Read South Giziga JER 43 Bible Online

JER 43 - South Giziga bible

JER 43

¹Ti Zeremi mikiɗa mi ngi ɓa ɓi da mizli gar, ɓi ngi Bumbulvuŋ, Buymisemuŋ taŋ, ɓi ngi Bumbulvuŋ Buymisemuŋ taŋ miɓa da Zeremi ɓa a ɓa taŋ di gar na,

²Azariya mangal ngi Hosaya, Yohanaŋ mangal ngi Kareya, waɗ mizli mukuwahay gar, a zlaka a ɓaka Zeremi na: «Ɓi ka maɓa gar na, i slir. Ko Bumbulvuŋ Buymisemuŋ ndra a slino ka ɓa ki ɓa ndra: ‹Ki ram nga ɗum a Ezipte ta› na, a slino ka ta.

³I Baruk mangal ngi Neriya mapuw mi ngi slikiɗa ɓi ati ndra, a wuɗ vul ndra asi haŋ ngi Babiloŋhoy ɓa a kiɗam ndra vagay vagay malla ɓa a jam ndra nga Babiloŋ.»

⁴Bumbulvuŋ mawuɗ ɓa i cifam angi hirwuy Zuda na, ko Yohanaŋ mangal ngi Kareya, ko madiɗa ngi sojehey mitaˀ taˀ ti ngay taŋhay na, na zle ko mbur loŋ macina mi naŋ anta si.

⁵Yohanaŋ mangal ngi Kareya ati madiɗa ngi sojehey mitaˀ taˀ ti ngay taŋhay tuwa, a jaka mizli mindiram ti siifa asi ruwuy zuda gar, mizli mizliɗam hirnga zleˀe nga wuzla sukwi ngi mizli midigwi taŋhay, mumoko ti mi nga cifi a Zuda:

⁶Ziley, ngwasay, ziri, ziri mongoso ngi buyoy, mizli gar, Nebuzaradaŋ madiɗa ngi mijigina hayay mupula taŋ zleˀe da Gedaliya, mangal ngi Ahikam, dideˀ ngi Safaŋ waɗ mijiviɗ Zeremi ati Baruk mangal ngi Neriya ma.

⁷A slam himaˀ, a cinaka mi ngi Bumbulvuŋ ta tuwa na, a ram nga Ezipte gwat taŋ, ara ndilam sesẽŋ a Tapanes.

⁸A Tapanese, Bumbulvuŋ a ɓa Zeremi na:

⁹«Hil ɗugur madiɗahay, a mihiri Zudahay cah na, dika taŋ asi hohoy ngi li midirka misi kini tir mizlingre ngi buy madiɗa ngi Ezipte a Tapanese.

¹⁰A dirba nah, kisa ɓa taŋ: ‹Bumbulvuŋ misi gidaŋ wãˀ, Buymisemuŋ ngi Israyel a ɓi na: I sa slin ɓa ara zilikiy gawla ɗu Nabukodonozor buy madiɗa ngi Babiloŋ, i sa ɗuvaŋ janga naŋ a hirnga ɗuguroy ka midika taŋ tuwa, a sa njira guɗuk naŋ njar a hirnga ɗuguroyo.

¹¹Naŋ misa ndilo le na, a sa kiɗa Ezipteheye. Mizli muzuwula le ngi mucoyo, i ngi mucoy, mizli muzuwula le ngi ji ti jiheye, i ngi jihey, yo mizli ngi ngum ti maslalamaya, i ngi ngumoy.

¹²I sa ɗuva vu da hay kuli ngi Ezipteheye, Nabukodonozor a sa wura kuli taŋhaya malla a sa hila taŋ nga Babiloŋ, a sa ja zlili ngi Ezipte cesl cesl, kaɓa mijigin maja mececeɓ avu zana naŋ, a sa bi njiraŋ gwaɗ naŋ.

¹³A sa waha kuli ɓamtal ngi ɗugur misi a Heliyopolis hirwuy Ezipte na, yo a sa wura hay kuli ngi Ezipteheye.»