Read South Giziga JER 44 Bible Online

JER 44 - South Giziga bible

JER 44

¹Mizli Yudehey gar mipam asi ruwuy Ezipte: ar walahay Mikdol, Tapanes, Memfi waɗ tir vay Patroso, Bumbulvuŋ a ɓa Zeremi vur taŋ na:

²«Ya Bumbulvuŋ misi gidaŋ wãˀ, Buymisemuŋ ngi Israyel i ɓi na: ‹Bonoy ya mupo taŋ gar nga hirnga Zeruzalem waɗ ng'ar walahay Zudahay na, ki sinaka taŋ le kuy kuy: walahayaya t'ani wurenna i diŋhey taˀ taˀ, ko mbur loŋ anta a diga ta.

³A gi kanah, asi malambaˀ taŋ migakaŋ. A gikiy gwat ngi ji mevel ti taŋ mawuram gwat ngi migamay, taŋ mahuruk hurukam a mbuŋ kulihey misi a jinaka taŋ ɗaˀ vuna ta, a jinukum kum malla ko dideˀ kumoy vuna ɗaˀ ta ma.

⁴Yi slinukum gawla ɗu mijiviɗeye ko mbak le anta, ɓa a ɓukum na: ‹Gwat malambaˀ mukuy ta muwãˀ, ya mapura hiris le na, ki gaka ta!›

⁵amma ɓa a mbiɗaka mevele, a gam moˀore mata, yo ɓa a wuram gwat ngi migamay da kulihey mata na, ko a cinaka ta, ko a jikam slimiɗ neˀ le asi ɓi nah ta.

⁶Vurˀe, i zuɓ himaˀ fõh fõh, mevel ka vu, i pa ng'ar taŋ, a zuma walahay Zuda ati jiviɗ madiɗa ngi Zeruzalemeye kam kam: mbak walahaya a ndiram i diŋhey hilgim hilgim, liheye daŋ daŋ, kaɓa mapur dana ani na!

⁷Bumbulvuŋ, Buymisemuŋ ngi buy vurum ngi muŋ, Buymisemuŋ ngi Israyele, wurenna a ɓi so na: ‹Ki gam malambaˀ ar wala kumo nga mbuŋ nga mbuŋ kahana, hã ki ngizlam vu kum asi ruwuy Zuda wãˀ vur mike? Ziley, ngwasay, ziri ati ziri ngi dubahaya, ko ki pulam mbur loŋ ta si vur mike?

⁸Naŋ kine, ki ra gikiy gwat ngi jiy mevel ti gwat ngi gi kum na: ki wuram gwat ngi migamay da kulihey a Ezipte, kum mikilam nga ɗum a diga na. Ki gam di i gwat ngi ngizla vu kum pay wãˀ, yo ɓa sukwi ngi mizli ngisi ruwuy gar, a nisam vu, yo a zam vu ti slimiɗ kumo.

⁹Malambaˀ ngi cine kumoy migaka, ngi buy Zudahay ati ngwas taŋhay, malambaˀ kum vuna migaka ti hirnga kum ati ngwas kumoy, yo malambaˀ migahay asi ruwuy Zuda waɗ a jiviɗ madiɗa ngi Zeruzalemey na, ki puyukam taŋ hirnga le kwa?

¹⁰Hã dana kwana, mbur malik vurˀe anta, zluwun anta avu taŋ ta, yo mingiɓi ɗuwoy ya mudubuna taŋ di ati ɓimuɗuva ɗuwoy, ya muvulukum taŋ da kum waɗ da cine kumoy na, t'anta sipaka ta.›»

¹¹Yo mbak ɗagay so! Bumbulvuŋ misi gidaŋ wãˀ, Buymisemuŋ ngi Israyel a ɓi na: ‹I sa mbiɗi pulaˀ ng'ar kum, ɓa ngi gukum malambaˀa, yo i sa ngizla hirwuy Zudakap wãˀ.

¹²Mizli Zudahay mindiram ti siifa, mikilam nga ɗum a Ezipte na, i zuɓa ɓi taŋ le asi haŋ ɗu. A sa ngizlam angi hirwuy Ezipte, a sa micam cek ti kiɗ ti maslalam waɗ ti may leɗeɗ wãˀ. Ziri ati mizli madiɗahay a sa micam ti kiɗ ti maslalam waɗ ti may. A sa gam geˀ geˀ kuɗup mbak li daŋ daŋ, mizli a sa nisam vu, yo a zam vu ti slimiɗ taŋ ma.

¹³I sa ga bonoy da mizli misi angi hirwuy Ezipte, kaɓa ya miga da Zeruzalem ti kiɗ ti maslalam, may waɗ ti jiji mozorbono na ya.

¹⁴Is ngi mizli Zudahay mindiram, yo mikilam nga ɗum a Ezipte na, asi taŋ, ko mbur masa lih malla masa ndir ti siifa loŋ le anta. Hirwuy Zuda, taŋ muroko ti may ngi mi ng'a cifi a diga na, ko mbur masa mi loŋ anta, t'anta sa mam mata, sey mizli njireˀ kini milaham le.»

¹⁵Mizli ziley misinaka le, ngwas taŋhay ada wuram gwat ngi migamay da kulihey, ngwasay mukusom timbiɗim akẽh waɗ mizli gar mipam zleˀe a Patros, hirwuy Ezipte na, a mbiɗaka mingiɓi da Zerimi na:

¹⁶Gar ti ka maɓa ndra ti slimiɗ ngi Bumbulvuŋ na tekeɗe na, ndr'anta cinukuw di ta.

¹⁷Gwat ndra majuwaka a mevel ndra ngi gi ngi gi gar na, i sa gaka gbaˀ na si: i wuraka gwat ngi migamay da Maˀay ngi muŋ, i puslakaŋ, kaɓa ndra vuna ati cine ndrahay, buy ndrahay ati mizli madiɗa ndra ngi slrahay migaka ar walahay Zudahay waɗ a jiviɗ ngi Zeruzalemey na. Hã gwat ngi zum a gi le ka zay, i cifam le ti mumul, ko hiryi anta.

¹⁸Diga ndra mupulaka wura gwat ngi migamay da Maˀay ngi muŋ waɗ pusl naŋ mbak si na, gwat gar ara kica ndra, yo i ra ngizlam ti kiɗ ti maslalam waɗ ti may ma.»

¹⁹Ngwasaya kwana a ɓam na: «Ndra mawuraka gwat ngi migamay da Maˀay ngi muŋ, i puslakaŋ na, maɗaf mutuso ngi vulaŋ di waɗ ndra mapuslakaŋ vuna gar na, ndra jom ati zil ndrahay vuna takwa?»

²⁰Akẽh na, Zeremi a ɓa mizli gar, ziley, ngwasay, mizli gar mimbiɗakaŋ mingiɓi kahana tuwa:

²¹«Kum vuna, cine kumoy, buy kumoy, mizli madiɗa kum ngi slrahay waɗ mizli misi zlili kumoyo, gwat ngi migamay kum muwuraka taŋ ar walahay Zudahay waɗ a jiviɗ madiɗa ngi Zeruzalemey na, Bumbulvuŋ mamukum hiri naŋ a muŋ, yo muso keŋ a hirnga naŋ na, i nah takwa?

²²Gwat ngi gi kum ngi moˀore zleˀe, yo malambaˀ kum mukuyta wãˀ migaka zleˀe na, Bumbulvuŋ anta ɓusa ɓi nah mata, yo ma na, hirwuy kumo, a tiri diŋ le, li cay daŋ daŋ lambaˀ. Mizli ara nisam vu ti slimiɗ ngi hirwuy kum vuna, mbur loŋ anta ara ta, naŋ kaɓa mapur ani dana na!

²³Kum muwuram gwat ngi migamay da kulihey na, ki zluɓam ɓi le avu Bumbulvuŋ, ki cinakaŋ mi ta, ki sipaka ɓi naŋ mudubunukum di na ta, ɓimuɗuva naŋhay ati gwat naŋ mawuɗ cummo na, ki sipaka taŋ ta, bonoy muso lumukum na vurˀe, naŋ kaɓa mapur ani dana na!»

²⁴Akẽh na, Zeremi a ɓa mizli gar, ziley ati ngwasaya: «Kum mizli Yudehey misi asi ruwuy Ezipte, cinaka mingiɓi ngi Bumbulvuŋ:

²⁵Bumbulvuŋ misi gidaŋ wãˀ, Buymisemuŋ ngi Israyel a ɓi na: kum ati ngwas kumoyo, gwat kum miɓaka ɗaˀ ti balam kumo si na, ki gaka si, ki ɓam na: ‹Maˀay ngi muŋ, gwat ngi ji mi ndra ati naŋ na, i wuɗam i gakaŋ, joˀ ki wurakaŋ gwat ngi migamay waɗ ki puslakaŋ.› Jaka mi naŋ, yo puslakaŋ ɓula ni!

²⁶Yo mbak ɗagay so! Kum mizli Yudehey misi asi ruwuy Ezipte! Bumbulvuŋ a ɓi na: Hadam ti slimiɗ ɗu mihirnga na, asi ruwuy Ezipte gar na, anja mbur Yude a zila slimiɗ ɗu mata ndiɗaˀ wãˀ, ɓa a ɓi: ‹Ti slimiɗ ngi Bumbulvuŋ misi ti siifa!› na, a gi ta.

²⁷I wi vu le weˀ ti taŋ ngi ga taŋ malambaˀ, mbak gi mezle le: Yudehey misi asi ruwuy Ezipte na, a sa zizam cek ti kiɗ ti maslalam waɗ ti may, hã a ngizlam pay wãˀ.

²⁸I mizli njiraˀ kini masa laham avu kiɗ ti maslalam, masa mam baɗ ti Ezipte nga hirwuy Zuda a muŋ. Dar mizli Yudehey gar mindiram ti siifa, musoko nga ɗum a Ezipte na, a sa sinaka, migi kaslsla na, i mingiɓi ɗu kwa malla inga taŋ kwana!

²⁹I wuɗ i gukum bonoy ar li misenna, ɓa ki sinaka, mingiɓi ɗu a sa gi ar kumo, ngi so ti kum hiryi. I ya Bumbulvuŋ maɓi. Gwat masa bugukum di ani:

³⁰Bumbulvuŋ a ɓi na: i ra vula Hofra buy madiɗa ngi Ezipte, asi haŋ ngi mesene naŋhay, asi haŋ ngi mizli mawuɗam zizakaŋ hutuŋ, kaɓa ya muvula Sedekiyas buy Zuda asi haŋ ngi mesene naŋ Nabukodonozor, buy madiɗa ngi Babiloŋ mawuɗ zizaŋ hutuŋ na ya.»