Read South Giziga Ɗe Zer 1 Bible Online

Ɗe Zer 1 - South Giziga bible

Ɗe Zer 1

¹Nabukodonozor buy madiɗa ngi Babiloŋ a sa jukum nga Babiloŋ, asi kum migam mungra avu Buymisemuŋ na.

²Kum misa ndilam le adiga na, ki sa gam vi mbeˀ mbeˀ, ki zikam haɗi, hã dideˀ dideˀ tarnaˀ, amma a dirba nah, i sa mo ti kum ti jam.

³Sinaka sin le, kum misa ndilam le a Babiloŋ na, ki sa puram kuli ngi ɓiri barahay, ngi ɓiri hirnga ati ngi dumoy, a jijiraka taŋ ar pepesl, yo sukwi ngi mizli a zluwunam ti taŋ teˀe.

⁴Yo ma na, jam lesl, anja angi gwat gar na, ki tiram kaɓa mizli mulakay na ta. Anja kuli taŋhay a gukum zluwuno ya ta.

⁵Asi ki sa puraka mizli mahurukom huruk huruk ti mbuŋ kuliheye waɗ ti dirba taŋ ma gar! Amma ɓam ti kwacay kumo: ‹Ngi huruk huruk huruk na, sey a mbuŋ ɗik, ka kumani tewle!›

⁶Modro ɗu n’ada avu kumo, maki slimiɗ ar musuɗuk kumoy i naŋ.

⁷Naŋ kine, i migi slrahay miciɗaka irne ngi kuli tayna, ko mbri, a kuroko ɓiri hirnga ati ɓiri bara le da gwat miciɗa tayna, amma i slir ngataraŋ, ko t’anta ɓam ɓi gu ta.

⁸Mizli tayna, a gam ti ɓiri hirnga kaɓa zuŋ diyli may ɗiyavu majaŋ.

⁹A ɗiyam di loppol, a caka da kuli taŋhay a hirnga. Pas mekeleme, masayay kwana, a hulom ɓiri hirnga ati ɓiri bara, a ram di da taŋ.

¹⁰Ŋha a vulam da ngwas migi madama vur Buymisemuŋhoy. Yo kuli ɓiri bara, kuli ɓiri hirnga ati kuli dumo, a kaka taŋ zana kaɓa i mizli.

¹¹Amma t’anta laham avi nduv ati mumuyuŋhoyo ta. Da taŋ mikaka taŋ zana gagaza mindezze le na,

¹²a tukuɗaka taŋ hiri, asi lagwada ngir hay ngi Buymisemuŋ a dudufo taŋ le tullo.

¹³Kuli tayna, taŋ kaw kaw ti ganday ngi buyoy, kaɓa miwi ruwuyoy, amma ko da mbur a ga taŋ gwat ngi ji mevel le kwana, anta pulaka jiviɗ ngi kiɗ naŋ vagaya gu ta.

¹⁴Mekelemeye, taŋ kaw kaw ti gordohoy malla zlimbehey a haŋ hazumo, dambalaka ko anta cikam vu a hirnga taŋ ti naŋ ar vurumo ta, avi mivi vuhoyo ta. Taŋ masinam i gwat ngi dilik avi taŋ tahay na avaˀaŋ, ko ki zluwunam ti taŋ ta!

¹⁵Da gandaf a wuh le na, slra naŋ anta mata,

¹⁶kuli taŋhaya, taŋ kanah ya, taŋ micicaka taŋ le ar hay kuliheye na, hiri taŋhay a dudufom tullo ti lagwada mizli macam di asi sara.

¹⁷Ko wa gar miza buyo le na, a gicaka kap a viŋ kwaɗay, ɓa a sa ram di nga kiɗ vagaya. Masayay kwana, a gicaka miviŋ ngi hay kuli a hirnga kuliheye ti gwat migidaŋ gidaŋ, ti faɓru waɗ magandaŋ ma, vur mufuyo vuhoy masa vaka kuli tay na.

¹⁸A bulam lampehey fineˀ gidaŋ, ko da taŋ vuna kwana, anta bulam kanah ta, na kulihey vuna, anta puram loŋ asi taŋ ta mayse.

¹⁹Kulihey a bam vu ati ɓamtalay misi ar hay kuli, mizli a ɓam, huroˀ taŋhay i muzuma le, mumuyuŋhoy a ra zumaka taŋ ti ruwuyo, taŋ vuna jom ti zana taŋhaya, amma ko t’anta sinaka ta!

²⁰Hiri taŋhaya ndar ndar ti cunju ngir hay kuli.

²¹Mbak kwekwenjehey ati mezlezleŋhey waɗ ɗiyuw mekelemey a cifam a vu vu taŋhay mala a hirnga taŋhaya, ko magamakay kwana ada.

²²Ki sa sinaka taŋ i gwat ngi dilik a mbuŋ taŋ tahay na, avaˀaŋ, ko ki zluwunam ti taŋ ta!

²³Ɓiri hirnga mukuroko taŋ di, ɓa a puram kuy tuwa na, da t’anta sumuɗoko ta na, naɓa a tiri ngirliy, a wucuɗ mata, asi ti taŋ maluwuslaka taŋ na, t’anta cinaka ta.

²⁴A hiɗikaka kuli dala dirzah, amma ko musuwun fiɗek tekeɗe anta bo ti kwacay taŋ ta.

²⁵Taŋ maram gu ta tuwa na, a jijiraka taŋ ɓaˀ ɓaˀ ar pepesle. Gwat mabuga da mizli, kuli tayna a ndilaka ta na, i nah so, yo a ra paka mesem da mizli ma kam slimiɗ ar taŋ vuna ma.

²⁶Naŋ kine, da kuli a diɗ le a ruwuy na, sey a slikiɗaka ti slikiɗi. Da a cicaka le deŋ na, anta kirih kirah le tahaŋ naŋ ta. Da naŋ tup ti tup na, anta slikiɗ deŋ le mata. Mizli magaka taŋ mikuli na, kaɓa magaka da mbur mumuca le.

²⁷Na zle gwat mavulaka ngi ga taŋ di mikuli vuna, masayay a hiɗikam di dala da taŋ. Yo anja zleˀe ngwas taŋhay a wunkaka gwat ngi kuli nah da misi murgahay ati misi blehey, na ma na, a muˀulom cah, ɓa a wam di vu da taŋ ma.

²⁸Yo ngwas misi ti nguf ati medevlehey, a jaka haŋ avi gwat ngi mikuli zuy. Gwat ndra muslufoko t’ani gar na, a buga le, taŋ i buymisemuŋhoy ta, ko ki zluwunam ti taŋ ta.

²⁹Mupula taŋ jiviɗ ɓa a zilaka taŋ buymisemuŋhoy vuna i waka? Na magaka mikuli da kuli ɓiri bara, kuli ɓiri hirnga waɗ kuli dum tayna vuna, i ngwasay mayse.

³⁰Masayay a roko jojoˀ ar hay kuli tayna ti zana mingirahay, hirnga ati mazlamaya mihija kurzluˀ kurzluˀ, hirngahaya manja jiiku.

³¹A bucam ɓar ɓar, a wudam a mbuŋ kuli taŋhaya, kaɓa mizli ar li zuma ɗaf ngi vagay.

³²A cukoko zana baɗ avi kuli taŋhaya, a kaka da ngwas taŋhay ati ziri taŋhay.

³³Da ko a gaka mezle malla malambaˀ le da kuli tayna kwana, t’anta mbiɗaka taŋ haŋ gu ta. Kuli tayna, anta cam mbur ar buyo gu ta, anta bam ti mbur tir buyo gu ta.

³⁴Naŋ kanah ma, anta vulam zlili malla suloy da mburo ta. Da mbur a zila kuliheye le, amma a ja mi taŋ mata kwana, t’anta sa cufuɗaka ɓi nah mata.

³⁵Ko t’anta laham mbur avi muco gu ta, yo a tuɓaka mbur mihĩya avi mbur micawwa gu ta.

³⁶Ko t’anta wunaka hiri ngi dangara gu ta, yo anta boko ti mbur tir bonoyo gu ta.

³⁷Ko t’anta sa puraka ircece da ngwas widiga ta, yo anta sa gaka mezle da mutuhu ta.

³⁸Kuli dum tayna mukuroko taŋ ɓiri hirnga malla ɓiri bara na, a bam vu ati ɗugur mumuɗoko di ceɗ a muwã. Mizli ma kam slimiɗ ar taŋ na, mesem a sa sirta taŋ sirit.

³⁹Mizli a sa wulkam malla a sa ɓam i buymisemuŋhoy na, a pur avi mi ska?

⁴⁰Na zle mizli Babiloŋhoy vuna ti hirnga taŋ, anta ɗuvaka hirnga da kuliheye mata. Da a lumam mbur midigizla le na, a ram di nga mbuŋ kuli Bel, a cufuɗakaŋ ɓa a wuna slimiɗ ngi midigizla, a puraka kaɓa kuli vuna ada cin ma.

⁴¹Yo mizli tayna vuna, anta wulkam haɗa, ɓa a pulaka kuli tayna vuna ta ma, lesl anta avi taŋ ta.

⁴²Ngwasaya, a juwaka kwacaya wak ti zeweɗe, a dirba nah, a ra cifam jojoˀ a ciki jiviɗi, joˀ a wuram cekwesle.

⁴³Da mizli macohomo, a zilam le pal asi taŋ, a hinam di le na, cil naŋ mihinam di ta, mupuskakaŋ zeweɗ nga naŋ miwak ar kwacay na ta na, ngwas mihinam di tuwa, a singir a raŋ.

⁴⁴Gwat ngi kuli tayna gar, i slir pal naŋ, na mizli a puraka taŋ kaɓa buymisemuŋhoy, yo a ɓaka ɓi taŋ kaɓa i buymisemuŋhoy na mbri mbrike?

⁴⁵Miɗiyaka taŋ i migi slrahay waɗ migi slra ngi ɓiri hirnga, gwat migi slrahay miɗiyaka si na, i gwat tewle, anta tiri gwat mekelem ta.

⁴⁶Miɗiya gwat tayna vuna, anta sa zikam haɗa fineˀ mizli mekelemeye ta.

⁴⁷Gwat taŋ miɗiyaka ma na, a tiri buymisemuŋ mbri mbrike? Mizli tayna, a sa pulam da dideˀ taŋhaya, i slir ati mesem tewle.

⁴⁸Da vurum a slikiɗ le malla bonoy wanaka, a luma gwat miciɗa tayna le na, masayay a cikilam ngi ngilawuy, ɓa a lumam li ngi ɗum jom ati kuli tayna.

⁴⁹Kulihey vuna, ko a ndilaka ngi liha hirnga taŋ avi vurum ati bonoyo ta, i buymisemuŋhoy ta si na, ki sinaka ta si mbrike?

⁵⁰I dumoy ceɗ ceɗ waɗ ɓiri hirnga malla ɓiri bara kor kor avi taŋ tewle: keɗ keɗ na, i ɓi ngi slir ngataraŋ. Ar wuluk ngi sukwi ngi mizli gar jom ati buy madiɗa taŋhaya na, anta i gwat ngi dilik a mbuŋ taŋ gisiŋ ta, amma i gwat mizli miɗiyaka taŋ tihaŋ taŋ, ko slra ngi Buymisemuŋ anta ra ta.

⁵¹Taŋ i buymisemuŋhoy ta na, mbur misina ta ada kwa?

⁵²Buy madiɗa anta sa bo tisi taŋ ɓa zuma ruwuyo ta, ko vuŋ, anta gaka da mizli gu ta.

⁵³Gwat mica taŋ le ngbaŋ kwana, anta gaka kiita nah gu ta, yo gwat mijeŋ ta migi le avi mbur kwana, anta kilam widi naŋ ta: ko slra taŋ neˀ anta kpaka.

⁵⁴Taŋ kaɓa sutetehey mabulam a dadala muŋ. Hay kuli taŋ ngi dum waɗ ɓiri hirnga malla ɓiri bara kor kor avaŋ hana, da vu a bi le a ra na, masay taŋhaya, a kilam, a bam cakar, amma taŋ kulihey vuna, vu a sa zuma taŋ njiɗak kaɓa ɓamtalay awuzla vu matiɓi giw giw.

⁵⁵T’anta sa cicam zlak ngi zlira dibiɗ ati buy malla mesene taŋhaya gu ta.

⁵⁶Ɓa i tuɓaka malla i puraka taŋ kaɓa buymisemuŋhoy na, a gi kwa? Kuli dum miciɗa waɗ ɓiri hirnga malla ɓiri bara kor kor avi taŋ na, t’anta laham avi muhuloy malla mivi vuhoyo ta.

⁵⁷Ko da mizli a tuɓaka taŋ ɓiri hirnga malla ɓiri bara le ti gidaŋ waɗ zana ngi vu vu taŋ, a cohom taŋ le kwana, naŋ kine, ko a ndilaka ngi kila widi tahaŋ taŋ gu ta!

⁵⁸Buy miwirwir ar vurum malla gwat mupuɗaw ngi hay, buy naŋ magi di slra na, taŋ zuwen a funaka kuli ngi slir tayna le. Malla ta, zuwen miviŋ migiceˀ a hirnga mizli ngi hayay, a funa kuli ngi slir tayna le. Malla ta ma na, zuwen ɓamtal mikaˀ ar mugum ngi buy, a funa kuli ngi slir tayna le.

⁵⁹Asi pas, kiya ati wurzlaŋhay mawucuɗam na, a ra gaka slra taŋ ti hina hirnga.

⁶⁰Da vuŋ mira wucuɗ na, a pur kaɗaŋ kaɗaŋ, himiɗ magi tika tika gar na, naŋ kanah ya.

⁶¹Da Buymisemuŋ a ɓa gazlavaya le ɓa a ru sikikiki asi ruwuy gar na, a ga gwat mucufuɗakaŋ ɓa a ga.

⁶²Vuŋ, Buymisemuŋ mandislo di ti muŋ, ɓa a zluma muwã ati widisey mingiriɗ na, a ga gwat mupulakaŋ jiviɗ nah. Amma kuli tayna, a bam vu neˀ le ati gwat ngisi ruwuyoyo ta, ko kuy taŋ, ko gidaŋ taŋ, a ndilaka neˀ le ta.

⁶³Keɗ keɗ na, a tuɓaŋ ɓa i wulkam malla i ɓam taŋ i buymisemuŋhoyo ta, asi ko a ndilaka ngi gi kiita ta, ko ngi gi mezle da mizli ta.

⁶⁴Ki sinaka taŋ le muduba, taŋ i buymisemuŋhoy ta, ko ki zluwunam ti taŋ ta!

⁶⁵Na zle, a nisaka malla a ɗuwulaka mi da buyoyo gu ta.

⁶⁶Ko a ndilaka ngi bigi gwat mabigi gwat mekelem a muŋ, da sukwi mekelemeye ta, kaɓa ani: gwat mawucuɗ ka pasa, malla maciɗika li ka kiya na, a ndilaka ta.

⁶⁷Useˀ ngi ɓuhoy a funaka kuli tayna le, asi taŋ a kilam nga ɗumo gu, yo a kilam widi tahaŋ taŋ gu.

⁶⁸Ko gwat mabuga taŋ i buymisemuŋhoy na anta, da kine ki zluwunam ti taŋ ta so!

⁶⁹Gwat ngi zluwuna ɗiyuwoy kaˀ ar guva ngi tatiyaka, anta tik gwat neˀ le ta. Kuli dum taŋhay miceɗ ceɗ waɗ ɓiri hirnga malla ɓiri bara kor kor avi taŋ na, taŋ kanah ya.

⁷⁰Malla ta ma na, a bam vu ati sisim mikiŋ ar guva, misi ɗiyuw gar a pi sar a ra, malla a bam vu ati vagay ngi mbur mufuk ng’ar luvuŋ. Kuli dum taŋhay mukor kor ɓiri hirnga malla ɓiri bara avi taŋ na, a bam vu le ati taŋ.

⁷¹Keɗ keɗ zana taŋ migagaza ndez, wucuɗ naŋ masusuyum na, ki sa sinaka taŋ i buymisemuŋhoy ta na avaŋ. Ng’a mbuŋ na, mumuyuŋhoy a sa zumaka taŋ, joˀ a sa ya mesem da ruwuyo.

⁷²Zuwen mbur mijeŋŋe manja kuli: naɓa mesem anta sa gaŋ ta