Read South Giziga JER 48 Bible Online

JER 48 - South Giziga bible

JER 48

¹Bumbulvuŋ misi gidaŋ wãˀ, Buymisemuŋ ngi Israyele, a ɓi vur walahay Moˀapa na: Kay, bonoy madiɗa avu mizli Nebohoyo, walahay taŋ i mihirya le njakwãy njakwãy! A tiɓaka hirwuy Kiriyatayime le, mesem a kiɗaŋ le ɓaˀa. Walahaya, mesem a kiɗaŋ le ɓaˀ, ara mbizli.

²Moˀapa, slimiɗ naŋ mazil na, a kiɗ mi le! A ɗiyaka ɓi ngi gi vagay ngi walahay Heseboŋ le, a ɓam: ‹Akum, i ra susuyumoko sukwi ngi mizli tayna! Ka kwana Matmen, a gucukuw mi le, maslalam a ro ɓaˀ asi ka.

³Widi ara cino ti Horonayim: ‹gawla kilawa›, ara musukuɗokoŋ, i bonoy madiɗa ava!

⁴A wahaka walahay Moˀapa le, ziri naŋhay ara wudam cǝruw cǝruw.

⁵Mizli ara jiɗam ng'ar jiviɗ miɗingir ngi Luhite bal ti tuwuy. A jiviɗ muzugudum ngi Horonayime, widi ngi bonoy ara cin.

⁶Kilam! Mbur malih gu na, a lihi! Ndiram a wuzlaɓuh kaɓa zungu ɓuh.

⁷Asi ki ra pula vu ɗike mbak vur gidaŋ ɗik ati zlili ɗike, ani a jukuw le so. Kuli ɗik Kemoso, ara ram di nga hirwuy mulak, waɗ masay naŋhay ati buy naŋhaya jom ma.

⁸Muzuma li ara zuma walahayaya gar, walahay masa lih loŋ le ava anta. Gwat ngir sozohoy ara susuymom, hirwuy micaya, i muzuma le. I Bumbulvuŋ miɓa.

⁹Vulaka zlara da walahay Moˀapa, ɓa a slikiɗ kileŋ. Walahay naŋhaya, a sa ndiram daŋ daŋ, mizli anta sa ndiram ara mata.

¹⁰Mbur maga slra ngi Bumbulvuŋ ti sefel na, i minisa le. Mbur mangum ɓa pumbus a gi avu maslalam naŋ ta na, i minisa le.

¹¹Moˀapa, diga naŋ mipi sek na, naŋ zleˀe zuy zuy, a cufa virzi le ndasl kuy kuy, kaɓa mambuɗam gwat tir magayak ng'ar magayak mekelem na, a mbiɗakaŋ naŋ ɗaˀ ta, a mbiɗeˀvra, a kil ɗaˀ nga ɗum a hirwuy mulaka ta. Yo ma na, a ro ti ndum naŋ kine, zĩˀĩ naŋ mundum na, a ro ngbuˀo.

¹²Yo mbak ɗagay so, hin ara ndilawa, i sa slin ti mizli ng'avaŋ ti mingiɓi ɗu ɗaˀ si na, ɓa ara mbiɗakaŋ avra, ara mbiɗaka magayak taŋhaya, yo ɓa ara wahaka kukulum taŋhaya. I ya Bumbulvuŋ maɓi.

¹³Moˀapa, kuli naŋ Kemoso, a sa paŋ mesem, kaɓa kuli Betel mipa mesem da mizli Israyeley mupulakaŋ vu taŋ na ya!

¹⁴Mizli Moˀapay, ki ɓam ma na: «Ndr'i bugawlahay, ndr'i soje mihĩˀĩ ngi vurumoy» mbri mbri maka?

¹⁵A ngizlaka Moˀapa le, ara kiɗaka walahay naŋhaya. Gawla hirnga ngi raˀahaya, ara pam taŋ sar nga sli ˀay.» - Maɓi I ya Buy madiɗa mazilikiy: Bumbulvuŋ misi gidaŋ wãˀa.

¹⁶Moˀapa, a ndir mata ngi tiri diŋ, bonoy ara kiɗo vu nga hirnga naŋ.

¹⁷Kum midigwi ati yeme naŋhay gar, soko jakaŋ haŋ ngi vagay, ɓakaŋ: «Gidaŋ matik ˀay ta hana, yo dudok mihaɗa hana, a gi mbri ɓa a pakaŋ hirnga naka?»

¹⁸Mizli Diboŋhoy, poko sar tir dudok kum na, cifam ar madalyam, mihirya Moˀapa, ara ru nga zlukum ngi kiɗa vu, ara waha mohol ngi walahay mugun hirnga ɗike.

¹⁹Mizli Aroˀer, cicam a ciki jiviɗi, jiɗaka mizli. Mizli makilam ati mizli mindiram ti siifa na, cufuɗaka taŋ: i gwat mi migi ka?

²⁰A sa mbuɗukum di na: «Mesem a kiɗa walahay Moˀapa le ɓaˀ, a mbizli le.» Wudam! Gawla kilawa! Tilam mi a Arnoŋ: a wahaka walahay Moˀapa le.

²¹Kiita ara ja hirwuy miɗigaraya, walahay Holoŋ, Yahas, Mefaˀat,

²²Diboŋ, Nebo, Bet-Diblatayim,

²³Kiriyatayim, Bet-Gamul, Bet-Meˀoŋ,

²⁴Keriyot waɗ walahay Bosra. Na a ja walahay Moˀapaya keɗeɗe, migweˀ gweˀ ati mikileŋ kileŋhey gar.

²⁵«Walahay Moˀap a tika gidaŋ naŋ le wãˀ, gidaŋ naŋ ngi wi mizli a kiɗ mi le. I ya Bumbulvuŋ maɓi.»

²⁶Moˀap mawa vu naŋ fineˀ Bumbulvuŋ na, wakaŋ duwlak ti mbaazla. Puraka ara kiɗ vu ti vunuh naŋ na. A ndir ɓa mizli a singiram angi naŋ ya!

²⁷Moˀapa, Israyel a tiri gwat ngi singir le gisiŋ avu ka takwa? Ka mira ɓa ɓi naŋ gar, sey ti hira hirnga na, ki luuma le ɗaˀ a wuzla muhuloy kwa mbrike?

²⁸Mizli Moˀapay, bam tir walahayaya, ara cifam a muwãhay. Ndiram kaɓa gonokoy maɗiyaka hay taŋhay ar li misi mbur a luuma gu ta, a mi butum.

²⁹Moˀap mahuhum vu na, i cinaka ɓi nah le! A huhum vu haɗa! Kay, a hiris vu, a huhum vu teˀe! A kuw teˀe! A pura vu naŋ muk si!

³⁰Bumbulvuŋ a ɓi: «Yi si na wuluk naŋ le, jijiwiɗ a cifi avu mi naŋ ta wãˀ, gwat mupuɗaw anta ar gwat ngi gi naŋ ta.

³¹Yo ma na, i ra tuwa Moˀapa ma. I ra widi da duniya kurzluˀ vur Moˀapa: ‹gawla kilawa.› I ra hislik ti tuwuy vur mizli Kir-Hereseye.

³²Gudubun ngi Sipna, i ra tuwuw ka fineˀ mizli Yazerey. Muzuŋ haŋ ɗik madiɗa, naŋ ɓaˀ hã a duba mubuliy, hã a ndila Yazer. Mihirya gwat a diɗ vu le kpis avu gwat ngi migam ɗikeye, a diɗ vu le ar yi ngi gudubun ɗike.

³³Cira hiri mifineˀ gidaŋ a kiɗ mi le ar guva ngi gudubuno, yo waɗ a Moˀapa! I hisika mbaazla le ngbasl ar magayakaya: Salalay ngi ɗuco yi ngi gudubun a kiɗ mi le!

³⁴Heseboŋhoy mawudam ‹gawla kilawa› na, ada cin sesẽŋ a Elale. ˀAy taŋ a cin sesẽŋ a Yahas, zle a Soˀara, hã sesẽŋ a Horonayim, a Eglat-Selisiya. Asi ko li ngi yam misi a Nimrim na kwana, a ndir le daŋ daŋ.

³⁵Mizli ngir li miɗigirey, magam mikuli mizlam zlam waɗ mawuram urdihey ngi ɗuva hirnga da kuli taŋhay na, i sa ngizla taŋ pay a Moˀapa. I ya Bumbulvuŋ maɓi.

³⁶I ra tuwa Moˀapa a mevel ɗu, kaɓa tuwuy ngi bozloro, i ra tuwa mizli Kir-Hereseye, kaɓa tuwuy ngi bozloro, ara zizam asi gwat ngi lum taŋ mulumaka.

³⁷Yo ma na, hirngahay i mihicahay le ati mazlamayaya kurzluˀ kurzluˀ gar. Haŋhay i micirahay le car car, yo zana ngi vagay ɓaˀ ɓaˀ avu vu.

³⁸A hirnga gbale misi a Moˀap gar waɗ ar li ngi lumahaya, sey tuwuy tewle: i waha walahay Moˀapa kaɓa gwat mawuɗam mata. I ya Bumbulvuŋ maɓi.

³⁹Njiɗaka tuwuyo: «Kay, Moˀap a diɗ le! Kay, mesem mikiɗaŋ ɓaˀ tuwa na, ara mbiɗi duba!» Moˀap ara gi gwat ɓa midigwi naŋhay a singiram ara, yo ɓa a ga taŋ zluwun.

⁴⁰Bumbulvuŋ a ɓi na: Moˀapa, mesene naŋ ara sliɗam a hirnga naŋ kaɓa kilkandaŋ maki makapal, yo a ro zlara njar njar a hirnga naŋ.

⁴¹Walahay Keriyoto, i mitiɓa le, walahay naŋhay muguno ti moholo, i muzumahay le. Tapasa, soje miwirwir ngi Moˀapaya, i bonoy a mevel taŋ, kaɓa ngi ngwas mayi.

⁴²A wahaka Moˀapa le, t'anta i mizli sukwi taˀ mata, asi a ga vu naŋ kaɓa a funa Bumbulvuŋ le.

⁴³«Zluwun, vigiɗ ati gadaŋ gun a hirnga kum mizli Moˀapaya. I ya Bumbulvuŋ maɓi.

⁴⁴Mbur makil ti zluwuno, a diɗ ng'ar vigiɗi. Mbur mabo tir vigiɗe, a ci ng'ar gadaŋ. Haˀaw, vi ɓa sey Moˀap a slufa gwat ngi gi naŋ na, i ra gaŋ di. I ya Bumbulvuŋ maɓi.

⁴⁵Mizli makilamay, migiram le na, a sa musukom vu a susuɗuk a Heseboŋ. Amma vu a bo bivbiw tir walahay Heseboŋ, vu mihilɓiɓ, a bo tir mugum ngi buy Sihoŋ. A wura Moˀapa zle ar maakwaya, hã sesẽŋ a wuzla walahay.

⁴⁶Aw Moˀap, i bonoy mi mulumuw ka! Mizli ngi kuli Kemosoy a zizam le. A jaka ziri mizile ɗikeye le, a ram ti ziri mongoso ɗikeye le ng'ar dangay.

⁴⁷Amma nga mbuŋ na, i sa ɗiya Moˀapa hiri naŋ a muŋ I ya Bumbulvuŋ maɓi.» Kiita ngi Moˀap a kiɗ mi aka.