Read South Giziga Bar 1 Bible Online

Bar 1 - South Giziga bible

Bar 1

¹Ɗerewol hana, i Baruk mutoho a Babiloŋ. Baruk i mangal ngi Neriya, dideˀ ngi Maˀaseya, Maˀaseya i mangal ngi Sedekiyas, dideˀ ngi Asadiyas. Asadiyasa, i mangal ngi Hilkiya.

²Ɗerewol hana a bigi gwatay migam ar vi muzlum naŋ, hin mitarnaˀ naŋ ngi kiya muzlum naŋ, hirak ti mizli Kaldehey mutuɓaka Zeruzalem, a zlizliraka kup na.

³Baruk a slufa ɗerewol hana a mbuŋ Yekoniya mangal ngi Zoˀakim, buy ngi ruwuy Zuda, a slufa mur mizli gar musoko ngi cina mingiɓi ngi ɗerewolo.

⁴Mizli gar misi a Babiloŋ aciki mizaw Suto, t’ada adiga, kaɓa ani: mizli mislakka ngisi mbur madiɗa, ziri ngi buyoy, madiɗa ngi wuzla muyoy, mizli madiɗahay, ziri memeɗehey ati mizli madiɗahay gar.

⁵Mizli a ra tuwam, a ra gam dalyam, a ra diram dibiɗ a mbuŋ Bumbulvuŋ.

⁶A dirba nah, a cikilam dala, mbur gar a vul gidaŋ naŋ.

⁷Dar a slinam di nga Zeruzalem da masay Zoˀakim, i mangal ngi Hilkiya, dideˀ ngi Salum, waɗ da masay mekelemey ati mizli misi ati naŋ a Zeruzalem adiga gar.

⁸Ti zle zlezleˀe, angi hin mukuruˀ naŋ ngi kiya ngi Sivaŋ na, Baruk a hil gwat ngi slrahay le ar hay ngi Bumbulvuŋ, a wuɗ ɓa a mi taŋ nga ruwuy Zuda amuŋ. I gwat muvuɗa ngi ɓiri gazahay. I Sedekiyas mangal ngi Zoziyas, buy ngi ruwuy Zuda, miɓa mizli ɓa a vuɗaka taŋ.

⁹Naɓa Yekoniya ati buyoy, dangayay, mizli madiɗahay waɗ mizli ngisi ruwuyo, Nabukodonozor buy madiɗa ngi Babiloŋ a jo taŋ le nga Babiloŋ si.

¹⁰Mizli mijahay tuwa a ɓam na: «Puraka, i ra slinukum ti dala ani, anja ki hiɗikam di gwat ngi gi mikuli mizlam zlam waɗ gwat ngi mikuli ngi puya mungra, mukuturɓuy ngi wur. Ki sa gaka sedege nah ar li gi mikuli ngi Bumbulvuŋ Buymisemuŋ ndra.

¹¹Diram dibiɗ vur siifa ngi Nabukodonozor buy madiɗa ngi Babiloŋ waɗ ngi mangal naŋ Baltazar aya. Cufuɗaka Buymisemuŋ, ɓa a ja taŋ hutuŋ subur, a zikam haɗa kaɓa birngiŋ mazik a hirnga ruwuy.

¹²Naɓa Bumbulvuŋ a sa vula ndra gidaŋ, a sa ga ɓa i mumulom, ɓa Nabukodonozor buy Babiloŋ ati mangal naŋ Baltazara, a sa ɓulam jijiwiɗ ar ndra, i sa gam gawla taŋ hã i zikam, joˀ i sa lumam gi mezle tivi taŋ.

¹³Yo ma na, ndr’i gam malambaˀ le avu Bumbulvuŋ Buymisemuŋ ndra, ani hã wurenna kwana, himaˀ naŋ mufõh fõh ati ji mevel naŋ ar ndra na, a tisla t’aruŋ, anja ki diram dibiɗ vur ndra vuna.

¹⁴Ngi kiɗa mi naŋ na, slufaka ɗerewol ndra muslunukum di hana, ɓa mizli a njikaka mungra taŋhay ar hay ngi Bumbulvuŋ tapas hin ngi muguzlumoy waɗ ar hin mijam haŋ le gar.

¹⁵Ki sa ɓam na: «Bumbulvuŋ Buymisemuŋ ndra naŋ jeŋŋe, amma ndra, gwat ngi gi ndra misi dana na, a gi mesem! I mesem avu ndra mizli Zuda ati mizli Zeruzalemeye.

¹⁶I mesem avu buy ndrahay, avi masay ndrahay, mijiviɗ ndrahay ati cine ndrahaya.

¹⁷Ndr’i gam mungra le avu Bumbulvuŋ.

¹⁸I ndiram teŋteŋ a mbuŋ Bumbulvuŋ Buymisemuŋ ndra ta, naŋ miɓa ndra ɓa i sipaka ɓimuɗuvahay naŋ muvula ndra taŋ na, i cinakaŋ mi ta.

¹⁹Zle ti Bumbulvuŋ mubo ti dideˀ ndrahay ti ruwuy Ezipte hã dana, gi teŋteŋ ndra ta na, ko i pulaka gi naŋ avu Bumbulvuŋ Buymisemuŋ ndra ta, yo mingiɓi naŋ kwana, i cinaka ta, i gam di kaɓa ɓi ngi sefel.

²⁰Keɗ keɗ dana na, mendere a ra gi avi ndra. Ti Bumbulvuŋ mubo ti dideˀ ndrahay ti ruwuy Ezipte, ɓa a vula ndra ruwuy misi ɗuwa ati mam maɓulom ara na, a pula jiviɗ da gawla naŋ Moyis ɓa a guco ndra mi ti nisi, ani gwat ngi nis nah vuna a ra gi muduba.

²¹Bumbulvuŋ Buymisemuŋ ndra, a ɓa ndra mingiɓi naŋ le, yo a slino ndra mijiviɗey le kwana, ko i cinakaŋ mi ta.

²²Amma ndra jak na, i ra gam gwat ngisi mevel ndra malambaˀ na, i dilikam a mbuŋ kulihey, i ra gam gwat Bumbulvuŋ Buymisemuŋ ndra mapura kuy ta.