Read South Giziga Bar 2 Bible Online

Bar 2 - South Giziga bible

Bar 2

¹Ar nah so na, ɓi Bumbulvuŋ miɓa ngi mbiɗa ndra hirnga, ngi mbiɗa hirnga da migi kiita ndrahay miwaka Israyel, ngi mbiɗa hirnga da buy ndra madiɗahay, da buy ndrahay, da mizli Israyeley ati Zudahay gar tuwa na, a ra gi muduba so.

²Gwat naŋ miga a Zeruzaleme, kaɓa mutohoko ɓi naŋ ar ɓimujuwa ngi Moyise, asi ruwuy kurzluˀ gar na, ko gwat misi kanah a gi daˀ ta wãˀ.

³A gi hã mizli mekelemey a humbuɗam ziri taŋ mizilehey, numuŋhoy a humbuɗam ziri taŋ mongosohoy.

⁴Joˀ Bumbulvuŋ a vula taŋ asi haŋ ngi zuma buyoy mugun hirnga ndra na, ɓa mizli mugun hirnga ndra, naŋ mizliɗa ndra hirnga mber mber nga wuzla taŋ na, a zam ndra, yo a pam ndra mesem.

⁵Ɓa i lumam bugawla jak ma na, i tiram mizli bekehey, asi ndra micinam mi ta na, i gam mungra le avu Bumbulvuŋ Buymisemuŋ ndra.

⁶Bumbulvuŋ Buymisemuŋ ndra naŋ jeŋŋe, amma ndra ati dideˀ ndrahaya, keɗ keɗ gwat ngi gi ndra dana na, ndra ar mesem!

⁷Mingiɓi Bumbulvuŋ miɓa ngi mbiɗa ndra hirnga zleˀe gar na, mendere naŋhay a ra gam gar ar ndra.

⁸Amma ɓa Bumbulvuŋ a mbiɗa mevel ngi ko waka gar asi ndra na, ko i tumbulokoŋ vurˀe ta, vur wuluk malambaˀ ng’ir mevel ndrahay tuwa.

⁹Dar Bumbulvuŋ a wi vu, a slino ndra hiryi tayna ng’ar ndra. Asi Bumbulvuŋ naŋ jeŋŋe ar gwat naŋ miɓa ndra di daˀ le ngi gi gar.

¹⁰Amma ti Bumbulvuŋ maɓa ndra zleˀe, ɓa i sipaka ɓimuɗuvahay naŋ muvula ndra taŋ na, ko i cinakaŋ mi ta.

¹¹Ani wurenna so na, Bumbulvuŋ Buymisemuŋ ngi Israyel, ka mubo ti sukwi ɗik ti Ezipte ti gidaŋ ɗik, ti gwat mabigi gwat mekelemey, ti gwat migam daˀ tahay, ti gidaŋ ɗik mihaɗa ngi wi mizli waɗ ti haŋ ɗik pusak na, i waka na, ki buga ndra di le dana muduba.

¹²Bumbulvuŋ Buymisemuŋ ndra, i gam mungra le, yo i gaka gwata ngi moˀore, i gam gwat mijeŋ ta le. I gaka gwata kaɓa ka mawuɗo ta jaka.

¹³Anja ki muca mevel ɗik mufõh fõh ng’ar ndra na, asi ndra zlaɗ lambaˀ, njiraˀ aka, njiraˀ aka, awuzla sukwi ngi mizli ka mizliɗa ndra hirnga nga wuzla taŋ na.

¹⁴Bumbulvuŋ ɗu, cina diradibiɗ ndra, tuɓa cufuɗ ndra, wi ti ndra vu mbele ka vuna, yo ga ɓa mizli mujoko ndra ng’ar beke na, a gam ndra mezleŋ,

¹⁵ɓa ruwuy gar a sina, ki Bumbulvuŋ Buymisemuŋ ndra, asi a zilaka slimiɗ ɗike le ar Israyele waɗ ar sukwi naŋ.

¹⁶Aw Bumbulvuŋ ɗu, puro hiri zle ar li cifi ɗik mipal na, wuluk ar ndra, ki slimiɗ ar ndra. Jiko slimiɗi, yo cina mingiɓi ndra.

¹⁷Wuna hiri ɓa ki pura ndra. Masa gukuw dudok, yo masinaka gi jeŋŋe ɗik na, anta i mumucahay misi ar li ngi mizli mumucahay ta, asi taŋ, musuwun anta a kwacay taŋ mata.

¹⁸Amma maguw dudok, yo masina gi jeŋŋe ɗik na Bumbulvuŋ ɗu, i mbur misi ar bonoy muwãˀ naŋ, i mbur maru guɓ ti guɓu, misi gidaŋ naŋ anta, mbur mapur wuzleɗ ti ka, wuzleɗ ti ka, misi may majaŋ!

¹⁹Aw Bumbulvuŋ Buymisemuŋ ndra, ndra masoko nga mbuŋ ɗik ɓa i tumbulukuw na, ndr’anta njaham hiri asi gwat mijeŋŋe ngi dideˀ ndrahay ati buy ndrahay migaka zleˀe na ta.

²⁰Naŋ kine, ki ji mevel, ki slikiɗo himaˀ le fõh fõh ng’ar ndra, kaɓa ka mitila mi naŋ ti balam gawla ɗik mijiviɗey, ki ɓi:

²¹«Ka Bumbulvuŋ ki ɓi na: ‹Guɓoko duba, gam gawla ngi buy madiɗa ngi Babiloŋ, naɓa ki sa ndiram a ruwuy ya muvula da dideˀ kumoy na.

²²Amma da ki cinaka mingiɓi nga ya Bumbulvuŋ maɓukum, ɓa ki gam gawla ngi buy Babiloŋ na ta na,

²³i sa ga ɓa mizli a bam tir walahay Zuda ati Zeruzaleme avra, ko a cinam salalay ta, gwatay mahurmom ar muguzlum ta, dimis ngi gawla ati diyli muzuɓam vu wureˀ ta. Hirwuy gar a sa dir daŋdaŋ, njololoŋ.»

²⁴Amma ka miɓa ndra ɓa i gam gawla ngi buy Babiloŋ na, ko i cunukuw mi ta, dar mingiɓi ka muɓo di ti balam gawla ɗik mijiviɗey na, ki ga muduba, ki ɓi: «Tesl ngi buy kumoy ati ngi dideˀ kumoyo, a sa hilaka taŋ tir zivi avra.»

²⁵Ani a zliɗaka vagay ngi dideˀ ndrahay ati buy ndrahaya le, ti papasa, da pas ɓa a wura taŋ, yo ti duvuɗo kwana, da slaslalay, ɓa a ja taŋ ngboˀ ngboˀ. A mucam vuna ti bonoy mukuyta wãˀa: may, ngum ti maslalam waɗ ji ng’ar beke.

²⁶Yo hay mizilaka slimiɗ ɗik ara tuwa, miga ɓa a tiri kaɓa ndra mapuraka dana ani na, i ka. Ki ga kanah asi moˀore ngi mizli Israyeley ati Yudahay.

²⁷Na Bumbulvuŋ Buymisemuŋ ndra, ki gi ti ndra le weˀe avu ɓusa ɓi ɗik waɗ pura ircece ɗiki,

²⁸weˀe avi ka mitil di mi ti balam gawla ɗik Moyis, tapas ka miɓaŋ daˀ, ɓa a toho ɓimujuwa ɗik a mbuŋ Israyeley, ɓa a ɓa taŋ:

²⁹«Da ki cinaka mingiɓi ɗu ta na, zuguduw mitaˀ, magi mi wuwwo hana, i sa ma gunup kini, awuzla sukwi ngi mizli ya masa waha taŋ hirnga mber mber nga wuzla taŋ na.

³⁰Yi sina le, t’anta sa cinikiy mi ta na si, asi i mizli misi hirnga gidaŋhay. Amma taŋ misa ndilam le a ruwuy mijaka taŋ ng’ara vuna na, a sa soko ti lesle so.

³¹Dar a sa sinaka, Bumbulvuŋ Buymisemuŋ taŋ i ya. Akẽh na, i sa vula taŋ mevel mezle waɗ slimiɗ macin kwaŋ kwaŋ.

³²A sa hunumikiy a ruwuy mijaka taŋ ng’ara vuna, joˀ a sa wulukaka slimiɗ ɗu keŋ.

³³Dideˀ taŋhay micicam kaŋ kaŋ avi ya, joˀ a gam gwat malambaˀ na, taŋ a sa pulakaŋ. Asi jiviɗ ngi dideˀ taŋhay migam di malambaˀ avu ya Bumbulvuŋ na, taŋ a sa wulukaka keŋ.

³⁴Dar i sa mi ti taŋ nga ruwuy ya miɓa daˀ le da dideˀ taŋ Abraham, Izak waɗ Zakop na, joˀ taŋ a sa wakaŋ. I sa sika taŋ haɗi gisiŋ gisiŋ, ko y’anta sa ngic asi taŋ mata.

³⁵I sa jumˀay ati taŋ ngi sete, ɓa yi ndir yi Buymisemuŋ taŋ, taŋ kwana, a ndiram i mizli ɗuwoy, ko y’anta sa bi ti sukwi ɗu Israyele, tir ruwuy ya muvula taŋ di na mata.»