Read South Giziga Bar 3 Bible Online

Bar 3 - South Giziga bible

Bar 3

¹Bumbulvuŋ misi gidaŋ wãˀ, Buymisemuŋ ngi Israyel, ndra mawudam ng’avi ka na, asi i cam le yik wãˀ ar bonoy, wuluk a gira ndra le kupuyah wãˀa.

²Bumbulvuŋ cina ndra di, yo pura ndra ircece, asi i gam mungra le avi ka.

³Naŋ kine, ka, k’ada ndrehhe, na ndra, i zizam le ngi sete!

⁴Yo ma na, Bumbulvuŋ misi gidaŋ wãˀ, Buymisemuŋ ngi Israyel, cina tuwuy ngi ndra Israyel misi kaɓa i mumucahay na, ndr’i ziri ngi mizli migam mungra avi ka, micinaka mi da ka Bumbulvuŋ Buymisemuŋ taŋ ta na, mbak ko mendere anta pula ndra mbak le ta.

⁵Anja ki wulka gwat mijeŋ ta ngi dideˀ ndrahay migaka zleˀe na ta, amma wurenna wuluk angi gidaŋ ɗik ati slimiɗ ngi ɗik ka Buymisemuŋ na jaka.

⁶Asi Bumbulvuŋ Buymisemuŋ ndra i ka, i ra hunumukuw Bumbulvuŋ ɗu!

⁷Ka miga ɓa zluwun ti ka ada a mevel ndra na vurˀe: ɓa da gwat migi le avi ndra na, i zilukuw. Ndra misi a ruwuy mulaka, i sa hunumukuw, asi gwat mijeŋ ta ngi dideˀ ndrahay mugukuw di gar na, i ɓulaka le kileŋ avi mevel ndrahaya.

⁸Ka mizliɗo hirnga ndra mber mber na, ndr’ani dana a ruwuy mulak hana, i tiram le mizli ngi zi, ngi nisey ati ngi kuti ti bonoy. Ndra magam gar na, asi gwat mijeŋ ta, dideˀ ndrahay migaka taŋ gar, asi taŋ mupulaka Bumbulvuŋ Buymisemuŋ ndra na.

⁹Israyeley, cinaka ɓimuɗuva mavul siifa ani, jikam slimiɗ ɓa ki slaka wala nah.

¹⁰I mi migi ka Israyeley? Kum a ruwuy mulak vur mike? Ki gam gal wãˀ a ruwuy mulaka vur mike?

¹¹Ki jaka haŋ avu mumucahay ɓa ki cam ar dili vur mike? Yo a slufukum awuzla mumucahay vur mike?

¹²Ani na, ki pulaka jiviɗ ngi sin mijileŋ le.

¹³Da ki sipaka jiviɗ ngi Buymisemuŋ le zleˀe na, anja ani ki roko zuy zuy ngi sete.

¹⁴Dubunam, ɓa ki sinaka li ngi sli wala ngi gwata, li ngi gidaŋ, li ngi sine le na, naɓa ki sa sinaka li ngi ji hutuŋ subur ati siifa, li minjahha ɓa hiri a pur kweŋ kweŋ waɗ cifi zuy zuyo, jom nga mi taŋ.

¹⁵Muluma li cifi ngi sin mijileŋ i waka? Mici daˀ ng’ar zlili naŋ i waka?

¹⁶Buy ngi sukwi mekelemeye taŋ amaka? Mizli masirkam gwat ngi ɓuhoyo taŋ amaka?

¹⁷Mizli magilam ɗiyuw ngi ɓuhoyo taŋ amaka? A cikilam ɓiri bara ati ɓiri hirnga, mizli a pulaka vu taŋ le wãˀ vur gwat tayna, a gam zlili le ti naŋ fineˀ gidaŋ, mizli tayna vuna taŋ amaka?

¹⁸Mizli migi dalahay na, wuluk taŋ a ro keŋŋe ara, amma slra taŋ vuna, manja baraf si na, mizli tayna taŋ amaka?

¹⁹A susuyumoko taŋ le, a pam sar le ng’ar li ngi mizli mumucahay, dar mizli mekelemey a slam ar li taŋ.

²⁰A yam ziri mekelemey, a cifam le a ruwuyo, amma a sinaka jiviɗ ngi sin ngi gi gwata ta.

²¹A jam lesl avi jiviɗ naŋ ta, ko a kam slimiɗ anga ta, ziri taŋhaya, jiviɗ ngi cine taŋhay musipaka zleˀe na, a cicam zar kileŋ avaŋ.

²²A cinaka mingiɓi ngi sin mijileŋ a ruwuy Kanaˀan vuna ta, yo a puraka a Temaŋ ta ma.

²³Ko dideˀ ngi Agaray, masipaka a ruwuy aka, migi terere ngi Madiyanay ati ngi Temaŋhay, mikiɗa mambaˀhay ati misi sin ngi wulukoyo, ko a sinaka jiviɗ maru ng’ar sin mijileŋ ta, ko wuluk naŋ a so keŋ a hirnga taŋ vuna ta si.

²⁴Aw Israyel ɗu, hay ngi Buymisemuŋ naŋ kirngiŋ kaɓa birngiŋ, li cifi nga naŋ, naŋ kirngiŋ!

²⁵Naŋ ciɗak ciɗak manja maakway, gil naŋ hã a dadala muŋ, a wi ta!

²⁶Mizli suburohoy, misi slimiɗ taŋ a zil deŋŋe ar zli virzi ngi li, mizli migila ŋcoot, bugawla ngi vurumoy na, a yaka taŋ adiga.

²⁷Buymisemuŋ miwini na, i taŋ ta, naŋ mibiga jiviɗ ngi sin ngi gi gwat na, da taŋ ta.

²⁸Dar a mucam, asi t’anta wulukam ta, a zizam asi taŋ i gilaway.

²⁹Mijiɗ daˀ nga muŋ, ɓa a zuɓo sin mijileŋ, a po di sar baɗ ti muŋ nga ruwuy na, i waka?

³⁰Mutuwuɗ daˀ nga duba mubuliy, ɓa a ra lumo sin mijileŋ adiga, ɓa a mbuɗo hirnga naŋ ti ɓiri hirnga miwãˀ na, i waka?

³¹Mbur misina jiviɗ maru ng’avi sin mijileŋ na, anta ndidaˀ, na zle ko mbur masipi wer ngi lum naŋ vuna anta si.

³²Amma Buymisemuŋ misina gwat gara, a sina sin mijileŋ le, mbele naŋ misi lesl haɗa na, a luma le. A ɗiya ruwuyo le ɗiyeˀ ɗiyeˀ ngi sete, joˀ a naha heɓe heɓe ti gwat misãmihey.

³³A slina li mijahha, dar li mijahha a ru, a zulo di amuŋ, a cinaŋ mi ti jijik kir kir.

³⁴Wurzlaŋhay a ra wucuɗam ar li taŋ ar li taŋ, yo a ra mumulom.

³⁵Buymisemuŋ a zila taŋ, a zilakaŋ mi: «Ndr’ani!» A ra wucuɗam ti mumul, da mbur migi taŋ.

³⁶Buymisemuŋ ndra i naŋ, mbur ngi wi ati naŋ anta.

³⁷Jiviɗ ngi sin ngi gi gwat gar na, naŋ a luma taŋ le, yo a buga le da gawla naŋ Zakopo, waɗ da Israyel yeme naŋhaya.

³⁸Zle tapasa, mizli a ra puraka sin mijileŋ a ruwuyo, joˀ a ndir awuzla mizli.