Read South Giziga JER 7 Bible Online

JER 7 - South Giziga bible

JER 7

¹Bumbulvuŋ a ɓa mingiɓi naŋ ani da zeremi:

²Cici deŋ a mizlingre ngi hay nga ya Bumbulvuŋ, ɓa ki til mi ti ɓi ani: «Kum mizli Zudahay gar macam tir mizlingre hanayna nga huruk a mbuŋ Bumbulvuŋ na, cinam.

³Bumbulvuŋ misi gidaŋ wãˀ, Buymisemuŋ ngi Israyele, a ɓi na: ɗiyaka gwat ngi gi kum ati joˀ kumo, ɓa zliv i cifam ati kum ar li misenna.

⁴Ani ki ɓam: ‹Mugum ngi Bumbulvuŋ naŋ aka! Mugum ngi Bumbulvuŋ naŋ aka!› Ki pulaka vu kumo mbak mbak vur mingiɓi ngi gukum gilaw hana ta.

⁵Amma ɗiyaka ɓi ngi joˀ kum ati gwat ngi gi kumo jaka, cikam vu gǝr gǝr ar ɓimujuwa mitaˀ gar vur cifi ngi kum mizli ar wala kumo.

⁶Moholoy, mutuhu ati wudiga na, ki zumaka taŋ ta. Mbur migi gwat ta na, ki kiɗaka vagay ar li hana ta. Ki sipam kulihey ɓa hiryi a so ar kum ta.

⁷Da kanah so na, naɓa i sa cifam ati kumo gu, angi hirwuy ya muvula da dideˀ kumoy ngi set na.

⁸Amma kumo ma na, ki pulaka vu kumo mbak mbak vur mingiɓi ngi gukum gilaw, mapul gir ta hana.

⁹Ki hulom, ki kiɗam hirnga, ki gam madama, ki hudumom ti slir, ki gam mikuli mizlam zlam da Baˀal , ki sipam kulihey misi majunukum gu ko neˀ ta, ki gam kahana zuyo si sukwa?

¹⁰A dirba nah, ki soko nga mbuŋ ɗu, ar hay misenna matilam mi ti slimiɗ ɗu ara na, ki ɓam: «I laham le!» Dar ki gaka gwat malambaˀ muwãˀ tayna tuwaˀ ti vendeke zuy sukwa?

¹¹Hay hana mizilaka slimiɗ ɗu ara na, ki puraka kaɓa i butum ngi mufuyvuhoy kwa? Na zle yi pura na, ki ra gam di kanah. I ya Bumbulvuŋ maɓi.

¹²Inga a ram ng'ar li ɗu mipal zleˀe misi a Silo, li ya miga zleˀe ɓa a zilaka slimiɗ ɗu a diga na. Puraka gwat ya migaŋ di asi moˀore ngi Israyel, mizli ɗuwoyo.

¹³Ani wurenna keɗ keɗ na, ki gaka gwat malambaˀ tayna le gar, i ɓukum ɓi nah le, ko mbak le ta ngbaŋ, amma ko ki cinaka ta, i zilukum le ngbaŋ ni, amma ko ki zilikiy mi ta. I ya Bumbulvuŋ maɓi.

¹⁴Yo mbak ɗagay so, hay matilam mi ti slimiɗ ɗu ara, kum mupulaka vu kum mbak mbak vurˀe, yo li ya muvulukum di da kum ati dideˀ kumoy na, i sa gi di kaɓa ya migi ti Silo na ya.

¹⁵I sa zliɗukum kileŋ avu ya, kaɓa ya mizliɗa sukum kum, dideˀ ngi Efrayimey gar na ya.

¹⁶Ka so na Zeremi, ki cici ar ɓi taŋ ta, ki dir dibiɗ malla ki tumbuliy ar deɗe taŋ ta, ki hurdum ti ɓi taŋ a mbuŋ ɗu ta, asi y'anta sa cinuw di ta.

¹⁷Gwat taŋ magaka ar walahay Zudahay waɗ ar buwal madiɗa ngi Zeruzalemey na, k'anta pura takwa?

¹⁸Ziri ara juwoko dum, cine taŋhay ara ɗiyaka vu, yo ngwasaya kwana, ara fukuɗam maɗaf ngi tus ar vu da maˀãy ngi muŋ. [4] Ki ra puslam mbaazla da kuliheye ma, kum maslikiɗikiy mevel na kahana so.

¹⁹Taŋ maslikiɗam mevel na da ya gisiŋ kwa? A slikiɗam di i mevel taŋ tehhe a muŋ ta kwa? Anja a pa taŋ mesem. I ya Bumbulvuŋ maɓi.

²⁰Ya Bumbulvuŋ Buymisemuŋ i ɓi na: «Na mbak ɗagay so, ji mevel ɗu, himaˀ ɗu mufõh fõh ka vu na, i vunaha ng'ar li hana, ng'ar mizli ati gwat misãmiheye, ng'ar widis ngi ɓuhoy ati gwat ngi migamay, a sa wura taŋ kaɓa vu, ko anta muc pam le ta.»

²¹Bumbulvuŋ misi gidaŋ wãˀ, Buymisemuŋ ngi Israyele, a ɓi na: «Jumoko useˀ ngi mikuli kum mizlam zlamay na ng'avi mikuli kumoy muho gara, zumaka taŋ!

²²Ti ya mubo ti dideˀ kumoy ti ruwuy Ezipte na, i ɓa taŋ ɓi neˀ le ta, yo vur ɓi ngi mikuli mizlam zlamay ati mikuli muho gara, i ɓa taŋ ɗaˀ le vurˀe ta.

²³Gwat ya mucufuɗ avu t'ani tewle: «Cinikiy mingiɓi ɗu, ɓa i sa tiri Buymisemuŋ kum, kumo kwana, kisa tiram mizli ɗuwoy, sipaka jiviɗ ɗu kasl kasl, ɓa kisa mumulom.»

²⁴Amma ko a cinaka ta, a jikam slimiɗ aseˀe ta, a gam ti wuluk taŋ malambaˀ na, ka taŋ mawuɗam. Ɓa a mbuɗoko hiri ng'avi ya jak na, taŋ a mbiɗikiy di i duba.

²⁵Diga dideˀ kumoy muboko put ti ruwuy Ezipte, hã ani dana, vur hin gar na, i ra slinukum gawla ɗu mijiviɗeye, ko mbak le anta.

²⁶Amma ko a cinikiy di ta, a jikam slimiɗ ta: a ndiram hirnga gidaŋ, i misi moˀorehey fineˀ dideˀ taŋhay tuwa ma jak.

²⁷Ki sipa taŋ ɓi hana sipeˀ sipeˀ cek kwana, t'anta cinukuw di ta na si. Ki zila taŋ daɗ daɗ kwana, ko a zulukuw mi ta.

²⁸Na ɓa taŋ na: Kum i sukwi ngi mizli macinam mi ngi Bumbulvuŋ Buymisemuŋ taŋ ta, matiɓaka kuti ta. Ɓi mikaslsla anta a hur kumo mata, a susuyum le avu mi kumo.

²⁹Ngwic hirnga kum mupulaka taŋ silip silip ngi biga kum inga yahay na, slaka taŋ, yo hizigaka taŋ avra. Zuɓaka jiviɗe ti kuɗuma tuwuy, asi mizli migwenehey maslikiɗikiy mevel da ya Bumbulvuŋ na, i hirsa taŋ, i pula taŋ zlaɗa.

³⁰Mizli Zudahay a gam gwat malambaˀ ya mawuɗ ta. A tukoko li daˀ ar hay mazilaka slimiɗ ɗu anga na, a hiryaka ti dili. I ya Bumbulvuŋ maɓi.

³¹A ɗiyam li ɗiyeˀ ɗiyeˀ ɗingir da Tofet ar hurjijiŋ ar sozo Hinom, ɓa ngi gi mikuli mizlam zlam anga ti ziri taŋ mizile ati mongosohoy. I cufuɗa taŋ gwat kanah ɗaˀ ta, ko wuluk naŋ a so hirnga ɗu ɗaˀ ta ndiɗaˀ.

³²Yo mbak ɗagay so, hin ara ndilawa, anta sa ɓam ɓi ngi: ‹Tafet› malla ko ngi ‹hurjijiŋ a Hinom› mata, amma a sa ɓam: ‹hurjijiŋ ngi sli ˀay›, yo li misi anta tuwa na, Tafet vuna a sa tiri li dika mizli. I ya Bumbulvuŋ maɓi.

³³Vagay taŋhay miɓaˀ ɓaˀ na, a sa tiram gwat ngi zum ngi ɗiyuwoy ati gwat misãmi ngi ruwuyoy, ko mbur anta ngi sa ɓula taŋ ta.

³⁴Angi walahay Zudahay waɗ ar buwal madiɗahay a Zeruzalemeye, i sa taˀa dimis ngi ɓuruk ati ji salalaya, dimis ngi mbur zil mira zuɓ ngwas ati mumul ngi ngwas mira zuɓ zile. Asi hirwuy a sa tiri diŋ taˀa.