Read South Giziga LAM 3 Bible Online

LAM 3 - South Giziga bible

LAM 3

¹Yi mbur misina bonoy, asi Buymisemuŋ miji mevel, makiɗiy ti ganday.

²Yi mbur naŋ makiy ɓaˀ a mbuŋ, aru ti ya ar luvuŋ, ar li minjahha ta.

³Ar hiipas gar na, a mo ti haŋ ng'ar ya sar mbeˀ mbeˀe.

⁴Mefecek ngi vu ɗu ati kuturkuy ɗu, a huro taŋ le hor hor, a wuhiy tesleye le.

⁵Muwuŋ ati girey wal wala, a kuso taŋ le zit zit gun hirnga ɗu.

⁶A piy hay ɗu ar luvuŋ, kaɓa mizli mumuca misi zlezlehey.

⁷A guno hirnga ɗu ti mohol vur ya mabi, a juwiy ti celelu madiɗaŋ.

⁸I widi i widi, yo i zil vu, gawla kilawa, gar ngataraŋ, a disla slimiɗe, ɓa a cine diradibiɗ ɗu ta.

⁹A disla jiviɗ ɗu ti ɗugur madiɗahay, a ngizli ti ya tir jiviɗ mikasl ta.

¹⁰Buymisemuŋ naŋ avu yakaɓa [1] urs, magirdiˀ ngi ji gwat, kaɓa mobor miwi vu le a dubakalaf ngi kutuko gwat.

¹¹A ngizli ti ya avu jiviɗe, a buˀiy baˀ murvay, a puliy ɗoɗok.

¹²A ngirɗa leke cǝǝt waɗ a ciciy deŋ, kaɓa gwat ngi wi haŋ ava ti luvutu.

¹³Mbak a puliy mul ar giluwo ti luvut ngir gulum naŋ cek ceke.

¹⁴Ani yi tiri le, ɓa mizli ɗuwoy gar a singiram ar ya, ɓa a zlikiy dimis vur hin gar.

¹⁵A mbiy le ndus ti gwat ngi ji mevele, a wiy le duwlak ti gwat mitrəh kaɓa muwuŋ.

¹⁶A tikiy ˀay ngi humbuɗa ɗugur, a ciy roh roh ng'asi fucu.

¹⁷A hizigiy le kileŋ avu ɓi ngi cifi zuyo, cifi ar wuya, a puyukiy hirnga le.

¹⁸Joˀ yi ɓi: ɓi ɗu nga mbuŋ anta mata, njaha hiri ɗu asi Bumbulvuŋ a kiɗ mi le.

¹⁹Wulka ɓi ngi hina hirnga ɗu ati liˀi ɗu lambaˀ na, kay, i ɓi mitrəh, yo i muwuŋ avu ya.

²⁰I wulka i wulka na, joˀ vu ɗu a kiɗ tay tay a hur ɗu.

²¹Gwat ya mawuɗ a ndir keŋŋe ar wuluk ɗu, ani, i gwat ya masa njih hiri aseˀe:

²²Gi mezle mihaɗa ngi Bumbulvuŋ na, a kiɗ mi ta! Wuɗa vu naŋ mihaɗa na, a kiɗ mi ta!

²³Gi mezle naŋ, naŋ nawaya nawaya, vur miprik gar. Kay, gi teŋteŋ ɗike naŋ haɗa Buymisemuŋ ɗu!

²⁴Yi ɓi ti kwacay ɗu: zlili ɗu i Bumbulvuŋ, ya manjih hiri aseˀe na vurˀe.

²⁵Bumbulvuŋ i mezle avu mbur manjih hiri aseˀe, avu mbur mihirdam hirdam aseˀe.

²⁶Laha vu ngi Bumbulvuŋ na, naŋ kuy ɓa mbur a njih hiri aseˀe ti mi teˀteˀe.

²⁷Mburo, angi naŋ misi i zuŋ zuŋ aruŋ na, a tiɓaŋ le ɓa a ɓusa bonoyo.

²⁸Da Buymisemuŋ mitika ˀay le da mburo, ɓa a ɓusa bonoy mulumaŋ le na, anja a cifi baˀ murvay, a ndir lek leke.

²⁹Anja a guɓ, mi durus da ruwuy, asinta, njaha hiri ada aruŋ kwani.

³⁰Anja a puka kwala da mbur macaŋ babarva, anja zi a mbaŋ ndusu.

³¹Asi Bumbulvuŋ naŋ anta pula mburo fuk ngi wãˀ ta.

³²Ko da a ga le ɓa mbur a sin bonoy tekeɗe kwana, naŋ da ti wuɗa vu haɗa na si, asi gi mezle naŋ mihaɗa na.

³³Naŋ maga ɓa mizli a hinam hirnga, yo naŋ masa taŋ bonoy na, anta mumul di ta.

³⁴Da ara guzuvuraka mizli dangay ngi si ruwuyoyo gar,

³⁵gi jeŋŋe ngi mburo, da ara ngilaka ɓi nah a mihiri ngi Buymisemuŋ Mimadiɗa wãˀa,

³⁶da ara zluɓaka kiita ngi mburo na, Bumbulvuŋ anta pura ta kwa?

³⁷Miɓi le ɗaˀ, ɓa gwat nah a gi na i waka? Sey da i Bumbulvuŋ miɓi le ɗaˀ le takwa?

³⁸Ɓi mezle ati malambaˀa, a boko ti balam ngi Buymisemuŋ Mimadiɗa wãˀ takwa?

³⁹Mbur mideŋ ti siifa, a mbul mi vur mike? Anja mbur gar na, a mbul mi asi malambaˀ nga naŋ.

⁴⁰Sey i puraka jiviɗ ndraˀahaya, i ɗumburoko taŋ kuy kuy, yo mukum ng'avu Bumbulvuŋ so.

⁴¹Tulukum haŋ ndraˀahaya jom ati mevel ndraˀahaya ng'avu Buy misi ar li ngi muŋ.

⁴²Ndra, ndr'i slikiɗam ɓi le, i cinam mi ta, na ka Buymisemuŋ, ki pula mungra ndra ta mbrike!

⁴³Ki ɗum ɗum ti mevel, ki sipa ndra nder nder, joˀ ki ngizla ndra kuɗup, manja ircece.

⁴⁴Ki ɗum ɗum ar gazlavay, ɓa ki cine diradibiɗ ndra ta.

⁴⁵A wuzla sukwi ngi mizli, ki tiri ti ndra kitikil le, li ngi tuk avra.

⁴⁶Mesene ndraˀahaya gar, mi zlah zlah ng'ar ndra.

⁴⁷Misirta ndra i zluwun ati heleleŋ, waɗ muc ati hiryi.

⁴⁸Hiri ɗu ceɗ ceɗ ti tuwuy, asi mizli ɗuwoy a cam le ar bonoy.

⁴⁹Hiri ɗu ara ɓul tuwuy, a sli sleˀ le ta, asi muska vu anta,

⁵⁰hã Bumbulvuŋ a sa guɓo paɗ a muŋ, ɓa ngi pura ndra.

⁵¹Hiri ara jiy vik vik wãˀ ti pura gwat magi avu ziri mongoso ngir walahay ɗu.

⁵²Mesene ɗuwoyo, manja ya miga taŋ gwata si na, ara ɓulikiy, a gidiɗikiy kaɓa ɗiyuw.

⁵³A dikikiy titiri kine si, a kam ɗuguroy risl ng'ar ya.

⁵⁴Yam a ndiy le yik, joˀ yi ɓi: kay, yi miziza le so!

⁵⁵Bumbulvuŋ ɗu, i ra zilo slimiɗ ɗike, baɗ ar mijileŋ ngi vigiɗe.

⁵⁶Ki cine ˀay ɗu, ya mawidi na le: «Ya mamusuwun for for, yo ya maziluw ɓa ki kilo widi ɗu na, anja ki disla slimiɗe ta.»

⁵⁷Tapas ya mukuw zil na, ki kiroho le, joˀ ki ɓiy na: «Ki zluwun ta!»

⁵⁸Haˀaw Bumbulvuŋ ɗu, ki ɗiya ɓi ɗu le, ki mbiɗiy hirnga ɗu le.

⁵⁹Bumbulvuŋ ɗu, taŋ mapikiy zluɓ nga hirnga ɗu na, ki ra pura, anja ki ɗiya ɓi ɗu takwa!

⁶⁰Taŋ mapulaka cuwal taŋ ti ya, yo taŋ magam gidiɓi ar ya gar na, ki ra pura.

⁶¹Zi taŋ mazikiy ati gidiɓi taŋ vur ya gar na, ki ra cine.

⁶²Mizli mazliram ti ya tahaya, mingiɓi taŋ ati sisikaˀay taŋ gar na, vur ya si, hã hiipas wãˀa.

⁶³Taŋ muroko joˀ joˀ malla deŋ deŋ gar na, pura taŋ, a zlikiy dimisi.

⁶⁴Bumbulvuŋ, kisa gi ti taŋ, weˀe avu gwat taŋ migikiy di na ya.

⁶⁵Ga taŋ mevele gidaŋ ka ɗugur, yo pa nisa vu ɗik na nga hirnga taŋ.

⁶⁶Bumbulvuŋ ɗu, kisa sipa taŋ nder nder ti mevel, waɗ kisa ngizla taŋ gar asi gazlavaya kuɗgulum.