Read South Giziga LAM 1 Bible Online

LAM 1 - South Giziga bible

LAM 1

¹ˀEy eh! Walahay misi mizli haɗa araŋ, mbak ɗoɗok pal naŋ ka ngwas wudiga mbrike! Zleˀe na, slimiɗ naŋ a zil deŋ a wuzla sukwi ngi mizli ngbaŋ, i maˀãy a wuzla hirwuy ngi buy miwi liheye, ani wurenna i beke ngi gi slra mitakˀay so.

²Vur duvuɗ gar na, a ro ar li tuwuy, kwala ceɗ ceɗ ti tuwuy. A wuzla ngama naŋhay gar na, ko mitikin naŋ ɓa a taˀa tuwuy anta. Cil naŋhay gar a vulakaŋ le ngi ji, a tiram mesene naŋhay le.

³A ra jaka sukwi ngi Zuda nga hirwuy mulak, a hin hirnga le, a tiri beke le. A cifi le a wuzla misi kulihey, amma naŋ anta lum li pi haya ta. Misipi naŋhay nder ndere, ara gidiɗakaŋ, a gucokoŋ mi le guc.

⁴Jiviɗ ngi Siyoŋhoy gar, a ndiram le daŋ daŋ, ko mbur mawi haŋ nga diga anta. Mizli anta ar li ngi lumahaya mata, masay ngi raˀahaya, ara niˀicam. Ziri diili ngi raˀahaya, ara likam, kay, i bonoy mukuyta wãˀ avu Siyoŋ.

⁵Mizli mazliram ti naŋ ta, a funakaŋ le, mesene naŋhay ara pulam vu, naŋ masi bonoy na, i Bumbulvuŋ migaŋ di, asi slikiɗa ɓi naŋ mihaɗa na. Ziri naŋhay i mijahay le, mizli mazliram ti taŋ ta, ara ɓulaka taŋ sesek a mbuŋ, ara ram taŋ le nga hirwuy mulak.

⁶Aw Siyoŋ mimezle, busukum ngi vi dangwal naŋ a diɗ le wãˀ. Yarma ngi raˀahaya, a tiram le kaɓa gawla muunihey, t'anta lumam li zumo mata: ara cohom le hiyik hiyik, a mbuŋ misipi taŋhay nder ndere.

⁷Zeruzaleme, ar hin tayna, naŋ maliˀi lambaˀ waɗ ar hin tayna mitikakaŋ ˀay na, gwat mupuɗaw puɗaw naŋhay gar, misi zlezlezleˀe tuwa, a wulka taŋ pay. Da mizli naŋhay a cam le asi haŋ ngi mizli mazliram ti taŋ ta, yo mbur mukulo widi taŋ anta na, mizli mazliram ti taŋ ta a puraka: a singiram ar taŋ, asi a hĩhĩyam le.

⁸Zeruzalem a gi malambaˀ le haɗa, puraka a tiri kitikil le. Mizli mavulakaŋ dudok gar na, ara hirisakaŋ, asi ara purakaŋ, naŋ gulndiŋ kine, naŋ vuna pulaˀ duba, ara gidigil ti niˀic.

⁹Dili a pur ndim ndim avu patari naŋ, gwat masa lumaŋ na, a wulka ɓaˀfar le ta. Naŋ mihĩhĩy na, kay a zumaŋ hirnga le, ko mbur ngi tikin naŋ ar li tuwuy anta. Dar a ɓi: «Aw Bumbulvuŋ ɗu, pura, a tikikiy ˀay le, mesene ɗu a lum bugawla le ar ya.»

¹⁰Mizli mazliram ti naŋ ta, a tiɗam haŋ le ar zlili naŋhaya gar. Naŋ kanah, ara pura mizli duniyahay, ara cam ng'ar hay naŋ mipala, Buymisemuŋ, ki ɓi le ɗaˀ le zleˀe, mizli duniyahay na, a cam ng'ar kus ngi ɗike ta ngbaŋ.

¹¹Mizli naŋhay keɗeɗe a roko niˀicam, a roko sipam gwat ngi zum, zlili taŋhaya, a mbiɗam taŋ gwat ngi zum, ɓa a ngiram ti naŋ. Dar Zeruzalem a ɓi: «Aw Bumbulvuŋ ɗu, pura, y'ani cuˀum, hiris le ani.»

¹²Kum mizli gar macohom ar jiviɗ hana, gwat misenna a gi ɗaˀ avu kumo ta, ani, puraka ɗi, ki puram bonoy ɗaˀ ɗaˀ ka nga ya na ta, ara guzuvuriy haɗi. I bonoy Bumbulvuŋ migiy di tapas naŋ muzuɓ himaˀ haɗa na.

¹³Buymisemuŋ a hizigo vu paɗ ti muŋ, a ci sesẽŋ kasl avu tesl ɗuwoyo, buy naŋ i naŋ. A ngiy ngamngam kaˀ a mbuŋ ɗu, a hizigiɗiy ngbizl mirkendel, a tiri ti ya ngwas muɗoɗok pal naŋ, hin gar na, vu ɗu ndum ta.

¹⁴Mungra ɗuwoyo, a juw taŋ galalaŋ ti haŋ naŋ, a hirzligam ngbok ngbok asi haŋ naŋ. Mungra ɗuwoy a jiɗam sesẽŋ asi ˀay ɗu, dudok naŋ, a tika gidaŋ ɗu le. Bumbulvuŋ a vuliy asi haŋ ngi mizli misi kahana, mbak i cici deŋ a mbuŋ taŋ gu ta.

¹⁵Mizli miwirwirey misi zleˀe a hay ɗu gar na, Bumbulvuŋ a ɓula taŋ le avra. A ɗuf hin taˀ ngi gi kus vur ya, ɓa ngi ngurufo gawla ɗuwoyo. Bumbulvuŋ a njirsliy, ya Zeruzalem, walahay mimezle ngi Zuda le asi sar, kaɓa manjirslam yi ngi gudubun ar li ɗuc naŋ.

¹⁶Ya matuwuy na aseˀeŋ, hiri ɗu ara budug tuwuy. Asi mbur ngi tikin ɗu ɓa i taˀa tuwuyo, mbur ɓa a vuliy gidaŋ na, naŋ kileŋ avu ya. Ziri ɗuwoyo, a zizam le avu ya, asi mesene ɗu, naŋ gidaŋ haɗa.

¹⁷Siyoŋ a tila haŋ a tila haŋ, ko mbur mitikin naŋ, ɓa a taˀa tuwuyo, anta. Zakopo, mizli mazliram ti naŋ tahaya, a roko gun hirnga naŋ. Bumbulvuŋ a ɓa taŋ ɗaˀ ɓa ara lumakaŋ. Zeruzalem misi a wuzla taŋ na, a tiri kitikil le.

¹⁸«Bumbulvuŋ naŋ jeŋŋe, a ga kanah, asi naŋ miɓi ɗaˀ na, yi cinaŋ mi ta. Kum mizli gar, cinam so, puraka bonoy ya masa na. Ziri diili ati ziri gawla ɗuwoyo, a jaka taŋ le nga hirwuy mulak.

¹⁹I zila mizli muwuɗ ɗuwoyo le: amma taŋ a gikiy gilaw le, masay ati mizli micawwa ɗuwoyo, a micam le ar walahaya, naɓa ara sipam gwat ngi zum vur hirnga taŋ, ɓa a ngiram ti naŋ ngbaŋ.

²⁰Aw Bumbulvuŋ ɗu, pura ɗi, nga ya, i si na bonoy tewle, kwacay ɗu ara mbiɗi di kucoˀosl kucoˀosl, didak ara muɗiy a hur ɗo, asi cin mi na, i cin ta gwaɗ naŋ. Tivra, maslalam ara zuma dideˀ ɗuwoyo, a hur haya, i puraka kaɓa ndra a wuzla mumucahay.

²¹Mizli ara cinam niˀic ɗu vuna ngbaŋ: amma ko mbur mitikin ɗu, ɓa i taˀa tuwuyo, anta, mesene ɗuwoy gar ara cinaka ɓi ngi bonoy ɗu na, ka miga ɓa i si bonoyo, ara mumulom di: hin ka muɗuva na, ki ga le ɓa a ndilawa. Anja taŋ kwana, a ndiram kaɓa ya vuna ya.

²²Anja wer taŋ gar na, a bigi ngbay a mbuŋ ɗike, yo gi ti taŋ, kaɓa ka migi ti ya, vur slikiɗa ɓi ɗuwoy gar na ya. Asi mike na, niˀic ɗu a gi le haɗa, dumvu ɗu gar naŋ ti jiji.»