Read South Giziga Bar 4 Bible Online

Bar 4 - South Giziga bible

Bar 4

¹Sin mijileŋ n’ada ar ɗerewol ngi ɓimuɗuva ngi Buymisemuŋ, i ɓimujuwa ngi sete. Mbur muvulaŋ vu naŋ le gar na, a ru ng’ar siifa, amma mizli mapulakaŋ gar na, a sa mucam.

²Dideˀ ngi Zakopoy, moko amuŋ, tuɓaka sin mijileŋ, a ram ng’ar li babaraŋ, a ra jam hirnga ti li mijahha.

³Dudok kumo, ki vulaka da mizli mekelemey ta, ko gwat kum mulumam fineˀ mizli mekelemeye, ki vulaka da sukwi mulakay ta.

⁴Ndra Israyeley na, ndra ar mumul, asi i sinaka gwat Buymisemuŋ mawuɗo le!

⁵Mizli ɗuwoy, tumom vu tum, mizli a wulkaka Israyele keŋ avi kum!

⁶A huɗukukum le zleˀe da sukwi ngi mizli, amma a huɗukukum ngi nguzlukum ta, Buymisemuŋ muvulukum asi haŋ ngi mesene kumoy na, asi kum migakaŋ gwat ngi ji mevel.

⁷Kum migam mikuli da kulihey mbak Buymisemuŋ le na, ki slikiɗakaŋ mevel le da naŋ migi kumo.

⁸Buymisemuŋ ngi sete, i naŋ mavulukum gwat ngi zumo, ki puyukom hirnga le, yo ma na, Zeruzalem, mumuŋ kum mugulukumo, ki girakaŋ le kupuyah wãˀa ma.

⁹Zeruzaleme, Buymisemuŋ muvunoho himaˀ naŋ ng’ar kum na, a pura le, joˀ a ɓi: «Walahay migweˀ gweˀ ngi ciki Siyoŋhoy, cinaka mingiɓi ɗu, Buymisemuŋ a vuliy bonoy madiɗa le.

¹⁰Asi Bumbulvuŋ mitika ˀay da ziri mizile ati mongoso ɗuwoy, ɓa a jaka taŋ nga ruwuy mulak na, i pura le ti hiri ɗu.

¹¹I gila taŋ zleˀe ti mumul, amma i sa pula taŋ mbak ti ndurɓo hiri waɗ ti bonoy.

¹²Da mbur a puriy le yi widiga, mizli haɗa a pulikiy le na, anja mbur a mumul ta. Yi ndir le loˀ pal ɗu, vur mungra ziri ɗuwoy migakaŋ, asi a pulaka ɓimujuwa ngi Buymisemuŋ le.

¹³A tuɓaka ɓimuɗuva naŋhaya ta, a zuɓaka jiviɗe kaɓa ɓi naŋ mutoho toh toh na ta, yo gwat mudubunaka taŋ di, mijam haŋ le ati gi jeŋŋe naŋ na, a jaka jiviɗ naŋ ta.

¹⁴Kum walahay midigwi ngi Siyoŋhoy, soko! Wulkam keŋ ar Bumbulvuŋ mitikaˀay da ziri ɗuwoy, ɓa a jaka taŋ nga ruwuy mulak na!

¹⁵Asi a zilo sukwi ngi mizli mikileŋhey le, ɓa a zliram dibiɗ ati taŋ, i sukwi ngi mizli manja ircecehey, maɓam mi manja sin, i mizli masinam midigila ta, a puram ircece da zuŋ ta.

¹⁶A cohom ti ziri, wudiga mawuɗ taŋ haɗa le, a pulakaŋ ɗoɗok manja ziri mongosohoy.

¹⁷Na ziri ɗuwoy, i sa kil widi kumo mbri mbrike?

¹⁸Masa luhukum tisi haŋ ngi mesene kumoyo, i mbur muvulukum bonoy vuna.

¹⁹Akum ziri ɗuwoy, akumam! Ya ngwas wudiga, y’ani fuk, ɗoɗok ani so,

²⁰Jibe ɗu ngi ki ti hin misetete, yi cuko le avra, yi ka zana ngi mutumbulo vuhoyo le, ar siifa ɗu gar, i sa ndir ar li widi ng’avu Bumbulvuŋ.

²¹Ziri ɗuwoy, tumom vu! Zilaka Buymisemuŋ ˀay ngar ngar, a sa tuɓo kum avi guzuvura vu, waɗ tisi haŋ ngi mesene kumoyo.

²²Yi njih hiri le njah, i Bumbulvuŋ masa luhukum, Buymisemuŋ mipala , a vuliy mumul nah le: Bumbulvuŋ milih kumo, a wuɗ a purukum ircece gweˀe.

²³Yi pulukum mbak ki ram ng’ar bonoy waɗ nga ndurɓo hiri, amma Buymisemuŋ a sa mo ti kum ng’avi ya ngi set, ti mumul waɗ ti jiɗa maceŋceleŋ.

²⁴Walahay midigwi ngi Siyoŋhoy, a ra puraka kum misi a ruwuy mulak na. Naŋ kine, Buymisemuŋ kum mawuɗ a luhukum na, walahay tayna, a wuɗ a sa puraka gweˀe, a sa ndilo kum ti dudok miciɗak ciɗak waɗ ti wucuɗ mingiliw ngiliw ngi Bumbulvuŋ.

²⁵Ziri ɗuwoy, himaˀ Buymisemuŋ muzuɓa ng’ar kum na, ɓusaka ti mi teˀ teˀe, mesene kum a supukum le, amma a wuɗ a vusokoŋ gweˀe, ki sa puraŋ, joˀ ki sa ɗuvaŋ sar krap asi ˀaya.

²⁶Ziri ɗu muluɓuw luɓuwoy a ngiraka jiviɗ misi ɗuguroyo le ŋcaat, a hulukum le kaɓa mesenehey majam ginew ngi mizli ti gidaŋ.

²⁷Tumom vu tum ziri ɗuwoy, tilaka mi da Buymisemuŋ, asi i naŋ muso ti kum ng’aka, n’anta puyuk hirnga ti kum ta.

²⁸Ani ki wulukam zleˀe, ɓa ki gwaham avu Buymisemuŋ, yawwa, kum mi mbuɗam mevel na, mburom mbor, ar li sipi naŋ fineˀ misi zle makaw kuruˀ!

²⁹Asi naŋ muvulukum bonoy nah na, a sa sukum ti mumul ngi set waɗ lih kumo wãˀ jom arleˀe.»

³⁰Tum vu Zeruzalem! Buymisemuŋ mucuw slimiɗ na, a sa tukunuw ɓa ki taˀa tuwuyo.

³¹Mizli mugukuw malambaˀ, mamumulom asi ka midiɗ na, taŋ ar bonoy!

³²Walahay misi, ziri ɗikey a gam beke le adiga na, taŋ ar bonoy! Walahay mindir ti ziri ɗikeye ɓirim na, naŋ ar bonoy!

³³Walahay mamumul asi ka midiɗi, yo ka misi ar bonoyo, naŋ miɓi yawwa na, i naŋ masa so ti bonoy ngi ngizla vu naŋ tehhe.

³⁴Naŋ mamumul asi mizli anga haɗa na, i sa pulaŋ ɗoɗok, ziriɗa mi naŋ na, a sa tiri bonoy.

³⁵Asi ya Bumbulvuŋ i sa ɗuvaŋ vu, a zlizlir hã a zik, yo a sa tiri li cifi ngi malyamay, hã zik fineˀ gidaŋ ma.

³⁶Zeruzalem, pur hiri ng’asi pas ngi mipriki, pura Buymisemuŋ masuw ti mumul.

³⁷Ziri ɗikey ka mupura taŋ ar li cuh tuwa na, a ra moko, a ra soko, ti ka ti ka gar, tisi pas ngi miprik waɗ tisi pas ngi pastaˀa, i mingiɓi ngi Buymisemuŋ mipal mukuso taŋ hirnga, a ra mumulom ti dudok ngi Buymisemuŋ.