Read South Giziga LAM 4 Bible Online

LAM 4 - South Giziga bible

LAM 4

¹ˀEy ehe! Ɓiri bara anta wucuɗ mata, yo ɓiri tapasl tapasl pal naŋ kine a lus le! Ɗugur muvuku vu taŋ a zliɗam hirnga purla purla, ng'ar mazlaka jiviɗ madiɗahay gar na mbri mbri maka?

²Ziri mizile ngi Siyoŋhoy, mupuɗaw puɗaw, kaɓa cikili ngi ɓiri tapasl tapasl pal naŋ kine tuwa, wurenna a bam vu ati girgak ngi hohoyoy, misi mbur mindira taŋ ti ndir mbri mbri maka?

³Ko kiriɓuhoy tekeɗe kwana, ada vulaka ɗuwa da ziri taŋhaya, a sam, amma mizli ɗuwoyo, a tiram le i misi moˀorehey, kaɓa maduulihey a ɓuh.

⁴Irne ngi ziri gazahay ara ngbˀam a balama, asi madalyam, ziri memeɗehey a cufuɗam ɗaf, amma ko mbur masa taŋ di anta.

⁵Mizli mazumam gwat mundum ndumoy zleˀe na, a roko micam a jiviɗ madiɗahaya. Mizli migilam ar wuya zleˀe na, ara wunjulam gwat ngi zum ar kitikil.

⁶Malambaˀ ngi mizli ɗuwoy migaka na, naŋ haɗa fineˀ malambaˀ ngi Sodom zleˀe, Sodom a kiɗ mi a haŋhaŋ si, manja mbur a kil widi naŋ.

⁷Yarma naŋhaya taŋ njezl njezl zleˀe fineˀ yama, kuturkuy taŋhaya babara ndar fineˀ ɗuwa, a wucuɗam deŋ fineˀ ɗugur mazilaka koray, dimbasl ngi vu taŋhaya kaɓa ɗugur mupuɗaw ngil ngil

⁸Wurenna a tiram titirahay le fineˀ hilseɓe, a jiviɗ madiɗahaya, a sinam mata, kuturkuy cap cap ar tesle tewle, kuturkuy muˀulo le kaɓa dum.

⁹Muc ti kiɗ ti maslalama zuwen, a funa muc ti maya le, a funa muc manja gwat ngi zumo le.

¹⁰Ti bonoy muluma mizli ɗuwoy na, ngwas muwuɗa ziri taŋhaya, a da ka ziri taŋhaya ti haŋ taŋ tehhe, ziri a tiram gwat ngi zum taŋ.

¹¹Bumbulvuŋ a ma himaˀ naŋ le ng'ar siyoŋ, a slikiɗa mevele le, a bul vu le ngiɗ ngiɗ, ɓa a zuma si virzi ngi Siyoŋ ngbasl.

¹²Buy madiɗa ngi ruwuyoy malla mbur ar duniya misenna, ɓa a wulkam, mbur mazlir ti mbur ta malla mesene a sa ci a hur Zeruzaleme na, a wulkam ɗaˀ ta.

¹³Bonoy nah a gi gar na, asi malambaˀ ngi mijiviɗ ngi raˀahay, yo asi mungra madiɗa ngi masay ngi raˀahay, a kiɗaka mizli mijeŋŋeheye daˀ a hur walahay vuna.

¹⁴A ram ti liˀi kiŋkiŋ lambaˀ, kaɓa dangaray a jiviɗ madiɗahaya, zana taŋhaya jigiɓ jigiɓ ti pumbusu, mbak ko jiviɗ anta ngi ja haŋ avu zana taŋhaya ta.

¹⁵Da ara cohom na, mizli a wudam ar taŋ: «Kiraham! Dili!» «Kiraham! Kiraham! Ki jaka haŋ avu taŋ ta!» A kilam, a laˀam kiŋkiŋ lambaˀ, joˀ duniyahay a ɓam ar taŋ: «Kay, ndr'nta tiɓaka taŋ ngi masay ndraˀahaya gu mata.»

¹⁶Bumbulvuŋ ti hirnga naŋ a zliɗa taŋ hirnga le mber mber, naŋ anta wuɗ pur taŋ avu hiri mata. Mizli anta sinaka masayaya kaɓa i mizli mata, anta ɗuvam hiri ar mizli micawwahaya mata.

¹⁷Ngi ndra, gidaŋ ngi hiri ndra a tiki le, asi i ra njaham hiri asi kila widi, amma a ndilo ta. Ar li ngi slra ndraˀahaya, i roko kutukom so ngi sukwi ngi mizli malaham vu gu ta.

¹⁸Mesene ndraˀahaya, a roko sesek ar sar ndra, i bam ng'ar luuma ndraˀahaya gu mata. Pas ngi kiɗa mi ndra gweˀe, hin ndra a ndila le muduba, haˀaw, pas ngi kiɗa mi ndra a ndilo le.

¹⁹Misipi ndrahay nder ndere, taŋ wirwir haɗa, kaɓa muluhoy: ara ɓulam ndra garra a muwãhaya, a wam vu le weˀ weˀ vur ndra a ɓuh.

²⁰Mbur, ndra mamusuwunam vurˀe, naŋ buy, Bumbulvuŋ muwunaŋ na, a jakaŋ le ar butum taŋ. Naŋ i mbur, ndra maɓam zleˀe vurˀe: «Ndra mangiram a wuzla sukwi mekelemey na, mbele naŋ majigina ndra tuwa.»

²¹Kum mizli Edomoy, kum mujoasi ruwuy Us na, mumulom, zluzluɓam! A sa vulukukum mbaazla, kisam aya, kisa wam duwlak duwlak, jo kisa ndiram gulndiŋ gulndiŋ kine!

²²Kum mizli Siyoŋhoy, bonoy kum vur gi moˀore kum na, a kiɗ mi le muduba, Buymisemuŋ anta sa jukum nga ruwuy mulaka mata. Amma kum mizli Edomoyo, Buymisemuŋ a sa kutukum vur moˀore kumo: a sa njika mungra kumoyo ngbay ar li babaraŋ.