Read South Giziga JER 52 Bible Online

JER 52 - South Giziga bible

JER 52

¹Sedekiyas micifi buy madiɗa ngi Zuda na, naɓa naŋ tivi kukur cuw ngaŋ kaˀa. A gi vi kuruˀ ngaŋ kaˀ ar zumabuy a Zeruzaleme. A zilaka mumuŋ Hamutal, zuŋ ngi Irmeya, mbur ngi ruwuy Lipna.

²Sedekiyas a gi gwat ngi cira hiri ta da Bumbulvuŋ, rak rak ati Zoˀakim na ya.

³Gwat migi a Zeruzalem waɗ a Zuda na, a slikiɗa mevel le da Bumbulvuŋ, mbak hã a pula mizli naŋhaya kileŋ ava. Sedekiyas a slikiɗ ɓi avu buy madiɗa ngi Babiloŋ.

⁴Hin kuruˀ ngi kiya mukuruˀ naŋ ngi vi mungoltir naŋ, Sedekiyas mazum buyo, Nabukodonozor, buy madiɗa ngi Babiloŋ a ndiloko ati soje naŋhay gar, a pam sar akẽh ti guɗuk taŋhay a mbuŋ walahay Zeruzaleme, waɗ a slikiɗaka muyuŋ purtaˀ purtaˀ ɗingir gun hirnga Zeruzaleme.

⁵A ndahaka walahaya hã vi kuruˀ ngaŋ kaˀ ngi Sedekiyas mazum buyo.

⁶Angi hin ngoltir ngi kiya mumufaɗ naŋ na, may a bul vu le culok ar walahaya, ko misi zlili ngisi ruwuyoy kwana, gwat ngi zum anta avu taŋ mata.

⁷Akẽh na, mizli Babiloŋhoy a slinaka moholo ngi walahaya njoŋ. Ko walahay i mindaha hirnga naŋ le ndah tekeɗe kwana, ngi duvuɗo, migi vurum ngi Zudahay a kilam pay tir walahaya, a bam tir mizlingre misi ar wala ngi moholoy cuw, migweˀ avu jarne ngi buy na, a zuɓam jiviɗ maru ng'ar sozo Zurdeŋ.

⁸Amma soje Babiloŋhoy a gidiɗaka taŋ, ara jaka is da buy Sedekiyas ar li micay a Zeriko. Soje naŋhay a zliɗam hirnga mber mber, a pulakaŋ ɗoɗok.

⁹Mizli Babiloŋhoy a jaka Sedekiyasa, a ram di da buy madiɗa ngi Babiloŋ a Ribla, hirwuy Hamat, dar buy a ɓaŋ ɓi ngi gwat naŋ mujuwa a mevele ngi gaŋ di gar.

¹⁰Buy Babiloŋ a slaˀay ngi ziri mizile ngi Sedekiyasay a mihiri cine taŋ vuna si. Yo a sla ˀay ngi migi slra ngi Zudahaya cek a Ribla vuna ma.

¹¹A dirba nah, buy a ɓi a nduzoko hiri ngi Sedekiyasaya cuw taŋ, waɗ a juwakaŋ ti celelu ngi ɓiri gaza ngiriɗ ngiriɗ hiri cuw. Buy a ɓa mizli, a ram di nga Babiloŋ, aka kaŋ ar dangay, hã a muc wãˀ araŋ.

¹²Hin kuruˀ ngi kiya muzlum naŋ ngi vi mukuruˀ nga ngoltir naŋ ngi Nabukodonozor mazum buy a Babiloŋ na, Nebuzaradaŋ madiɗa ngi mijigina buyoyo, i mbur migweˀ ng'avu buy madiɗa ngi Babiloŋ, a ndilo a Zeruzaleme.

¹³A ɗuva vu da hay ngi Bumbulvuŋ, da hay ngi buyo waɗ da hay ngir walahay Zeruzalemeye gar, wãˀ naŋ na hay ngi mizli madiɗa madiɗa ngir walahaya.

¹⁴Soje ngi Babiloŋhoy miki saka madiɗa ngi mijigina buyoy tuwa na, a wahaka mohol ngi Zeruzaleme rip rip, gun gun gar.

¹⁵Mizli mizlew ngir walahaya, mbiɗeˀvra mizli mindiram zleˀe ar walahay aruŋ, mira lumaka buy madiɗa ngi Babiloŋ waɗ is ngi mizli misina gi gwatay, Nebuzaradaŋ madiɗa ngi mijigina buyoyo, a ja taŋ nga Babiloŋ ma.

¹⁶Amma a pul misi murga ngi raˀahaya le cah, ɓa ngi huva si virzi ngi widis ngi zumoy waɗ guvahay.

¹⁷Ɓamtal ngi ɓiri gazahay misi ar hay Bumbulvuŋ, saretey waɗ kisa madiɗa ngi ɓiri gaza misi ar hay ngi Bumbulvuŋ na, mizli Babiloŋhoy a wahaka taŋ meɗ meɗ, a jijiraka ɓiri gaza naŋ nga Babiloŋ.

¹⁸A hilaka misirgaɗay, peley, sliwiɗey, sikiɗ ngi kuca lihey, taasa ngi yamay waɗ gazlanga ngi ɓiri gazahay magam taŋ slra ngi huruk huruk taŋ a mbuŋ Buymisemuŋ.

¹⁹Yo kisahay, gandaf ngi urdihey, sikiɗ ngi kuca lihey, misirgaɗay, li ɗuva lampehey, kop ngi yamay waɗ ziri taasa ngi gi mezegweley, miga taŋ cek ti ɓiri tapasl tapasl ati ɓiri bara na, madiɗa ngi mijigina buyoy a hila taŋ le ma.

²⁰Yo ma na, ɓiri gaza Salomoŋ miɗiyi taŋ gwat ngi slrahay misi ar hay ngi Bumbulvuŋ na, kilo naŋ a sluf ta: ɓamtalay cuw, kisa madiɗa, naŋ purla si, taˀ a hirnga gusoŋhoy kuruˀ nga cuw magidigilaka saret vuna, cek i miga taŋ ti ɓiri gaza.

²¹Ɓamtal mudumbuŋ, gil naŋ metir ngoltir, gun hirnga naŋ zeweɗ metir merkeɗ, ɓiɓir naŋ saŋtimetir dangafaɗ, waɗ vulor a wuzla.

²²Mecepek tiɗeˀ a hirnga ɓamtal vuna, gil ngi mecepeke metir cuw ti reta, gwat kilak kilak njororo waɗ yi ngi hunduruk law law ava, miga taŋ cek ti ɓiri gaza. Ɓamtal mucuw naŋ, taŋ rak rak ati mudumbuŋ, gil naŋ ati yi ngi hunduruk misi ava gar i mupurla.

²³Tir vay purla, yi ngi hunduruk kukur ngoltir nga merkeɗ, gunno gwat munjororo tuwa na, yi ngi hunduruk skata.

²⁴Madiɗa ngi mijigina buyoy tuwa, a zuɓa Seraya, masay madiɗa, yo Sefaniya, ngi mijingaˀ masay waɗ mizli makir mijigina mizlingre ngi hay ngi Bumbulvuŋ ma.

²⁵Ar walahaya, a zuɓ mbur migi slra, i buyɓi ngi sojehey, yo a hil mizli tarnaˀ, mizli ngi mbuŋ buyoy, taŋ ar walahay vuna si, waɗ mbur mutoho gwat ngi buy ngi sojeheye, mbur mupulaka slra ngi hila sojehey asi haŋ naŋ. Yo a wuzla taŋ ma na, mizli ngi hurˀ walahayay ada kukur tarnaˀa ma.

²⁶Nebuzaradaŋ, madiɗa ngi mijigina buyoyo, a hila taŋ cek, aru taŋ da buy madiɗa ngi Babiloŋ a Ribla.

²⁷Buy Babiloŋ a ga taŋ kiita ngi mucu, a kiɗaka taŋ vagay vagay a Ribla hirwuy Hamata. Naŋ kahana, mijaka mizli Zudahay, a ram taŋ kileŋ avu hirwuy taŋ.

²⁸Mizli Zudahay Nabukodonozor mija taŋ nga hirwuy naŋ na, taˀ t'ani: angi vi mitarnaˀ naŋ ngi zuma buyo, a ji mizli durmuk makir ti mizli kukur cuw nga makir.

²⁹Angi vi mukuruˀ nga dangafaɗ naŋ ngi zuma buyo, a hil a Zeruzaleme, mizli skat skat dangafaɗ ti kukur makir nga cuw.

³⁰Ngi kiɗa mi naŋ, angi vi mizli ngir cuw nga makir naŋ ngi zuma buyo ma na, Nebuzaradaŋ madiɗa ngi mijigina buyoyo, a ji Yudeheye skat skat tarnaˀ ti mizli kukur mufaɗ nga zlum nga ruwuy mulaka. A jum jom gar na, mizli durmuk mufaɗ ti skat skat merkeɗe.

³¹Amma vi kukur makir nga tarnaˀ, a dirba taŋ mijaka Zoˀakim buy zuda nga ruwuy mulaka, a ram di le, hin mizli ngir cuw nga zlum ngi kiya mukuruˀ nga cuw naŋ na, Evil-Merodak, ar vi naŋ micifi buy a Babiloŋ vuna si na, a ga mezle da Zoˀakim buy Zuda, a bi di tir dangay avra.

³²A ɓaŋ ti ˀay mezle, a vulaŋ madiɗa fineˀ ngi buyoy misi ati naŋ a Babiloŋ vuna.

³³A ɓi, a cukokoŋ zana naŋ ngi dangaya avra. Hin ngi siifa naŋ gar na, Zoˀakim a zumaka ɗafa ndrehhe ar sikiɗ purla ati buyo.

³⁴Hin ngi siifa naŋ gar, hã avu muc naŋ gar na, gwat naŋ mawuɗ ar hiipas gar ngi ngir ti naŋ na, buy madiɗa ngi Babiloŋ ara vulaŋ di.