Read South Giziga LAM 2 Bible Online

LAM 2 - South Giziga bible

LAM 2

¹ˀEy ehe! Bumbulvuŋ muzuɓ himaˀ na, a wuɗ a pula Siyoŋ mimezle timbiɗim! A hizigo gwat mawucuɗa Israyele le, paɗ ti muŋ nga ruwuy. Tapas naŋ muzuɓ himaˀ na, a wulka li ɗuva sar naŋ keŋ mata.

²Li zum ti ginew ngi Zakopoyo, Bumbulvuŋ a nda taŋ suɗuk suɗuk, manja ircece. Naŋ mislikiɗ himaˀ na, a mbizla walahay Yude mimezle muguno ti moholoyo le ngurof ngurof a ruwuy: zumabuy ati buy ngi raˀahaya, a hirya taŋ le.

³Naŋ muzuɓ himaˀ fõh fõh na, a susuymo gidaŋ ngi Israyele le leɗeɗ wãˀ. A mbuŋ meseneheye, naŋ anta cici zlak ta. A bul vu hilɓiɓ a ruwuy Zakopo, jo ˀa wura gwat mugun ngi ciki naŋhaya gar.

⁴A ngirɗa leke kaɓa mesene ngi mbur, a ro ngik ti luvut tir haŋ hazumo, kaɓa mbur mazlir ti cil naŋ ta, mbur naŋ mupura le kuy avu hiri gar na, a kiɗa vagay. A pa himaˀ naŋ misi ka vu na, nga hirnga guɗuk ngi Siyoŋ mimezle.

⁵Bumbulvuŋ a gi kaɓa mesene ngi mbur, a nda Israyele suɗuk, a mbizla mohol naŋ matikaŋ hiriheye cek, a waha walahay naŋ muguno ti moholoyo. A ga ɓa mbulo mi ati tuwuy a gi haɗa a ruwuy Zuda mimezle.

⁶A turo zluɓ ngi jarne naŋ, waɗ a turo mazlaɓ naŋ macifi aseˀe, a hirya li ngi zlir naŋ ati ndra. Hin ngi muguzlumoy waɗ Sabata, Bumbulvuŋ a ga ɓa mizli a puyukom di hirnga a Siyoŋ. Naŋ miji mevel ka vu na, a ɓula buy ati masayay avra.

⁷Bumbulvuŋ a hiziga li gi mikuli naŋ le avra, a pura li naŋ mipala kuyta wãˀ, dalam ngi hay mimezle ngir walahay Siyoŋ, a vula taŋ asi haŋ ngi mesene taŋhay. A wudam ar hay ngi Bumbulvuŋ, kaɓa mawudam ti hin ngi muguzlum.

⁸Bumbulvuŋ a juwa le ngi waha mohol ngi Siyoŋ mimezle. a sa waha ngirnin, naŋ anta pula haŋ ava ta, sey da naŋ mususuyumo le ngirnin. Mohol ngi huroˀo ati ngi vra, a tiri taŋ diŋ le, ara mbizlam cuw taŋ.

⁹Mizlingre ngi Siyoŋhoy a cam le nga ruwuy, a hirya waɗ a ngila magandaŋ naŋhaya. Buy naŋ ati yarma naŋhaya, taŋ asi haŋ ngi mizli misi i duniyahay. Ɓimujuwa anta mata. Ko mijiviɗ naŋhay kwana, anta puram gwat ngi Bumbulvuŋ ti kleŋ mata.

¹⁰Mizli micawwa ngi Siyoŋ Mimezle, a cifam le joˀ a ruwuy, lek lek, a pam murɓuk a hirnga. A kam zana ngi vagay ɓaˀ ɓaˀ avu vu. Ziri diili Zeruzalemeye, hirnga jik jik a ruwuy.

¹¹Tuwuy a tikiy gidaŋ ngi hiri le, kwacay ɗu a mbiɗi di kucoˀosl kucoˀosl, gidaŋ ɗu anta mata, a tiki le, asi hiryi muluma mizli ɗuwoy na. Ti di nah na, naɓa ziri gazahay ati ngi dubahaya, a roko ndilam nguruf nguruf, ar li ngi luuma ngir walahayaya.

¹²Ziri tuwa, a ɓaka mumuŋ taŋhaya: «Gwat ngi zum ati ngi si amaka?» A roko ndilam nguruf nguruf, ar li ngi luuma ngir walahayaya, kaɓa mizli mulumam waˀa le, a roko micam gumbuˀ gumbuˀ a didak mumuŋ taŋhaya.

¹³Aw Zeruzalem ɗu Mimezle, i gi sedewo wana ar ka aruŋ maka? I sa wa ɓi ɗik ati ɓi wana aruŋ maka? I sa ɓuw di i ɓi wana ngi tikin ɗike, ɓa ki taˀa tuwuyo ka? Siyoŋ walahay Mimezle. Kay, hiryi mulumuw na, naŋ haɗa kaɓa firndiw ngi mubuliy. Mambuluw gu i waka?

¹⁴Mijiviɗ ɗikey ara puram gwat ti kleŋ vur ka ngbaŋ, amma i ɓi ngi slir, yo i ɓi ngatara lambaˀ. Tˀanta njikukuw malambaˀ ɗike ta, anja ani ki mbiɗa joˀ ɗike le zleˀe. A ra puram gwat ti kleŋ vur ka, amma a tilam di i mi ti ɓi ngi slir ati tikina vu.

¹⁵Mizli macohom a jiviɗ gar na, ara kiɗam kirpasl, asi ɓi ɗike, a fuyukom deŋ, a hizigiɗam hirnga ar ka Zeruzalem Mimezle mihiryi na, a ɓam: «Mazilam zleˀe: mukuy teˀe, mumul ngi duniya gar tuwa, i walahay hana vuna ya?»

¹⁶Mesene ɗikey gar, a ɓam ɓi ngi jigina mi avu ka. A fuyukom deŋ, a ngirɗam sliŋ, a ɓam: «I ndakaŋ le suɗuk. Yawwa! Hana i hin ndra makutukoko tuwa so: I nduloko le anga, i ra puraka.»

¹⁷Bumbulvuŋ a ga gwat naŋ muwulka ngi gi na le, ɓi naŋ ɓi micica zle ngadana ta na, a ga le. A nguɓuca gwataya, manja pura ircece. A ga ɓa mesene ɗik a mumul, vur ka misi ar bonoy na, a ska gidaŋ ngi mizli mazliram ti ka tahaya le.

¹⁸Mizli Zeruzalemey ara tuwam jom arleˀe ng'avu Bumbulvuŋ. Duvuɗ ati papas gar na, Gala ngi Siyoŋ Mimezle, pula tuwuy ɗik a ɓul kol kol ka mizaw. Anta puluw ki musuk vu neˀ le ta, tuwuy ngi hiri ɗike, a cici deŋ le ta.

¹⁹Ka mupuɗuk le ti duvuɗ gar na, slikiɗi, tuwuy ng'avu Bumbulvuŋ. Zuko ɓi ngir mevel ɗike, kaɓa yam a mbuŋ Bumbulvuŋ. Tumbuloŋ haŋ sik ng'avaŋ, ɓa ngi laha siifa ngi ziri memeɗe ɗikey, mandilam nguruf nguruf ti may ar mazlaka jiviɗey gar na.

²⁰Bumbulvuŋ ɗu, pura ɗi, mbur ka magi di kanah vuna i waka, inga pura. Ɓa ngwasay a humbuɗaka ziri taŋhay mugundur gundur, taŋ mawuɗam taŋ na, a zlir le kwa? Masayay ati mijiviɗeye, ɓa mizli a kiɗaka taŋ daˀ ar hay ngi ɗik ka Bumbulvuŋ na, a tiɓaŋ le kwa?

²¹Ziri ziri aruŋ ati midigilahaya, a roko a jiviɗ saɓaɓa a ruwuy, ziri diili ati gawla ɗuwoyo, a roko siɗfil siɗfil a ruwuy, mikiɗa ti maslalam. Ki ngizla mizli le tapas ka miji mevele, ki slaˀay ngi mizli le manja ircece.

²²Mizli ngi zluwun ti taŋ, mugun hirnga ɗu na, ki zilo taŋ ng'ar ya, kaɓa mazilam mizli ng'ar muguzlum. Tapas ji mevel ngi Bumbulvuŋ, wuy ta mizli a laham le, wuy ta a ndiram le ti siifa na, anta mata. Ziri ya masirka taŋ ati ya magila taŋ na, mesene ɗu a kiɗa mi taŋ le teleleˀ.