Read South Giziga JER 9 Bible Online

JER 9 - South Giziga bible

JER 9

¹Da y'ada ti li pi sar ngi muzuɓa mulakay a wuzlaɓuh mikirɗak kirɗak zleˀe na, anja ani i pula mizli ɗuwoy na, i cuh kileŋ avu taŋ, asi taŋ gar i migi madamahay, a vulam mizli ngi ji.

²Irne taŋ, naŋ kaɓa lek mihila le ngi mul. Taŋ migidaŋ gidaŋ asi ruwuy na, anta asi taŋ maɓam ɓi mikaslsla ta, amma asi slir taŋ na. A ra gam slra malambaˀ nga mbuŋ nga mbuŋ, na, a sinikiy ya vuna ta. I ya Bumbulvuŋ maɓi.

³Jam lesl, anja ko wa gar na, a ji lesl avu cil naŋ: ki pula vu ɗike mbak da sukum ɗik ko loŋ ta, asi ko sukum ɗik wanaka gar na, a guw gilawa yo cil ɗik wanaka gar na, a juw ɓi.

⁴Mbur gar ara tikina cala, mingiɓi mikaslsla anta mata! A ra sirkaka irne ngi balam ngi ɓi ɓi ngi slir. Taŋ maɓam ɓi cir cir ta tuwa na, a moko ng'avi ya gu mata.

⁵Gi moˀore anta kiɗ mi pas le ta, yo gi gilaw da mburo kanah ma! Tˀanta ngumam sin ɗu ta I ya Bumbulvuŋ maɓi.

⁶Bumbulvuŋ misi gidaŋ wãˀa, a ɓi na: Yo mbak ɗagay so! «I sa pa taŋ ti vu ar kukutu kaɓa mapam ɓiri, ɓa i pura taŋ, zliv taŋ mbrike na. Kay! vur moˀore ngi mizli ɗuwoy na, i sa ga taŋ gwat mi, mbak hana vuna le maka?

⁷Irne taŋ, naŋ kaɓa luvut misi muwuŋ! A tilam mi ti ɓi ngi gi gilaw da mizli. A ɓam ɓi ngi zuy da cil taŋhay daˀ avu mi tewle, amma a mevele, i wuluk ngi ja taŋ ar kwar.

⁸I slikiɗ mevel ng'ar mizli tayna ta mbrike? Sukwi ngi mizli misi ka tayna, i pula cuwala avu taŋ ta mbrike? I ya Bumbulvuŋ maɓi.

⁹A muwãhaya, i niˀic ɗu macin deŋ, ar gezleŋ ngi ginewey a pala, i tuwuy ɗu kaɗam kaɗam, asi a wuraka gwataya le gar, ko mbur macuh ti diga anta mata, anta cinam wus ngi ginew a diga mata. Ɗiyuwoy, gwat misãmihey, gwatay gar a kilam le, gwat loŋ anta mata.

¹⁰I tiri ti Zeruzaleme le i ɗugur zikitiŋ, hay ngi sunduhoy, yo walahay Zudahaya, i tiri taŋ le daŋ daŋ, ko mbur loŋ anta angi taŋ mata.

¹¹Da mburo naŋ da ti sinmijileŋ na, anja a sla wala ngi ɓi Bumbulvuŋ miɓaŋ di na, a til di mi. Hirwuy a tiri diŋ le, i muwura le ka wuzlaɓuh kirɗak kirɗak, ko mbur loŋ macuh ti kẽh anta mata na vur mike?

¹²Bumbulvuŋ a ɓi: «Mizli a pulaka ɓi ya mudubuna taŋ di na le mbak jaka, a cinaka mingiɓi ɗu ta, a sipaka ta.

¹³A roko hirdam hirdam ti hirnga taŋ migidaŋ na, a vulaka vu taŋ le ngi sipi Baˀal , dideˀ taŋhay misirkaka taŋ di na.

¹⁴Bumbulvuŋ misi gidaŋ wãˀ, Buymisemuŋ ngi Israyele, a ɓi na, mbak ɗagay so: «I sa vula taŋ gwat miɗalakay ngi zumo, yo ngi si kwana, yam misi slalak araŋ.

¹⁵I wuɗ i zliɗa taŋ hirnga mber mber nga wuzla sukwi mekelemey, misi taŋ malla ko cine taŋhay vuna, a sinaka taŋ ta. Yo i sa pulo vurum mbak ng'ar taŋ, hã i ngizlaka taŋ kuɗup wãˀ.

¹⁶Bumbulvuŋ misi gidaŋ wãˀa, a ɓi na: «Ɓam ar wala kumo! Ziloko ngwas mutuwuyoy! Ziloko misinaka kuɗma tuwuy le gisiŋ gisiŋ! Anja a soko!

¹⁷Anja a wusam vu! Anja a kuɗumaka tuwuy ar ndra! Anja hiri ndra a ngulo tuwuy! Hiri ndraˀahaya ceɗ ceɗ ti tuwuy!»

¹⁸Tuwuy kaɗam kaɗam ara cino ani baɗ ti Siyoŋ: «Aw! A ngizlam ndra le, mesem a kiɗa ndra le! Sey i pulaka hirwuy hana: asi a mbizlaka hay ndraˀahaya le.»

¹⁹Ngwasay, cinaka mingiɓi ngi Bumbulvuŋ! Anja ki jikaka slimiɗ asi mingiɓi naŋ maɓa na! Dubunaka kuɗma tuwuy da ziri mongoso kumoyo, dubunaka da cil kumoyo!

²⁰Asi muc ara jiɗawa tir fenetir ngi hay ndraˀahaya, ara co ng'ar hay ndra mimezleheye, ara so bunuca ziri ar buwal madiɗahaya, waɗ ziri menjeɓelehey ar li ngi luumahaya.

²¹Ka Zeremi, ɓi na, Bumbulvuŋ a ɓi ani: Vagay ngi mizli kros kros a ruwuyo, kaɓa zay gwatay ar guva, kaɓa mizer a dirba mbur munguma daw, ko mbur ngi hil taŋ anta.

²²Bumbulvuŋ a ɓi na: «Anja mbur misi sinmijileŋ, a huhum vu ti sin naŋ mijileŋ na ta! Anja mbur migidaŋ, a huhum vu ti gidaŋ naŋ na ta! Anja mbur misi zlili, a huhum vu ti zlili naŋ na ta!

²³Da mbur a wuɗ le ɓa a huhum vu na, anja a huhum vu: asi naŋ misi ti wer, yo a siniy le. A si na ma, ya Bumbulvuŋ, gi mezle ɗu ati ɓimujuwa mitaˀ gar waɗ gi jeŋŋe asi ruwuyo y'anta i pula gi naŋ mbak le ta. Yawwa! Maciriy hiri i nah so. I ya Bumbulvuŋ maɓi.

²⁴Ya Bumbulvuŋ i ɓi na: Hin ara ndilawa, ko wa gar mici le a mizaw ngi dumvu tewle na, a sa pura gwat naŋ keɗ keɗe.

²⁵Mbiɗeˀvra, Eziptehey, Zudahay, Edomoy, Amoŋhoy, Moˀapay, waɗ sukwi ngi mizli mihija li tinikey misi a wuzlaɓuh mikirɗak kirɗak na. Asi sukwi ngi mizli gar a cam mizaw ta, yo ko mizli Israyeley vuna kwana, a cam mizaw a mevel taŋ ta ya.