Read South Giziga JER 6 Bible Online

JER 6 - South Giziga bible

JER 6

¹Mizli ngi Benjameŋhey, bam tir walahay Zeruzalem avra, ɓa ki ra sipam li ɗum ar li mekelem. Fam tulum a Tekˀa, ng'aka drapo kaˀ a Bet-kereme, asi hiryi, mendere madiɗa, ara ndilo kum tisi diˀis vay muŋ.

²Ka Siyoŋ mukuy teˀe, hiri a ɗuv avu ka ta, minjilketeŋ na, i sa zuzuw.

³Mijiginey maram ti ginew taŋhay na, ng'avaŋ. A jiginam mi ava, a ng'aka guɗuk taŋhay gun hirnga naŋ, mbur gar a zum ti ginewe ar li nga naŋ nga naŋ.

⁴Tilam mi ɓa i gam vurum mipal ati naŋ! Slikiɗam! zlukum di ngi kiɗa vu ti wuzla papas vuna si! Ɓi a luuma ndra le! Li ara ji, susuɗuk ngi pastaˀa, ara sirta li.

⁵Slikiɗukum! zlukum kiɗa vu ti wuzla duvuɗ vuna si, mbuzlukum hay taŋ mimezlehey na!

⁶Bumbulvuŋ misi gidaŋ wãˀa, a ɓi na: «Ngumaka widiseye, mbam muyuŋ mbeˀ mbeˀ a ciki Zeruzaleme, ɓa ngi ɗum: masa gaka bonoy na da walahay vuna ceke, asi a gam anga sey i moˀore tewle.

⁷Kaɓa futuŋ misi miviɗiviɗi ngi yam na, Zeruzaleme kwana i miviɗiviɗi ngi gi moˀore. A cinam a hay taŋ i ɓi ngi moˀore ati guzuvura vu na si. Ndrehhe na, sey bonoy ati gira vu tewle magiy kuyta wãˀa.

⁸Zeruzalem, tiɓa kuti! Da kanah ta na, i purut tivi ka, yo i tiri ti ka daŋ daŋ cay, hirwuy manja mizli araŋ.

⁹Bumbulvuŋ misi gidaŋ wãˀa, a ɓi na: «Mizli Israyeley mindiram na: Anja a jaka taŋ cesl cesl, kuy kuy, kaɓa mbur misli yi ngi gudubun majo is naŋ mindiramay cesl aka cesl aka na! Anja ki mahiri ngi ka haŋ ɓaˀa ɓaˀa ar mihaŋ naŋhaya, kaɓa mbur misli yi ngi gudubun!

¹⁰Maciniy mingiɓi ɗu i waka? Magi sedewo ɗu, ɓa a cinaka i waka? Kayya! Slimiɗ taŋ i midislahay le, t'anta jaka ɓi taŋ macinama gu mata. A puraka ɓi ngi Bumbulvuŋ kaɓa i zi vu, t'anta wuɗam ta wãˀ.

¹¹Himaˀ ɗik a mbiy le wãˀ Bumbulvuŋ, y'anta ɓusa gu mata. Pa himaˀ ɗik na ng'ar ziri ar buwal madiɗa, ng'ar gawla menjeɓelehey mi taˀ ti ngay taŋ. Asi a sa hilaka ziley ati ngwasaya, yo mizli micawwahay ati midigilahay wãˀa.

¹²Ti ya masa biga gidaŋ ɗu avu mizli ngi hirwuy nah na, hay taŋhay, guva taŋhay ati ngwas taŋhaya, a sa vulaka taŋ da mizli mekelemey. I ya Bumbulvuŋ maɓi.

¹³Asi zle avu ziri hã avu mizli madiɗahaya, may luuma gwat avu taŋ haɗa. Mijiviɗey ati masayaya gar, gwat ngi gi taŋ jeŋ ta.

¹⁴Bonoy muluma mizli ɗuwoy na, a ɗiyaka ɓi nah ti sar ngi dirba, a ɓam: ‹Kay! Ɓi anta! Ɓi anta!› Dambalaka ko ɓi anta ru neˀ le ta ngbaŋ.

¹⁵A roko lesl welele, asi a gam gwat le mukuyta wãˀa, amma ko anta ga taŋ mesem ta ma, busukum ngi vi dangwal taŋ a diɗ le na, a sinaka vuna ta. Kuy! A sa ndilam kaɓa mizli mekelemey gar vuna ya, tapas ya masa ga taŋ gwat ngi kwacay mombroŋ na, a sa puraka na, taŋ saɓaɓa a ruwuy.

¹⁶Bumbulvuŋ a ɓi na: Kum mira ram ar buwal na, cicam, wulkam kwaɗay, cufuɗam vu ar ɓi ngi jiviɗ kum misi zleˀe. Ɓam: Jiviɗ mezle ngi sipi i wanaka? Dar ki ram ti raˀa so, naɓa kisa lumam musuka vu vur siifa kumo. Amma taŋ a mbiɗaka: «Ndr'anta ram ti raˀa ta!»

¹⁷I pi mijigina hayay le sek ngi jigin kumo. Taŋ misa fam tulum le na, jam lesl! Amma taŋ a mbiɗaka: «Ndr'anta ngumam ji lesle ta.»

¹⁸Yo mbak ɗagay so! Kum sukwi ngi mizli hanayna, cinam! Na kum jum ngi mizli, gwat masa gi avu taŋ na, sinaka sin le!

¹⁹Mizli ngi si ruwuy keɗeɗe, cinam ɗi: Yi wuɗ i slino hiryi ng'ar mizli tayna, i migir ngi wuluk ngi kwacay taŋ malambaˀ na. Anta jam lesl ar mingiɓi ɗu ta, yo ɓi ɗu, ya madubuna taŋ di gar na, a burɗaka ɓi nah.

²⁰Mukuturɓuy musoko di ti ruwuy Saba, yo lavaɗ mazĩˀĩ ndum ngi ruwuy mikileŋ, i gi taŋ mike? Mikuli kumoy mizlam zlamaya, y'anta wuɗ taŋ ta ani, yo mikuli kum mekelemey gar na, y'anta hĩyã taŋ ta ma.

²¹Bumbulvuŋ a ɓi, mbak ɗagay so: I sa pi gwat ngi nduwa sar sek a mbuŋ mizli ɗuwoyo ɓa a nduwa taŋ sar. Cine ati mangala, a sa ndilam arleˀe, midigwi ati cil naŋ a sa zizam zlaɓ.

²²Bumbulvuŋ a ɓi na: Mizli ara soko ti ruwuy vay muŋ, sukwi madiɗa muzuɓo jiviɗe, zle a mi vay ngi ruwuy mikiɗ mi.

²³A ra ngikaka luvutoy a mi lekeye, ara pukaka ziwiteye, taŋ himaˀ teˀe, ko ircece anta avu taŋ ta wãˀ, ˀay taŋ a cin deŋ kaɓa hurum ngi yam ar mubuliy, taŋ gilaˀ gilaˀ ar pilisey, a cinjaham le tiɓiliŋŋe kaɓa sojehey ngi gi vurum ati ka, ka walahay Siyoŋ mukuy teˀ tuwa.

²⁴Ndra micinaka ɓi nah cin na, a kiɗa ndra vu tay tay, didak a muɗa ndra haɗa, kaɓa didak mamuɗa ngwas mawuɗ a yi.

²⁵Ki bam nga ɓuh ta, ki bam nga jiviɗeye ta, asi mesene kumoy a roko kaw kaw ti maslalamay, ko amaka gar na, zluwun ara gi vu.

²⁶Na kum mizli ɗuwoy, kam zana ngi vagay, putukulom ar murɓuku! Gaka mezegwel magaka gar ar vagaya, kaɓa ar vagay ngi mangal kirmalay, tuwam tuwuy mikaɗam kaɗam, mukuy ta naŋ wãˀ so. Asi mesene mihirya gwata, ara sawa gurjiki.

²⁷Zeremi, i cufuw ka na, ɓa ki pura mizli ɗuwoyo kaɓa mbur mupura ɓiri ar vu, masa hĩyã, yo masa ɗumburo gwat ngi gi taŋ i ka.

²⁸Taŋ gar taŋ, i mizli micifam le hǝrǝk hǝrǝk zlezle ngi slikiɗa ɓihey si, i miji ɓi da mizli, gidaŋ taŋ a zli takaɓa ɓiri gaza malla ɓiri ho gar, i mihiryahay le cek ceke.

²⁹A ra kiɗaka kukutu ti gidaŋ, vu ara luwusla ɓiri ngbaŋ. Amma gudi a gir vu naŋ gar ngataraŋ ar li luwusla ɓiri, ko zayɓiri anta bi put le tivi ɓiri ta na si.

³⁰A zilaka mizli tayna: «Ɓiri bara mapul gir ta», asi Bumbulvuŋ ara pura taŋ hiris le.