuŋ, yo a sa huhumom di vu.

³Mizli Zudahay ati mizli Zeruzalemeye, Bumbulvuŋ a ɓa taŋ na: gurɓoko guva kumoyo, ki zligam ng'asi hadaway ta.

⁴Kum mizli Zudahay ati Zeruzalemey, cam mizaw vur Bumbulvuŋ, cam vur ya. Da kanah ta na, naɓa himaˀ ɗu a sa tiɓi njilim njilim ka vu, a sa zlizlira gwataya, ko mbur mamuca gu anta, asi gwat ngi gi kum i ngi moˀore.

⁵Hizigaka widi asi ruwuy Zuda, ɓa a cin sesẽŋ a Zeruzalem. Ɓam na: Fam tulum asi ruwuyo. Tilam mi ˀay ngar ngar, ɓam: Kusom ng'ar walahay mugunohoy le ti mohol.

⁶Ngam drapo kaˀ a Siyoŋ! A ra ɗumom! Ki cicam a jiviɗe ta! Asi i sa slino bonoy tir vay muŋ, i mendere madiɗaŋ!

⁷Mobor ara bawa tir li hin naŋ, mihirya sukwi ngi mizli a zuɓo jiviɗe le, a bo le baɗ a hay naŋ nga ngizla hirwuy ɗike: a sa wura walahay ɗikeye, a sa ngizla mizli ngi raˀahaya kuɗup.

⁸Vurˀe, kam zana ngi vagay! Tuwam irslik irslik! Niˀicam! Ĩˀĩ, himaˀ ngi Bumbulvuŋ matiɓi ka vu na, naŋ anta mi murdirba, a pula ndra ta.

⁹Bumbulvuŋ a ɓi: tapasakalla na, gidaŋ anta sa so avu buyo mata, yo mizli madiɗa ngi slra naŋhay kwana, kanah ya, masayay a sa gam welele, mijiviɗey a sa ndiram ngirkik ngirkik.

¹⁰I sa ɓi: «Kayya! Bumbulvuŋ Buymisemuŋ, ki ga gilaw le da mizli hanahay na ati Zeruzaleme ti ka miɓi: ‹Ki sa ndiram zuy zuy.› na. Na ara ngizlam ndra ti maslalam mayse.»

¹¹Tapasa, a sa ɓaka mizli tayna ati Zeruzalemeye: «Himiɗ mawur vu ngi muwãhaya, a bo le ti wuzlaɓuh mikirɗak kirɗaka ng'ar mizli ɗuwoyo. Anta i himiɗ mivir vir ngi kufa gwat ta, anta ngi ɓula munjulvur ta.

¹²I himiɗ gambara, mislikiɗo baɗ a diga asi ya miɓaŋ. Wurenna mindir i ya, ɓi ya mujuwa a mevel ɗu na, i wuɗ i vunoho di ng'ar taŋ.

¹³Puraka, n'ani a so ng'ar taŋ kaɓa gazlavay, mota ngi vurum naŋhaya, taŋ kaɓa burkataŋ gambara, pilis taŋhaya wirwir fineˀ muluhoy. Ɓi a luuma ndra le! I ngizlam le si.

¹⁴Zeruzalem, da ki wuɗ lih na, sey ki pula moˀore ɗik na wãˀ. Wuluk malambaˀɗikey na, kisa pula taŋ avra ti vunaka?

¹⁵Cina ɓi ani mubo zle a Daŋ, ara tiloko mi ti ɓi ngi bonoy, zle a muwã Efrayim.

¹⁶Ɓaka mizli ɗaˀ ɗaˀ le gar, ɓaka Zeruzaleme ɓa a juw vu! Muzuma hirwuyoy ara soko tir ruwuy mikileŋ, ara wudam widi ngi vurum ng'ar Zuda.

¹⁷A ndahaka hirnga ngi Zeruzaleme gun, kaɓa mijigina guvahay. A gi kanah na, asi naŋ mislikiɗ ɓi avu ya. I ya Bumbulvuŋ maɓi.

¹⁸Musuw ti ɓi hana gar na, i joˀ ɗik ati gwat ngi gi ɗik na. I migir ngi moˀore ɗik na, Naŋ ɗalak avu ka gisiŋ! A cuw sesẽŋ a mevel!

¹⁹I ra diɗ gidaˀas gidaˀas! kwacay ɗu ma, kwacay ɗu ma! Mevele anta ar haya ta! Megeɗek a kiɗ ngbeŋ ngbeŋ, i cifi teˀe gu ta, asi i ra cine mafaka tulum, waɗ widi ngi vurumo.

²⁰A ra wudam vur bonoyo: «Mekelem ani mekelem ani!» Asi hirwuy a ngizl le kap. Gurjik si na, a mbizlaka hay ndraˀahaya le, neˀ ma na, guɗuk ɗuwoyo njeɗek.

²¹I sa pura drapo ming'akaˀa, hã ti vunaka? Yo i sa cine ˀay ngi tulumo, hã ti vunaka?

²²Haˀaw, mizli ɗuwoy i gilaway, a sinikiy ta. I ziri manja lesley, anta slaka wala ngi ɓi ko neˀ le ta. A sinaka wala ngi gi malambaˀa le wãˀ ɓula, amma a sinaka gi mezle ta.

²³I pura hirwuyo keɗ keɗ na, kirɗak kirɗak, njoŋ kine, yo muŋ ma na, li minjahha naŋ a susuyum le.

²⁴Keɗ keɗ muwãhaya ma na, ara jijikam, li miɗigar ɗigaraya gar, zingit ti ka zingit ti ka.

²⁵I pur keɗ keɗ na, mbur loŋ anta mata, yo ɗiyuwoy gar a kilam le.

²⁶Keɗ keɗ na, hirwuy misi widis ngi zumoy zleˀe kiŋ na, a tiri wuzlaɓuh le mikirɗak kirɗak, Bumbulvuŋ, ti ji mevele matiɓi ka vu na, a wura walahay madiɗahaya le ceke.

²⁷Bumbulvuŋ a ɓi na: «Hirwuy gar a sa tiri daŋ daŋ. Amma y'anta i wuɗ susuyumo wãˀ vuna ta ngbaŋ.

²⁸Vurˀe, hirwuy a ro ti tuwuy a hiri, yo muŋ, i luvuŋ timbiɗim, asi yi cica ɓi nah le kanah, kaɓa ya mumbuza zleˀe a mevel ɗu ngi sa gi, y'anta pula ɓi nah teˀ ta, yo y'anta mo ti ɓi nah a dirba ta.

²⁹Mizli ngir walahayay gar misa cinam hurum ngi misi pilisey ati ngi gawaya le na, a sa kilam ngiɗ ngiɗ ngiɗ, a cam ng'asi dum, a jiɗam nga muwãhay, walahayay a sa ndiram njoŋ njoŋ, ko mbur anta ar taŋ mata.

³⁰Amma ka Zeruzaleme, kisa gi mbri ska? Ki sa ki zana migagaza ndezze, ɗiyeˀ ɗiyeˀ vu ti gwat ngi wuya ngi ɓiri tapasl tapaslay, ki ra ki pinari a hiri, ɓa a puraka ngbay ar li babara. Ka maɗiyavu njimeˀ njimeˀ na, i ngataraŋ, mangasl ɗikey ara hirsukuw, a wuɗam a zuzukuw hutuŋ.

³¹I ra cin ˀay ka ngi ngwas mira yi, kaɓa ngi ngwas mayi ngi dumbuŋ naŋ aruŋ, i Siyoŋ masiˀit ti widi kiɗmbat kiɗmbat, masika haŋ, a ɓi: Kay, bonoy mike gawlay! Siifa ɗu a ci le asi haŋ ngi mikiɗa hirngahay.